உறுப்பினர் அந்தஸ்து ரத்து: அரபு லீக் அதிரடி : பொருளாதார தடைகள் பாயும் என எச்சரிக்கை

by **mmani** Mon Nov 14, 2011 9:12 am

"அரபு லீக்கில், சிரியாவின்
உறுப்பினர் அந்தஸ்து ரத்து செய்யப்படுகிறது. இன்னும் மூன்று நாட்களில்,
அரபு லீக் ஒப்பந்தத்தை சிரியா நடைமுறைப்படுத்தாவிட்டால், சிரியா மீது பல
பொருளாதாரத் தடைகள் விதிக்கப்படும்,' என, அரபு லீக் எச்சரிக்கை
விடுத்துள்ளது. அரபு லீக்கின் இந்த நடவடிக்கையால் கோபம் அடைந்த சிரியா
அதிபர் அசாத் ஆதரவாளர்கள், டமாஸ்கசில் உள்ள சவுதி அரேபிய தூதரகத்தை நேற்று
தாக்கி சேதப்படுத்தினர்.

8 மாதங்களாக... : சிரியாவில், அதிபர் பஷர் அல்
அசாத்திற்கு எதிரான போராட்டங்கள் கடந்த எட்டு மாதங்களுக்கும் மேலாக நடந்து
வருகின்றன. இப்போராட்டங்களில், ராணுவ வன்முறைக்கு, 3,500 பேர்
பலியாகியுள்ளதாக ஐ.நா., தெரிவித்துள்ளது.

அமைதி ஒப்பந்தம்: சிரியாவில் அமைதியைக் கொண்டு வரும்
முயற்சியில் ஈடுபட்டுள்ள அரபு லீக், ஒரு ஒப்பந்தத்தை தயாரித்தது. அதன்படி,
உடனடியாக ராணுவ வன்முறையைக் கைவிட வேண்டும். சிரியாவில் மக்களுக்கு
எதிராகக் கட்டவிழ்த்து விடப்பட்டுள்ள ராணுவம் வாபஸ் பெறப்பட வேண்டும்.
சிறைகளில் அடைக்கப்பட்டுள்ள அப்பாவிகள் விடுதலை செய்யப்பட வேண்டும். இரண்டு
வாரங்களில் அரசு மற்றும் எதிர்க்கட்சிகள் பேச்சு நடத்த வேண்டும்.
வெளிநாட்டு ஊடகங்களை சிரியாவுக்குள் அனுமதிக்க வேண்டும்.

ஒப்புதலை மீறிய ராணுவம்: முதலில் இந்த ஒப்பந்தத்திற்கு
சிரியா ஒப்புக் கொண்டது. கையெழுத்திட்டதாகக் கூறப்பட்ட மறுநாளே, ராணுவம்
மீண்டும் மக்கள் மீது தாக்குதல் நடத்தத் துவங்கியது. இதனால் அரபு லீக்கில்
இருந்து சிரியாவை நீக்கக்கோரி மக்கள் போராடத் துவங்கினர்.

அரபு லீக் கூட்டம் : இந்நிலையில், நேற்று முன்தினம்,
எகிப்து தலைநகர் கெய்ரோவில், அரபு லீக் கூடியது. மொத்தம், 22 நாடுகள்
இதில் உறுப்பினர்களாக உள்ளன. சிரியாவில் ஏற்பட்டுள்ள சிக்கலான நிலை
குறித்தும், சிரியா அரபு லீக்கின் ஒப்பந்தத்தை மீறியது குறித்தும்
விவாதிக்கப்பட்டது.

இறுதியில், சிரியாவின் உறுப்பினர் அந்தஸ்தை நீக்குவது என முடிவு
செய்யப்பட்டது. லீக்கில் மொத்தம் உள்ள, 22 நாடுகளில்,சிரியாவின் உறுப்பினர்
அந்தஸ்து ரத்து செய்யப்படுவதற்கு, 18 நாடுகள் ஆதரவாகவும், மூன்று நாடுகள்
எதிராகவும் ஓட்டளித்தன. ஈராக் மட்டும் ஓட்டளிக்கவில்லை.

கடும் எச்சரிக்கை : இந்த முடிவை அறிவித்த கத்தார்
பிரதமர் ஹமாத் பின் ஜாசேம் அல் தானி, "சிரியாவின் உறுப்பினர் அந்தஸ்து
ரத்து செய்யப்படுகிறது. இன்னும் மூன்று நாட்களில் (நவம்பர் 16ம்
தேதிக்குள்) ஒப்பந்தம் நடைமுறைப்படுத்தப்பட வேண்டும். இல்லையெனில்,
பொருளாதார மற்றும் அரசியல் தடைகள் விதிக்கப்படும்' எனத் தெரிவித்தார்.

மகிழ்ச்சி, கோபம் : அரபு லீக்கின் இந்த முடிவு வெளியான
உடன், சிரியாவில் அதிபருக்கு எதிராகத் திரண்ட மக்கள் தங்கள்
மகிழ்ச்சியைத் தெரிவித்தனர். ஆனால், தலைநகர் டமாஸ்கசில் உள்ள சவுதி
அரேபியத் தூதரகம் மீது அதிபர் ஆதரவாளர்கள் நேற்று தாக்குதல் நடத்தினர்.
இந்த முடிவை ஐரோப்பிய யூனியன், அமெரிக்கா, பிரிட்டன் ஆகியவை வரவேற்றுள்ளன.

என்ன காரணம்? : சிரியா மீது அரபு லீக் உடனடியாகப்
பொருளாதாரத் தடைகளை விதிக்க முடியும் என்றாலும், தற்போதைக்கு அந்நாட்டிற்கு
ஒரு கடும் எச்சரிக்கையை மட்டும் விடுத்தால் போதுமானது என்று கருதியதால்
தான், மூன்று நாட்கள் அவகாசம் கொடுத்துள்ளது.

அமெரிக்காவின் வேலை : அரபு லீக்கிற்கான சிரிய தூதர்
யூசுப் அகமது கூறுகையில், "அரபு லீக் ஒப்பந்தத்தை சிரியா ஏற்கனவே
நடைமுறைப்படுத்தி விட்டது. அதன் பின்னும், 125 போலீசார் போராட்டத்தில்
பலியாகியுள்ளனர். இந்த நீக்கம் சட்டவிரோதமானது. இதன் பின்னணியில்
அமெரிக்கா உள்ளது. இந்த முடிவு, லிபியாவை போல சிரியாவிலும் அன்னிய
ஊடுருவலுக்கு வழிவகுக்கிறது' என்றார்.