ஜெ. ஜாமின் மனு மீது சுப்ரீம் கோர்ட்டில் 17ம் தேதி விசாரணை: பிரபல வழக்கறிஞர் பாலிநாரிமன் ஆஜராகிறார்

by **mmani** Tue Oct 14, 2014 11:59 am

சொத்து குவிப்பு வழக்கில் தண்டனை பெற்ற, அ.தி.மு.க., பொதுச் செயலர் ஜெயலலிதா, ஜாமின் கோரி, உச்ச நீதிமன்றத்தில் தாக்கல் செய்த மனு, வரும் 17ம் தேதி, விசாரணைக்கு வருகிறது. அவரது சார்பில், பிரபல வழக்கறிஞர் பாலி நாரிமன் ஆஜராகிறார்.

சொத்து குவிப்பு வழக்கில், நான்கு ஆண்டு சிறைத் தண்டனை பெற்ற ஜெயலலிதாவுக்கும், அவருடன் தண்டனை பெற்ற சசிகலா, சுதாகரன் மற்றும் இளவரசிக்கும், ஜாமின் வழங்க, கர்நாடக உயர் நீதிமன்றம் மறுத்து விட்டது. இதையடுத்து, கடந்த வியாழக்கிழமை ஜெயலலிதாவும், வெள்ளிக்கிழமை மற்ற மூன்று பேரும், ஜாமின் கோரி, உச்ச நீதிமன்றத்தில் மனு தாக்கல் செய்தனர். இந்த மனுக்கள், எப்போது அடுத்த கட்டத்தை நோக்கி நகரும் என்ற எதிர்பார்ப்பு இருந்த நிலையில், சனி மற்றும் ஞாயிறு என, வார விடுமுறைக்கு பின், உச்ச நீதிமன்றம் நேற்று கூடியது.
ஜெ. ஜாமின் மனு மீது சுப்ரீம் கோர்ட்டில் 17ம் தேதி விசாரணை: பிரபல வழக்கறிஞர் பாலிநாரிமன் ஆஜராகிறார் Gallerye_235241499_1091150

ஜெ. ஜாமின் மனு மீது சுப்ரீம் கோர்ட்டில் 17ம் தேதி விசாரணை: பிரபல வழக்கறிஞர் பாலிநாரிமன் ஆஜராகிறார் Gallerye_235241499_1091150

நடந்தது என்ன?
அப்போது, ஜெயலலிதாவின் சார்பில், மூத்த வழக்கறிஞர் பாலி நாரிமனும், மற்ற மூவர் சார்பில், மூத்த வழக்கறிஞர் சுஷில்குமாரும் ஆஜராக வந்திருந்தனர். அவர்களுடன் அ.தி.மு.க., சட்டக்குழுவும் வந்திருந்தது.கோர்ட் நடவடிக்கைகள் சரியாக, 10:30 மணிக்கு துவங்கி, தலைமை நீதிபதி தத்து தலைமையிலான, நீதிபதிகள் சிக்ரி, லோகூர் அடங்கிய அமர்வு, தன் அலுவல்களை ஆரம்பித்தது. முதல் ஆளாக, மூத்த வழக்கறிஞர் பாலி நாரிமன் எழுந்து, “ஜெயலலிதாவுக்கு ஜாமின் வழங்க, கர்நாடக உயர் நீதிமன்றம் மறுத்து உள்ளது. எனவே, உச்ச நீதிமன்றத்தில், மனு தாக்கல் செய்துள்ளோம். ஜாமின் மனுவை, இந்த வாரத்திற்குள் விசாரணைக்கு எடுத்துக் கொள்ள வேண்டும்,'' என்றார்.

மனுவை வாங்கிப் பார்த்த, தலைமை நீதிபதி தத்து, அருகில் இருந்த நீதிபதி லோகூருடன், சில வினாடிகள் பேசிய பின், நாரிமனைப் பார்த்து, 'வெள்ளிக்கிழமை?' என்று, ஒரே ஒரு வார்த்தை கேட்டார். அதைக் கேட்ட நாரிமனும், தேதி வாங்கிய திருப்தியுடன் அமர்ந்தார்.அடுத்ததாக, வழக்கறிஞர் சுஷில் குமாரும் தன் பங்கிற்கு, சசிகலா உட்பட, மூவரின் ஜாமின் மனுக்கள் குறித்து குறிப்பிட்டார். 'ஒரே வழக்குதானே' என, தலைமை நீதிபதி கேட்க, அதற்கு சுஷில்குமார் தலையசைக்க, “அப்படியெனில், எல்லா மனுக்களையும், மொத்தமாக எடுத்துக் கொள்ளுங்கள்,” என, உத்தரவிட்டார். ஐந்து நிமிடங்களில், இவை எல்லாம் நடந்து முடிந்தன.

