சகாயம் குழுவில் மோசடி, கடத்தல்காரர்: பெண் புகாரால் பரபரப்பு!

மதுரை: கிரானைட் முறைகேடு குறித்து விசாரணை செய்யும் ஐஏஎஸ் அதிகாரி சகாயத்தின் பாதுகாப்புக் குழு தலைவர் மீது பெண் ஒருவர் கூறியுள்ள கடத்தல் மற்றும் மோசடி புகாரால் பரபரப்பு ஏற்பட்டுள்ளது.

கிரானைட் முறைகேடுகளை விசாரிக்கும் அதிகாரி சகாயத்திடம் நேற்று மாலை வரை மொத்தம் 109 பேர் கிரானைட் நிறுவனங்கள் மீது புகார் அளித்தனர்.
புகார் கொடுத்தவர்களில் திருமங்கலத்தை சேர்ந்த ஹேமமாதா (35) என்பவரும் ஒருவர். தன் 7 வயது மகனோடு வந்து, சகாயத்திடம் புகார் கொடுத்து விட்டுத்திரும்பிய அவர், செய்தியாளர்களிடம் பேசுகையில், நான் கடந்த 2 வருடங்களுக்கு முன் என் கணவர், குழந்தைகளுடன் வசித்து வந்தேன். அப்போது என்னிடம் இருந்த 10 லட்சம் ரூபாயை ஒருவருக்கு கடனாக கொடுத்தேன். ஆனால் அவர் பணத்தை திருப்பித் தராமல் ஏமாற்றினார். இதுகுறித்து மேலூர் காவல்துறையில் புகார் செய்யச் சென்றேன். அங்கு இருந்த ஒருவர் எனக்கு உதவி செய்வதாக கூறினார். அவரை நம்பி, நான் கடன் கொடுத்த விவரத்தை தெரிவித்தேன்.

அந்த விவரங்களை அறிந்து கொண்ட அவர், என்னிடம் கடன் பெற்றவரை மிரட்டி பணத்தை வாங்கிக் கொண்டார். ஆனால் அந்தப் பணத்தில் ஒன்றரை லட்சத்தை இன்ஸ்பெக்டருக்கு கொடுத்துவிட்டு மீதிப்பணத்தை அவர் சுருட்டிக் கொண்டார். இதை அறிந்த நான், அவரிடம் பணத்தை கேட்டேன். ஆனால் அவர் என்னை ஏமாற்றிவிட்டார். மேலும் அவர் என் கணவரை கடத்திச் சென்றுவிட்டார். 2 ஆண்டுகளாக என் கணவர் எங்கிருக்கிறார் என்பது தெரியவில்லை.

இதுகுறித்த வழக்கு உயர் நீதிமன்றத்தில் நிலுவையில் உள்ளது. காவல் நிலையத்திலும் பல்வேறு வழக்குகள் நிலுவையில் உள்ளன. அவ்வாறு இருக்கையில், கிரானைட் முறைகேடு குறித்து விசாரணை செய்யும் அதிகாரி சகாயத்தின் பாதுகாப்புக் குழு தலைவர் என்ற பெயரில் அவர் செயல்படுவது ஏற்கத்தக்கதல்ல. அவரைப்பற்றி அதிகாரி சகாயத்திடம் புகார் செய்துள்ளேன். அவர் உரிய நடவடிக்கை எடுத்து என் கணவரையும், பணத்தையும் மீட்டுத்தர வேண்டும்" என்று கூறினார்.

படங்கள்: இ.ஜெ.நந்தகுமார்