கருவேலமரங்களால் காணாமல் போகும் கண்மாய்கள்!

மாநில அரசு நீர் உள்ள  ஏரிகள், கண்மாயில்   மண்ணைக்கொட்டி நீர்  நிலைகளை மூடுவதற்கு  முன்பே கண்மாய்களை அழிக்கும் வேலையை  கச்சிதமாகச்  செய்து வருவது கருவேல மரங்களே.  

விவசாயிகளிடம் இருந்து நிலத்தை பறிக்கும் மத்திய  அரசின் கொள்கையில்  தீவிரமாக இருப்பதும் கருவேல மரங்களே. கருவேல மரம்,  விளைநிலங்களில் உள்ள சத்துக்களை இழக்கச் செய்து அதனை மலடாக்கும் ஒரு ஆபத்தான மரம்.  

விவசாயிகளை மிரட்டும்  மத்திய, மாநில அரசின்  பணியினை எந்த ஒரு எதிர்ப்பும் இல்லாமல் செய்து வருவதும் கருவேல மரங்களே. பக்கத்துக்கு ஊருக்கு தண்ணீர்  கொடுத்தால் கூட  மறுப்பும், மறியலும் செய்யும்  கிராமத்தினர், சத்தமில்லாமல் கண்மாயில் உள்ள நீரினை காலி செய்யும் கருவேல மரத்தைக் கண்டு கொள்ளாமல் போனது  அறியாமை.
ஒரு பக்கம் அரசு கண்மாயை மூடி அரசு அலுவலகம்,பேருந்து நிலையம் என கட்டுவதும் மறுபக்கம் கரு வேல மர ஆக்கிரமிப்பில் கண்மாய்கள் காணாமல்  போவதும் தொடர் கதையாக தொடர்கிறது. வட இந்தியாவில் தார் பாலைவனம் ஓரங்களில்,  1872 ஆம் ஆண்டு ஆங்கிலேயர்களால் தூவப்பட்ட விதைகள் இன்று இந்தியா முழுதும் ஆக்கிரமித்து விட்டன.

ஆங்கிலேயர்கள் வெளியேறி 69 ஆண்டுகள் ஆனாலும், அவர்கள் விதைத்த கருவேல மரங்கள், இன்னமும் பல நூறு ஆண்டுகள் ஆனாலும் அழிக்க  முடியாத அளவிற்கு பெருகி விட்டன. 

தமிழகத்தில் காமராஜர் ஆட்சியில் கரு வேல மர விதைகள் தூவப்பட்டன. இந்தியாவில் அதிகமாக உள்ள ஒரே மர  இனம் கருவேலமரமாகத் தான் இருக்க முடியும். மழையை ஈர்த்து மண்ணுக்கு  கொடுக்கும் மர
வகைகளில்  மழையை  கெடுக்கும் ஒரே மரம் கருவேல மரமே. வறட்சியை வாரி வழங்கக்கூடிய,  விவசாயிகள்   விரும்பாத ஒரே மரம் கருவேல  மர இனம்  மட்டுமே. விவசாய அழிப்பில் முதலிடம் வகிக்கும் கருவேல மரத்தின்  ஆக்கிரமிப்பால், ஜாதிக் கலவரமும் பெருகும் என்பது விவசாய வீழ்ச்சி சொல்லும் உண்மை.
ராமநாதபுரம்,சிவ கங்கை,விருது நகர் மாவட்டங்களில் விவசாயம் பொய்த்துப் போனதால்   விளை நிலங்களில் கூட கரு வேல மரத்தை வளர்த்து மக்கள் பிழைக்கின்றனர்.  தென்   மாவட்டங்களின் வறட்சிக்கு முக்கியமான காரணம் கருவேல மரங்கள் என்றால் மிகையாகாது. இம்மரங்கள் நிலத்தடி நீர்மட்டத்தை அழிப்பதுடன்,  காற்றில் உள்ள ஈரப்பதத்தை அழிக்கும் திறன் கொண்டது. 