ஒரே வார்த்தை ஓகே:ஜாமின் மனுவை,

அவசரமாக ஏன் எடுத்துக் கொள்ள வேண்டும் என்பது பற்றியோ, அதன் முக்கியத்துவம் பற்றியோ, பாலி நாரிமன் எடுத்துரைக்க வில்லை. 'வெள்ளிக்கிழமை?' என, தலைமை நீதிபதி, பதிலோடு சேர்ந்த கேள்வியாக கேட்டாலும், இன்றோ அல்லது நாளையோ அல்லது நாளை மறுநாளோ, ஜாமின் மனுவை விசாரணைக்கு எடுத்துக் கொள்ளும்படியும், மனுதாரர் உடல்நிலை, மோசமாக உள்ளதென்றும் கோரிக்கை வைக்கலாம்.இதற்கெல்லாம், மனுதாரருக்கு உரிமை உள்ளது. இருந்தும், ஜெயலலிதா மற்றும் மூன்று பேர் சார்பில் ஆஜரான வழக்கறிஞர்கள், எந்தக் கோரிக்கையையும் வைக்கவில்லை.எனவே, வெள்ளிக்கிழமையான, வரும் 17ம் தேதி தான், ஜெயலலிதா மற்றும் மூன்று பேர் தாக்கல் செய்த, ஜாமின் மனுக்கள் மீதான விசாரணை நடைபெற உள்ளது. அன்றைய தினமும், அவருக்கும், மற்றவர்களுக்கும் ஜாமின் கிடைக்கவில்லை எனில், தீபாவளிக்கு, ஜெயலலிதா சிறையிலேயே இருக்க நேரிடும். ஏனெனில், வெள்ளிக்கிழமைக்கு பின், தொடர்ச்சியாக ஒருவாரத்திற்கு, உச்ச நீதிமன்றத்திற்கு விடுமுறை. அதன்பின், 27ம் தேதி தான் கூடும். அதன்பிறகே, ஜாமின் மனு மீதான முடிவுகள் வெளியாகும்.

'தமிழக சிறைக்கு மாற்ற ஆட்சேபனையில்லை': பெங்களூரு: ''அ.தி.மு.க., பொதுச் செயலர் ஜெயலலிதாவை, கர்நாடக சிறையிலிருந்து, தமிழக சிறைக்கு மாற்றும்படி, நீதிமன்றம் மூலமாக வேண்டு கோள் விடுத்தால், அதற்கு கர்நாடக அரசு எந்த ஆட்சேபனையும் தெரிவிக்காது,'' என, அம்மாநில உள்துறை அமைச்சர் ஜார்ஜ் தெரிவித்து உள்ளார்.

பெங்களூரில், செய்தி நிறுவனம் ஒன்றுக்கு பேட்டி அளித்த அவர், மேலும் கூறுகையில், ''இந்த விவகாரம் தொடர்பாக, தமிழக அரசுடன் நாங்கள் பேச வேண்டியதில்லை. ஜெயலலிதாவை தமிழக சிறைக்கு மாற்ற வேண்டும் எனில், அம்மாநில அரசு தான் கோரிக்கை விடுக்க வேண்டும். இதுதொடர்பாக, கர்நாடக உயர்
Advertisement

நீதிமன்றத்திலோ அல்லது உச்ச நீதிமன்றத்திலோ, அவர்கள் மனு தாக்கல் செய்ய வேண்டும்,'' என்றார்.

'ஓரல் மென்ஷனிங்' என்றால் என்ன?
உச்ச நீதிமன்றத்தில், ஜாமின் மனு தாக்கல் செய்யப்பட்டது முதல், ஜெயலலிதா சார்பில், ஆஜராகப்போவது யார் என்ற கேள்வியும், அவசர மனுவாக விசாரிக்கும்படி, கோரிக்கை வைக்கப்படுமா என்ற எதிர்பார்ப்பும் இருந்தது. அவசர மனுவாக விசாரிக்கும்படி, தலைமை நீதிபதியிடம் சென்று, வாய்மொழியாக கோரிக்கை வைப்பதற்கு, 'ஓரல் மென்ஷனிங்' என்று பெயர். கோரிக்கையை ஏற்பதும், மறுப்பதும், தலைமை நீதிபதியின் உரிமை. வெள்ளி மற்றும் திங்கட்கிழமைகளில் மட்டுமே, இதைச் செய்திட முடியும்.கடந்த வியாழக்கிழமை, ஜெயலலிதா சார்பில் மனு தாக்கல் செய்ததும், மறுநாளான வெள்ளிக்கிழமை காலையிலேயே, இதே வாய்மொழி கோரிக்கையை, தலைமை நீதிபதியிடம் வைத்திருக்கலாம்.ஆனால், அன்று தலைமை நீதிபதியிடம், அ.தி.மு.க., சட்டக்குழு, எந்தக் கோரிக்கையும் வைக்கவில்லை. உச்ச நீதிமன்றத்திற்கு வந்திருந்த அந்தக் குழுவினர், எதுவும் பேசாமல் சென்று விட்டனர்.அதன்பின், ஞாயிற்றுக்கிழமை மாலையில் தான், ஜெயலலிதா சார்பில்,பாலி நாரிமன் ஆஜராகப் போகிறார் என்றும், திங்கட்கிழமை (நேற்று) காலையில் தான், அவசர மனுவாக விசாரிக்கும்படி கோரிக்கை விடுக்கப் போகிறார் என்றும் தகவல்கள் கசிந்தன. அதன்படியே, நேற்று கோரிக்கை வைக்கப்பட்டது.
-தினமலர் -