காங்., ஆட்சியில் ரூ.30 லட்சம் கோடி சுருட்டல்?

by **Tamil** Tue Feb 16, 2016 5:33 am

காங்., ஆட்சியில் ரூ.30 லட்சம் கோடி சுருட்டல்?
புதுடில்லி கடந்த, 2004 - 2013ம் ஆண்டுகளில், காங்கிரஸ் தலைமையிலான கூட்டணி அரசு, மத்தியில் ஆட்சியில் இருந்தபோது, இந்தியாவில் இருந்து, 30 லட்சம் கோடி ரூபாய்க்கும் அதிமான கறுப்பு பணம், வெளிநாடுகளுக்கு சென்றுள்ளதாக, 'பகீர்' தகவல் வெளியாகியுள்ளது.

இது குறித்த விவரங்களை தரும்படி, வரிகள் புலனாய்வு இயக்குனரகத்தை, சுப்ரீம் கோர்ட் நியமித்த சிறப்பு புலனாய்வு குழு வலியுறுத்தியுள்ளது. இந்தியாவில் கணக்கில் காட்டப்படாத, பல லட்சம் கோடி ரூபாய், ஆண்டுதோறும் வெளிநாட்டு வங்கிகளில் பதுக்கி வைக்கப்படுகிறது. இது குறித்து விசாரணை நடத்த, சிறப்பு புலனாய்வு குழுவை,

சுப்ரீம் கோர்ட் அமைத்துள்ளது.இந்த குழு, வரி முறைகேடு தொடர்பான புகார்களை விசாரணை செய்யும் வரிகள் புலனாய்வு இயக்குனரகத்திடம், சில தகவல்களை கோரியுள்ளது; அதில், கடந்த, 2004 -2013 வரையிலான காலத்தில், பெருமளவு கறுப்பு பணம், வெளிநாடுகளுக்கு கொண்டு செல்லப்பட்டுள்ளது குறித்து கேள்வி எழுப்பியுள்ளது.

இதற்கு ஆதாரமாக, நிதி தொடர்பான தகவல்களை சேகரித்து வரும், அமெரிக்காவைச் சேர்ந்த, 'குளோபல் பைனான்ஸ் இண்டகிரிட்டி' அமைப்பு வெளியிட்டுள்ள அறிக்கையை சுட்டிக் காட்டியுள்ளது. அந்த அறிக்கையில், குறிப்பிட்ட ஆண்டுகளில், 30 லட்சம் கோடி ரூபாய் மதிப்பிலான, கணக்கில் காட்டப்படாத கறுப்பு பணம் வெளிநாடுகளுக்கு கொண்டு செல்லப்பட்டதாக குறிப்பிடப்பட்டுள்ளது. 'இந்த தகவல் உண்மையா; குறிப்பிடப்பட்டுள்ள தொகை சரியானதா' என்பதை விசாரித்து அறிக்கை அளிக்கும்படி, வரிகள் புலனாய்வு இயக்குனரகத்தை, சிறப்பு புலனாய்வு குழு கேட்டுக் கொண்டுள்ளது. அந்த தகவல் கிடைத்த பின், தேவையான நடவடிக்கையை எடுக்கவுள்ளதாக சிறப்பு புலனாய்வு குழு தெரிவித்துள்ளது.

இந்தியாவுக்கு 4வது இடம்:

கறுப்பு பண பதுக்கல் நாடுகளின் பட்டியலில், இந்தியா, நான்காவது இடத்தில் இருப்பதாக, குளோபல் பைனான்ஸ் இண்டகிரிட்டி அமைப்பு கூறியுள்ளது. கடந்த, 2004 - 2013ம் ஆண்டு இடைவெளியில், ஆண்டுதோறும், சராசரியாக, மூன்று லட்சம் கோடி என்ற அளவில் இந்தியாவில் இருந்து, கறுப்பு பணம் வெளிநாடுகளுக்கு எடுத்துச் செல்லப்பட்டுள்ளதாக, அந்த அமைப்பு கூறியுள்ளது.