உடலோடு ஒட்டி உறவாடி…

by **Tamil** Fri Jan 01, 2016 8:06 am

உடலோடு ஒட்டி உறவாடி…

சர்க்கரையை மிகக் குறைவாகச் சாப்பிடுங்கள். ஏற்கனவே நீங்கள் மிகவும் இனிப்பானவர்தான்!

சுகர் ஸ்மார்ட்
நீரிழிவு கட்டுப்பாடு எப்படி இருக்கிறது என இப்போது இன்னும் துல்லியமாகவும் எளிதாகவும் அறிய முடியும். மருத்துவத் தொழில்நுட்ப வளர்ச்சியின் பலன் இது! விளக்கு கிறார் நீரிழிவு சிறப்பு மருத்துவர் வி.மோகன்ஏஜிபி எனப்படும் ஆம்புலேட்டரி குளுக்கோஸ் புரஃபைலர் (Ambulatory Glucose Profiler) என்றழைக்கப்படும் இச்சாதனம், நம் ரத்த சர்க்கரை அளவை துல்லியமாக பதிவு செய்து, மருத்துவர்களுக்கு அறியத் தரும்.
சற்றே பெரிய நாணயம் போன்று காணப்படும் ஒருவகை பேட்ச் இது. இதை மேல் கை பகுதியில் ‘சபக்’ என்று ஒட்டிக் கொண்டால் போதும்… சென்சாராகவும் செயல்படக்கூடிய இந்த பேட்ச், ஒவ்வொரு 15 நிமிடங்களுக்கும் ரத்த சர்க்கரை அளவை கணக்கிட்டுக்கொண்டே இருக்கும். அதே நேரத்தில், நம் உடலோடு ஒட்டி உறவாடும் இந்த பேட்ச்சை நாம் கண்டுகொள்ள வேண்டியதே இல்லை. வழக்கம் போல நீராடலாம்… உடற்பயிற்சி செய்யலாம்… பணிக்கும் செல்லலாம்… பாதகம் ஏதும் இல்லை! அந்த பேட்ச் மனம் தளராது 14 நாட்களுக்குத் தொடர்ந்து கடமை ஆற்றிக்கொண்டே இருக்கும்.
மருத்துவரிடம் உள்ள ஏஜிபி சென்சார் அருகில் உங்கள் கையைக் கொண்டு சென்றாலே போதும்… அவருடைய கம்ப்யூட்டரில் கிராப் படங்களாகவும் டேட்டாக்களாகவும் நமது ரத்த சர்க்கரை அளவு சட்டென பதிவாகி விடும். வண்ணங்கள், நேரப் பதிவுகள் என விதவிதமாக ஆராய்ந்து காட்டும் திரையில் இருந்து பல தகவல்களை மருத்துவர் பெற முடியும். குறிப்பாக எந்த நேரத்தில் குளுக்கோஸ் எகிறுகிறது என அறிய முடிவதால், அதற்கேற்ப சிகிச்சையை தொடர முடியும். எப்போது தாழ் சர்க்கரை ஏற்படுகிறது என அறிய முடிவதால், உணவு முறையிலும் மாற்றம் செய்ய முடியும்.
உடற்பயிற்சியை எந்த நேரத்தில் மேற்கொண்டால், அது நமக்கு பலன் அளிக்கிறது என்பதையும் ஆராய முடியும். சிலருக்கு மாலையில் உடற்பயிற்சி செய்தால், நல்ல பலன் கிடைக்கும். அதுபோன்ற நுட்பமான விஷயங்களைக் கூட, இச்சாதனம் அளிக்கும் தகவல்களிலிருந்து தீர்மானிக்க முடியும்.நாம் ஒரு ஊரிலும், மருத்துவர் இன்னொரு ஊரிலும் இருந்தால் கூட இச்சாதனத்தைப் பயன்படுத்த முடியும். 14 நாட்கள் நிறைவடைந்த பிறகு, ஒட்டியிருந்த பேட்ச்சை எடுத்து, அவருக்கு கூரியர் செய்தாலே போதும்.

காலம் காலமாக நாம் ஆய்வகங்களில் செய்துகொள்ளும் ஃபாஸ்ட்டிங், போஸ்ட் பெரண்டியல் மற்றும் HbA1c சோதனைகளை விடவும், குளுக்கோமீட்டர் துணை கொண்டு நாம் வீட்டிலேயே எடுக்கும் சோதனைகளை விடவும், ஏஜிபி சோதனையானது மிக வித்தியாசமானது… மிகத் துல்லியமானது… மிக நுட்பமானது… நீரிழிவாளர்களுக்கும் மருத்துவர்களுக்கும் பன்மடங்கு பலன் தரக்கூடியது. சுருக்கமாகச் சொல்வதானால், ஒரு போட்டோ எடுப்பதற்கும், ஒரு வீடியோ எடுப்பதற்குமான வித்தியாசம்தான் இது. போட்டோ என்பது ஒரு வினாடிப் பதிவு. வீடியோ என்பது முழுமையான பதிவு.
அதில் ஏராளமான விஷயங்கள் கொட்டிக் கிடக்கும். அதுபோலவே ஏஜிபி தொழில்நுட்பம் நமக்குப் பயன்படுகிறது. நமது உடலில் என்ன நடக்கிறது என்பதை நாம் பூரணமாக அறியும் போது, நீரிழிவுக் கட்டுப்பாட்டில் அதிக அக்கறை ஏற்படுவதும் இயல்புதானே? நீரிழிவுக்கு முந்தைய நிலையில் இருப்போர் (ப்ரீ-டயாபடீஸ்), கர்ப்ப கால நீரிழிவு உள்ள பெண்கள், அறுவை சிகிச்சைக்காகக் காத்திருப்போர் உள்ளிட்டோருக்கு இந்தச் சாதனம் அளிக்கக்கூடிய பலன்கள் இன்னும் அதிகம்.
இதுவரை ஐரோப்பாவில் மட்டுமே கிடைத்து வந்த ஏஜிபி தொழில்நுட்பம், ஆசியாவிலேயே முதன்முறையாக இந்தியாவுக்குத் தான் வந்திருக்கிறது. இப்போது இதன் விலை சற்று அதிகம்தான். மருத்துவர் பயன்படுத்தக்கூடிய ரீடர் ரூ. 5 ஆயிரத்துக்கும், நீரிழிவாளர் பயன்படுத்தக்கூடிய பேட்ச் ரூ.1999க்கும் விற்கப்படுகிறது. இதன் விலை இன்னும் குறையும் போது, நீரிழிவு கண்காணிப்பில் ஒரு புரட்சியையே ஏற்படுத்தும்!
Eat less sugar, too. Already very inippanavartan you!
-தமிழால்-