பணக்காரர்கள் அனுபவிக்கும் மானியம் ரூ.1 லட்சம் கோடி: ரத்து செய்ய பொருளாதார அறிக்கை பரிந்துரை

by **Tamil** Sat Feb 27, 2016 7:01 am

பணக்காரர்கள் அனுபவிக்கும் மானியம் ரூ.1 லட்சம் கோடி: ரத்து செய்ய பொருளாதார அறிக்கை பரிந்துரை

வீடுகளுக்கு மானிய விலையில் வழங்கப்படும், சமையல் காஸ் சிலிண்டர் எண்ணிக்கையை, ஆண்டுக்கு, பத்தாக குறைக்க வேண்டும். வசதி படைத்தவர்களுக்கு, ஒரு லட்சம் கோடி ரூபாய் அளவுக்கு தரப்படும் மானியத்தை நிறுத்த வேண்டும்’ என, பொருளாதார ஆய்வறிக்கையில் பரிந்துரைக்கப்பட்டு உள்ளது.
வரும், 2016 – 17ம் நிதியாண்டுக்கான பொது பட்ஜெட், பார்லிமென்டில், வரும், 29ல் தாக்கல் செய்யப்பட உள்ளது. இந்நிலையில், 2015 – 16ம் நிதியாண்டிற்காக பொருளாதார ஆய்வறிக்கையை, மத்திய நிதியமைச்சர் அருண் ஜெட்லி, நேற்று பார்லிமென்டில் தாக்கல் செய்தார்.
ஆய்வறிக்கையில் கூறப்பட்டுள்ளதாவது:
* வரும் நிதியாண்டில், பொருளாதார வளர்ச்சி, 7 முதல், 7.75 சதவீதத்துக்குள் இருக்கும்
* நிதிப்பற்றாக்குறை, மொத்த உள்நாட்டு உற்பத்தியில், 3.5 சதவீதத்துக்குள் இருக்கலாம்
* ஜி.எஸ்.டி., எனப்படும் சரக்கு மற்றும் சேவை வரியை, நாடு முழுவதும் விரைவில் அமல்படுத்த வேண்டும்
* நாட்டின் பொருளாதார வளர்ச்சி, 8 முதல், 10 சதவீதம் வரை உயரலாம். ஆனால், இதை அடைய மேலும் இரு ஆண்டுகளாகும். வரும் நிதியாண்டு சவால் நிறைந்ததாக இருக்கும்
* ஏழாவது ஊதியக் கமிஷன் பரிந்துரைகளை அமல்படுத்த, மத்திய அரசு, கூடுதல் நிதியாதாரங்களை ஒதுக்க வேண்டும்
பணக்காரர்கள் அனுபவிக்கும் மானியம் ரூ.1 லட்சம் கோடி: ரத்து செய்ய பொருளாதார அறிக்கை பரிந்துரை Tamil_News_large_1466112

