ரயில் விபத்தில் சதி : சி.பி.ஐ., விசாரணை கேட்கிறார் மம்தா பானர்ஜி

கோல்கட்டா : "மேற்கு
வங்கத்தில் நடந்த ரயில் விபத்து, எனக்கு எதிராக திட்டமிட்டு நடத்தப்பட்ட
அரசியல் சதி. இதன் பின்னணியில் உள்ளவர்களை வெளிஉலகுக்கு அடையாளம் காட்டும்
வகையில், இந்த விபத்து குறித்து சி.பி.ஐ., விசாரணைக்கு உத்தரவிட வேண்டும்'
என, ரயில்வே அமைச்சர் மம்தா, பரபரப்பு புகார் தெரிவித்துள்ளார்.
இதற்கிடையே, விபத்தில் பலியானோரின் எண்ணிக்கை 114 ஆக அதிகரித்துள்ளது.

மேற்கு வங்கம், மிட்னாபூர்
மாவட்டத்தில், ஹவுராவில் இருந்து மும்பை சென்ற ஞானேஸ்வரி எக்ஸ்பிரஸ்
ரயில், நேற்று முன்தினம் அதிகாலை நக்சலைட்களின் நாசவேலை காரணமாக விபத்தில்
சிக்கியது. இதில், 78 பேர் பலியானதாக அதிகாரிகள் தெரிவித்தனர். மீட்புப்
பணிகள் நேற்றும் தொடர்ந்தன. விபத்தில் அதிகம் சேதமடைந்த எஸ்-5, எஸ்-6
பெட்டிகளில் இருந்து, மேலும் சில உடல்கள் மீட்கப்பட்டன. இதையடுத்து,
விபத்தில் பலியானோரின் எண்ணிக்கை 114 ஆக அதிகரித்துள்ளது.

இதுகுறித்து ரயில்வே அதிகாரிகள் கூறியதாவது:
மீட்புப் பணிகள் தொடர்ந்து நடக்கின்றன. விபத்தில் முற்றிலும் உருக்குலைந்த
எஸ்-5 பெட்டியில், மேலும் சில உடல்கள் உள்ளது தெரியவந்துள்ளது. இந்த உடல்
களை மீட்பது சிரமமாக உள்ளது. இதனால், விபத்தில் பலியானோரின் எண்ணிக் கை
மேலும் அதிகரிக்கக் கூடும். சேதமடைந்த பெட்டிகளை தண்டவாளத்தில் இருந்து
அப்புறப்படுத்தும் பணியும், தண்டவாளத்தை சீரமைக்கும் பணியும் இன்னும்
முடிவடையவில்லை. இந்த வழித்தடத்தில் ரயில் போக்குவரத்து இயங்குவது
தாமதமாகும். இந்த வழித்தடத்தில் செல் லும் ரயில்கள் ரத்து செய்யப்பட்டுள்
ளன. சில ரயில்கள் வேறு பாதையில் திருப்பி விடப்பட்டுள் ளன. இவ்வாறு
அதிகாரிகள் கூறினார்.

மேற்கு வங்க மாநில உள்துறை
செயலர் சமர் கோஷ் கூறுகையில், ""தண்டவாளத்தில் இருந்த "பிஷ் பிளேட்'கள்
அகற்றப்பட்டதே, விபத்துக்கான காரணம் என, முதல்கட்ட விசாரணையில்
தெரியவந்துள்ளது,'' என்றார். மருத்துவமனையில் பதட்டம்: ரயில் விபத்தில்
உயிரிழந்தவர்களின் உடல்கள் அடையாளம் காணப்பட்டு, அவர்களின் உறவினர்களிடம்
ஒப்படைக்கப்பட்டு வருகின்றன. அடையாளம் காணப்படாத உடல்கள், மிட்னாபூர்
மருத்துவக் கல்லூரி மருத்துவமனையில் உள்ள பிணவறையில் வைக்கப்பட்டுள்ளன.
விபத்தில் அதிகமானோர் பலியாகி இருப்பதால், அனைத்து உடல்களையும் அங்கு
வைக்கும் அளவுக்கு போதிய வசதி இல்லை. இதனால், உறவினர்கள் அதிருப்தி
அடைந்துள்ளனர். மருத்துவமனையில் பதட்டமான சூழல் காணப்படுகிறது. விபத்தில்
காயமடைந்த மூன்று வயதுக்குட்பட்ட குழந்தைகள் சிலரும், மருத்துவமனையில்
சிகிச்சை பெற்று வருகின்றனர். இவர்களுடன் ரயிலில் வந்த பெற்றோர் பலியாகி
விட்டதால், இந்த குழந்தைகளை யாரிடம் ஒப்படைப்பது என்ற குழப்பமும்
ஏற்பட்டுள்ளது. விபத்தில் தாயாரை பறிகொடுத்த அதிர்ச்சியில், ருப்சா என்ற
ஆறு வயது சிறுமிக்கு பேச்சு வரவில்லை.