இந்த விஷ மரத்தின் பிடியில் வீணாகும் விவசாய நிலங்களில் சாகுபடி பரப்பளவு, ஆண்டுக்கு 2.5% குறைந்து வருவதாக வேளாண் ஆய்வுகள் தெரிவிக்கின்றன. சில ஆண்டுகளுக்கு முன் 10 செமீக்கு   ஒரு மரம்  என்றிருந்த நிலையில், தற்போது 4 செமீக்கு   ஒரு மரம் என்ற கணக்கில்  கரு வேலமரக்காடுகள்   பறந்து விரிந்து வறட்சியை கொடுத்து வருகின்றன. தமிழகத்தில் ராமநாதபுரம் மாவட்டத்தில்   மட்டும் 42,000  ஹெக்டர் பரப்பில் கருவேல மரம்  ஆக்கிரமித்துள்ளது.

விறகிற்காக  1950 ஆம் ஆண்டு, கருவேல மரத்தின் நச்சுத்தன்மை பற்றி தெரியாமல்  கொண்டு வந்து தூவிய கருவேல மர விதைகள்,   இன்று வரை மண்ணை விட்டு அகலவில்லை.  மழை   பெய்ய விடாமல் விரட்டும் ஒரே மரம் கரு வேல மரங்கள் மட்டுமே. அதோடு நில்லாமல்  இதன் வேர் நிலத்தடி நீரை விஷமாக மாற்றி விடுகிறது, இந்த மரத்தின் முள் விஷத்தன்மை கொண்டது. இதன் பக்கத்தில் வேறு எந்த செடியும் வளராது, தவிர இம்மரத்தில் எந்த பறவை இனங்களும் கூடுகட்டுவதும் இல்லை.

காரணம், இந்த சீமைக் கருவேல மரங்கள், பிராணவாயுவை மிக குறைந்த அளவே உற்பத்தி செய்கிறது. கரியமில வாயுவை மிக அதிக அளவில் வெளியிடுவதால் சுற்றுப்புற காற்று மண்டலமே நச்சுத் தன்மையாக மாறிவிடுகிறது. மண்ணை மலடாக்கும் இம் மரங்கள் விலங்குகளையும் விட்டு வைக்க வில்லை. இம் மரத்தின் கீழ் கட்டப்படும்  விலங்குகள் உஷ்ண   நோயாலும், மலட்டுத் தன்மையாலும்    
பாதிக்கப்படுகின்றன.

சமீபத்தில் காட்டில் இந்த மரத்தின் இலைகளை  உண்ட யானை ஒன்று இறந்து போனதாக அதிர்ச்சித் தகவலும் உண்டு.  
ஒரு கிராமத்திற்கு சராசரியாக 100 ஏக்கர் பரப்பளவில் கருவேல மரங்கள் இருப்பதாக வைத்துக்கொண்டால் தமிழகம் முழுவதுமுள்ள 12,620 கிராம  பஞ்சாயத்துக்களில் கரு வேல மர   ஆக்கிரமிப்பு மட்டும் சுமார்  12
லட்சத்து 62 ஆயிரம் ஏக்கர் வீணாகி வருகிறது.  இந்த வீணாகும் பரப்பில் பல லட்சம் பேருக்கு வேலை வாய்ப்பும்,  உணவு தானியங்கள்  உற்பத்தியும்  செய்ய முடியும்.