* வரும் நிதியாண்டில், பணவீக்க விகிதம், 4.5 அல்லது, 5 சதவீதமாக சரியும்; நடப்புக் கணக்கு பற்றாக்குறை, 1 முதல், 1.5 சதவீத்துக்குள் இருக்கும்
* முதலீடுகள் குறையத் துவங்கினால், ரூபாய் மதிப்பை குறைக்கும் நடவடிக்கையை, படிப்படியாக மேற்கொள்ளலாம். அதனால், ஏற்படும் பின்விளைவுகளை எதிர்கொள்ள தயாராக இருக்க வேண்டும்
* வரி செலுத்துவோர் எண்ணிக்கையை, தற்போதுள்ள, 5.5 சதவீதத்தில் இருந்து, 20 சதவீதமாக உயர்த்த வேண்டும். வரி விலக்குகளை படிப்படியாக குறைக்க வேண்டும்
* வரும் நிதியாண்டில், கச்சா எண்ணெய் விலை, பீப்பாய் ஒன்றுக்கு, 35 அமெரிக்க டாலராக இருக்கும்
* 2016 – 17ம் நிதியாண்டில் சில்லரை விலை மீதான பணவீக்க விகிதம், 4.5 – 5 சதவீதமாக இருக்கும்
* பணவீக்க விகிதம் குறைவாக நிலவுவதால், பொருட்களின் விலையில் ஸ்திரத்தன்மை காணப்படுகிறது
* ஊதியக்குழு பரிந்துரைகளை அமல்படுத்துவதால், விலைவாசியில் பாதிப்பு இருக்காது
* சவால் மிக்கதாக காணப்படும் உலக பொருளாதார சூழல், நாட்டின் பொருளாதார கொள்கைகளில் பாதிப்பை ஏற்படுத்தலாம்
* நடப்பு, 2015 – 16ம் நிதியாண்டில், நிதிப்பற்றாக்குறையை, 3.9 சதவீதமாக வைத்திருப்பது சாத்தியமே
* வரும், 2019, பிப்ரவரிக்குள், பொதுத்துறை வங்கிகளின் நிதித்தேவை, 1.8 லட்சம் கோடி ரூபாயாக இருக்கும்
* 2015 – 16ல் சேவைத்துறை வளர்ச்சி 9.2 சதவீதமாக இருக்கும்
* சமீபத்திய சீர்திருத்த நடவடிக்கைகளால், தொழில் துறை, கட்டமைப்பு, கார்ப்பரேட் துறைகளில் நல்ல முன்னேற்றம் ஏற்பட்டுள்ளது
* எதிர்பார்ப்பை விட கூடுதலாக, அரசின் வரி வருவாய் இருக்கும்
* ஏற்றுமதியில் மந்தநிலை தொடரும்; அடுத்த ஆண்டில் சீர்படும்
* உரத்துறையில், சீர்திருத்தங்கள் மேற்கொள்ளப்பட வேண்டும்.
வசதி படைத்தவர்கள்…
ஆய்வறிக்கையில் மேலும் கூறப்பட்டுள்ளதாவது: வசதி படைத்த பணக்காரர்களுக்கு, 1 லட்சம் கோடி ரூபாய்க்கும் கூடுதலாக மானியம் வழங்கப்பட்டு வருகிறது. ஏழைகளுக்கு மட்டுமல்லாது, வசதி படைத்த பணக்காரர்களுக்கும் மானியம் அளிக்கப்படுகிறது. பல சமயங்களில், வசதி படைத்தவர்களே மானியங்களை பெருமளவில் அனுபவிக்கின்றனர்.
சிறுசேமிப்புத் திட்டங்கள், சமையல் காஸ், ரயில்வே, மின்சாரம், விமான எரிபொருள், தங்கம், மண்ணெண்ணெய் போன்ற ஆறு பிரிவுகளுக்கு வழங்கப்படும் மானியங்கள், பணக்காரர்களை சென்றடைகின்றன. இவற்றின் மூலம், 1 லட்சம் கோடி ரூபாய்க்கும் கூடுதலான மானியங்கள் வசதி படைத்தவர்களுக்கு கிடைக்கின்றன.
இவர்களுக்கு உதவும் வகையில், அரசின் குறுக்கீடுகள் அதிகளவில் நடக்கின்றன. இக்குறுக்கீடுகளை தடுக்க, தக்க நடவடிக்கை எடுக்கப்பட வேண்டும். வசதி படைத்தோருக்கு வழங்கப்படும் மானியங்களை நிறுத்துவதன் மூலம், நிதி மேலாண்மையை சிறப்பாக அமல்படுத்த முடியும்.
இவ்வாறு ஆய்வறிக்கையில் கூறப்பட்டுள்ளது.
சமூக, பொருளாதாரத்தில் ‘டாப்’
மின்சாரத்தில் தமிழகம் ‘வீக்’சமூக பொருளாதார துறைகளில், தமிழகம் முன்னிலை வகிப்பதாக, பொருளாதார ஆய்வறிக்கையில் பாராட்டு தெரிவிக்கப்பட்டுள்ளது.
அதில், கூறப்பட்டுள்ளதாவது:
* கடந்த, 2008 – 09 முதல், 2014 – 15 வரையிலான நிதியாண்டுகளில், நாட்டின் மொத்த உள்நாட்டு உற்பத்தியில், மூன்று சதவீதம், கல்விக்காக செலவிடப்பட்டுள்ளது. ஆனால், சுகாதாரத்துக்காக, 2 சதவீதம் மட்டுமே
செலவிடப்பட்டுள்ளது
* 2013 – 14ம் நிதியாண்டில், இந்தியாவில், கல்விக்காக செலவிடப்பட்ட தொகை, 11 ஆயிரம் கோடி ரூபாய். இதில் அதிகபட்சமாக, தமிழகத்தில், 12 சதவீத தொகை செலவிடப்பட்டுள்ளது
* தனிப்பட்ட மாணவர் செலவாக, தமிழகம் செலவிட்ட தொகை, 726 ரூபாய் மட்டுமே
* சுகாதாரத் துறையில், தமிழகம் மிக சிறப்பாக செயல்பட்டு வருகிறது
* கிராமங்களில், தேசிய ஊரக சுகாதாரத் திட்டத்தின் கீழ் செயல்படும் மையங்களில், தமிழகத்தை பொறுத்தவரை, மருத்துவர்கள், நர்சுகள் உள்ளிட்டோருக்கு பற்றாக்குறை காணப்படவில்லை
* சுற்றுலாத்துறையில், உள்நாட்டு சுற்றுலாப் பயணிகள் அதிகம் செல்லும் மாநிலமாக தமிழகம் உள்ளது
* 2014ல், தமிழகத்தில் சுற்றுலா சென்ற பயணிகள் எண்ணிக்கை, 32.7 கோடி
* வேலை வாய்ப்பை பெருக்குவதில், தமிழகம் சிறப்பான நிலையில் உள்ளது
* மின் துறையில், பிற மாநிலங்களை ஒப்பிடுகை யில், தமிழகம் பின்தங்கி உள்ளது.
இல்லத்தரசிகளுக்கு ‘ஷாக்!’
பொருளாதார ஆய்வறிக்கையில் மானிய விலை காஸ் சிலிண்டர் பற்றி கூறியிருப்பதாவது:வீடுகளுக்கு மானிய விலையில் சமையல் காஸ் சிலிண்டர் வழங்குவதை நெறிமுறைப்படுத்த வேண்டும். வீடுகளுக்கு, ஆண்டுக்கு, 12 சமையல் காஸ் சிலிண்டர்கள் மானிய விலையில் தரப்
படுகின்றன. இதை, பத்தாக குறைத்தால் நல்லது. வீடுகள் மற்றும் வர்த்தக பயன்பாட்டுக்கு வழங்கப்படும் சமையல் காஸ் சிலிண்டர் மீதான வரிகளை முறைப்படுத்த வேண்டும்.
இவ்வாறு அதில் கூறப்பட்டுள்ளது.