விபத்தில் சிக்கி, சிறிய
காயத்துடன் உயிர் தப்பிய இரண்டு வயது குழந்தை, மிட்னாபூர் மருத்துவமனையில்
சிகிச்சை பெற்று வந்தது. இது யாருடைய குழந்தை என தெரியாமல், அதிகாரிகள்
குழப்பம் அடைந்தனர். இந்த குழந்தையின் புகைப்படம் "டிவி'யில்
ஒளிபரப்பப்பட்டது. இதையடுத்து, இந்த குழந்தையின் மாமா, மருத்துவமனைக்கு
வந்து அடையாளம் காட்டினார். அந்த குழந்தையின் பெயர் சவுகத் அலி என,
தெரியவந்தது.

மம்தா புகார்:
விபத்து குறித்து ரயில்வே அமைச்சர் மம்தா பானர்ஜி கூறியதாவது: இந்த ரயில்
விபத்து, எனக்கு எதிராக திட்டமிட்டு நடத்தப்பட்ட அரசியல் சதி. உள்ளாட்சி
தேர்தல் நடப்பதற்கு இரண்டு நாட்களே உள்ள நிலையில், விபத்து நடந்துள்ளது
பெரும் சந்தேகத்தை ஏற்படுத்தியுள்ளது. அரசியல் ஆதாயத்துக்காக ஒரு சிலர்,
இந்த விபத்தின் பின்னணியில் இருந்துள்ளனர். இவர்களை வெளியுலகுக்கு
அடையாளம் காட்ட வேண்டுமெனில், இந்த விபத்து குறித்து சி.பி.ஐ.,
விசாரணைக்கு உத்தரவிட வேண்டும். என் கோரிக்கையை மத்திய அரசு ஏற்றுக்
கொண்டுள்ளது. "பிஷ் பிளேட்'கள் அகற்றப்பட்டதால் விபத்து நடந்ததாக
கூறப்படுவது தவறு. விபத்து நடந்தவுடன் நான், மீட்புப் பணிகளை பார்வையிடச்
சென்றேன். அந்த நேரத்தில் சிலர் அரசியல் விளையாட்டுகளில் ஈடுபட்டனர்.
இவர்கள் அரசியல் நடத்துவதற்கு ரயில்வே தான் கிடைத்ததா? இவ்வாறு மம்தா
கூறினார். இதற்கிடையே, விபத்து தொடர்பாக போலீசார் பதிவு செய்துள்ள முதல்
தகவல் அறிக்கையில், அடையாளம் தெரியாத நபர்களின் சதி காரணமாக விபத்து
நடந்ததாக குறிப்பிடப்பட்டுள்ளது.

சதியா ?இல்லை விதியா ?
இப்படி பட்ட அரசியல்வாதிகளை,நாம் பெற்ற விதியா ?
இல்லை மொழிக்காக,மண்ணுக்காக போராடும்,குழுக்கள்
இப்படி பொதுமக்களை,பலிக்காடா செய்து வருவதை ,எப்படி
சொல்வது ?விதியா ,இவர்கள் செய்த சதியா ?

கேள்விகள் தான் இன்னும் ...............பதில் இல்லாமல்...............