சென்ற ஆண்டு சுற்றுச் சூழல் ஆர்வலர்கள் வைகை ஆற்றின் கரை ஓரத்தில் கருவேல மரத்தை அகற்ற   தொடர்ந்த வழக்கில்,  கரு வேல மரத்தை அகற்ற மதுரை உயர் நீதிமன்ற கிளை  பிறப்பித்த உத்தரவின்   பேரில்,    அரசு வழக்கம்போல  மேம்போக்காக கண்ணுக்குத்  தெரிந்த இடங்களில் கருவேல மரத்தை வெட்டி "கணக்கு"  சொல்லி விட்டது.
கடந்த  ஆகஸ்ட்  10 ஆம் தேதி, மதுரை உயர் நீதி மன்றக் கிளை,  "தமிழகம் முழுவதுமுள்ள கரு வேல மரங்களை வேரோடு அகற்ற அரசின் தலைமைச் செயலர் ,வனத்துறை ,பொதுப்பணித்துறை செயலர்கள்
தனித் திட்டம் உருவாக்க வேண்டும் " என்ற  வரவேற்கத்தக்க உத்தரவை  பிறப்பித்தது.

கருவேல மரத்தை அழிக்க என்ன செய்யலாம்?

*விவசாய நிலங்களில் சிறு செடியாக உள்ளபோதே கரு வேல மரம் வளர்வதை தடுக்க முடியும். கஞ்சா செடியை விட பல ஆயிரம் மடங்கு நச்சுத் தன்மை கொண்டது இம்மரம். எனவே விறகிற்காக கூட இம் மரத்தை வளர்க்க அரசு தடை செய்ய வேண்டும். 

*கருவேல மரத்தை அரசு கண்மாய்களில்  வேரோடு  அழித்து புங்கை,வேம்பு போன்ற இயற்கை உரம் தரும் மரங்களை நட வேண்டும்.

*கரு வேல மர ஆக்கிரமிப்பில் உள்ள கண்மாய், ஆற்றுக் கரைகளில்  நீர் மருது,வேங்கை, செம்மரம் நடவு செய்து அரசுக்கு வருமானம் ஈட்டலாம்.
*கரு வேல மரத்தை அழிக்க  எந்திரங்களை  பயன்படுத்தினால் மட்டுமே வேரோடு அழிக்க முடியும் . கண்மாய்களை தூர் வாரி நீர்பிடிப்பை அதிகரித்தாலே கருவேல மரம் அழிந்து போகும் .

*கரு வேல மரத்தை அரசு மக்கள் மூலம் குறிப்பிட்ட விலைக்கு வாங்கினால் மக்களே கருவேல மரத்தை அகற்ற வாய்ப்புள்ளது.

*மாவட்ட அளவில் கண்மாய்களில் உள்ள கருவேல மரத்தை அழிக்க  அந்தந்தப் பகுதி கிராம் மக்களிடம் அரசு ஒப்பந்தம் மூலம் கண்மாய்களை பல பகுதிகளாக பிரித்து வேருடன் மரத்தை  அகற்ற நவீன திட்டம்
வேண்டும்.  அரசு ஒப்பந்ததாரர் மூலம் கண்மாய்களை சுத்தம் செய்வது  லஞ்சம் பெருக வாய்ப்பளிக்கும்.

*வங்கிகள் கிராமத்தினருக்கு வட்டி இல்லாமல் அடமானக்   கடன் கொடுத்து, கருவேல மரத்தை அழிக்கவும் பின் அரசிடம் வங்கிகள் பணம் பெறவும் செய்தால் கருவேல மரங்கள் விரைவில் அழியும். பல நூறு ஏக்கர் பரப்பளவில் உள்ள கண்மாய்களையும், ஏரிகளையும் வனத்துறை உதவியால் மழை தரும் மரங்களை நடுவதால் விவசாயிகள் மகிழ்ச்சி நீடிக்கும் என்பதை விட  நீருக்கான போராட்டம் நீடிக்காது . 

கருவேல மரங்கள் காணாமல் போகுமா இல்லை நம்மை காக்கும் கண்மாய்களை  கருவேல மரங்கள்  காணாமல்  போகச் செய்யுமா என்பது நீதி மன்றத்தின் அடுத்த கட்ட நடவடிக்கையில் உள்ளது.

- எஸ்.அசோக்