நாடுகடந்த அரசாங்கம் தொடர்பில் எச்சரிக்கையுடன் இருங்கள்: ஐரோப்பிய யூனியனுக்கு

நாடு
கடந்த தமிழீழ அரசாங்கத்தை உருவாக்கும் விடுதலைப் புலிகளின் முயற்சிகளுக்கு
அரசியல் ரீதியாகவோ அல்லது குறியீட்டு ரீதியாகவோ எந்தவொரு ஆதரவையும் வழங்க
வேண்டாம் என்று ஐரோப்பிய அரசாங்கங்களை சிறிலங்கா வலியுறுத்தியிருக்கிறது.

"மேற்கு
நாடுகளில் தேசிய மற்றும் பிராந்திய மட்டங்களில் நாடு வாரியான
செயற்குழுக்களுடன் இணைந்து நாடு கடந்த தமிழீழ அரசு என அழைக்கப்படும் ஒன்றை
அமைப்பதற்கு விடுதலைப் புலிகள் முயற்சித்து வருகின்றனர்.

இந்த
முன்முயற்சியானது அந்த அமைப்பின் பயங்கரவாதம்சார் போராட்டத்தினை மீண்டும்
நிலைநிறுத்துவதற்கான தந்திரமேயன்றி வேறொன்றுமில்லை" என பெல்ஜியம்,
லக்சம்பேர்க் மற்றும் ஐரோப்பிய ஒன்றியத்திற்கான சிறிலங்காவினது தூதுவர்
ரவிநாத் ஆரியசிங்க கூறியுள்ளார்.



பெல்ஜியம் தலைநகரான பிரசெல்சில் [Brussels] இடம்பெற்ற
'பயங்கரவாத நிலைமைகள் மற்றும் ஐரோப்பிய ஒன்றியத்தின் போக்கு தொடர்பான
இராசதந்திர, பாதுகாப்பு மாநாடு-2010' [2010 Diplomatic Security
Conference on the Terrorism Situation and Trends in the EU] இல் உரை
நிகழ்த்திய போதே ஆரியசிங்க இந்தக் கருத்துகளை முன்வைத்திருக்கிறார்.

ஐரோப்பிய
ஒன்றிய நாடுகளில் பயங்கரவாத நிலைமைகள் மற்றும் அதன் போக்கு 2010 என்ற
யூரோப்போலின் கண்டறிதல்கள் தொடர்பாக இங்கு கலந்துரையாடப்பட்டிருந்தது.
இந்த
மாநாட்டில் அரசியல்வாதிகள், இராசதந்திரிகள், கல்விமான்கள், சட்ட
அமுலாக்கல், குற்றவியல் நீதித்துறை சமூக உறுப்பினர்கள் உட்பட பலர்
கலந்துகொண்டனர். பெல்ஜியம் வெளிவிவகார அமைச்சும் ஐரோப்பிய ஒத்துழைப்பு
பாதுகாப்பு அமைப்பும் இணைந்து இந்த மாநாட்டை ஏற்பாடு செய்திருந்தன.

தூதுவர் ஆரியசிங்க தொடர்ந்தும் தெரிவித்திருப்பதாவது,

"போலியான
தேர்தல்கள் ஊடாக உருவாக்கப்பட்ட இந்தக் கட்டமைப்புக்களில் புலிகளின்
உறுப்பினர்களும் அவர்களது செயற்பாட்டாளர்களுமே அதிகமுள்ளார்கள்.
சிறிலங்காவில் இயல்புநிலை ஏற்பட்டிருப்பதையடுத்து சிறிலங்காவிற்கு
இயல்பாகவே திருப்பி அனுப்பப்பட்டிருக்கவேண்டிய, சட்டவிரோதமாக மேற்கு
நாடுகளுக்குள் புகுத்திருக்கும் தமிழர்களைப் பயன்படுத்தியே இந்தக்
கட்டமைப்புக்கள் உருவாக்கப்பட்டுள்ளன."

"நிலைமையினைக் கொதி
நிலையில் வைத்திருப்பதன் மூலம் தாம் அடைக்கலம் புகுந்திருக்கும்
தொடர்புடைய நாடுகளில் தொடர்ந்தும் தங்கியிருப்பதற்காகவே இவர்கள் இந்த
முயற்சியினை மேற்கொள்கிறார்கள்" என தூதுவர் ரவிநாத் ஆரியசிங்க கூறுகிறார்.


"பயங்கரவாதம் தொடர்பான சிறிலங்காவினது போராட்ட வரலாறு இந்த
மாநாட்டிற்கு இருகாரணங்களின் அடிப்படையில் அறிவுறுத்தல் வழங்குவதாக
அமையும். கடந்த ஒருவருடத்திற்கு முன்னர் விடுதலைப் புலிகள் அமைப்பு இராணுவ
ரீதியில் தோற்கடிக்கப்பட்டதை அனைவரும் அறிவர். அதேநேரம், அந்த அமைப்பு ஓர்
பயங்கரவாத அமைப்பாக மாத்திரம் செயற்படவில்லை. மாறாக, பெரும்
எண்ணிக்கையிலான புலம்பெயர் தமிழர்களைத் தம்வசம் கவர்ந்திழுக்கும் வகையில்
வினைத்திறன் மிக்க கட்டமைப்பினை அவர்கள் உலகளாவிய ரீதியில்
கொண்டிருந்தார்கள் என்ற உண்மைக்கு நாம் அதிக கவனம் செலுத்தத்
தவறிவிட்டோம்" என்கிறார் ஆரியசிங்க.

"விடுதலைப் புலிகள் அமைப்பு
பலதரப்பட்ட கட்டமைப்புக்களைத் தன்னகத்தே கொண்டிருந்தது. அதனது சொத்துகள்
எங்கும் பரவிக்கிடப்பதோடு, புலிகளுடன் இணைந்திருந்த பல முன்னணி
அமைப்புகளூடாக அவர்கள் தற்போதும் இயங்குகின்றார்கள். அந்த அமைப்பினது
முதன்மைத் தலைவர்கள் இல்லாமல் போயிருக்கலாம். மையக் கட்டுப்பாட்டுப்
பிரிவும் குழம்பிப் போயிருக்கலாம்."

"ஆனால், அவர்களிடம் அதிகளவு
பணமும் நிபுணத்துவமும் தேவையான தொடர்புகளும் இன்னமும் நிறைந்துகிடக்கிறது
என்ற உண்மையினை நாம் மறந்துவிடக்கூடாது. குறிப்பாக உங்களது
பிராந்தியத்தில், அதாவது மேற்கு நாடுகளிலேயே புலிகள் இன்னமும்
செயற்பட்டுவருகிறார்கள் என்ற யதார்த்தத்தினை நாம் ஏற்றுக்கொள்ளவேண்டியது
அவசியமாகும்" என அவர் தொடர்ந்து கூறுகிறார்.

"மேற்கு நாடுகளில்
புலம்பெயர் தமிழர்களால் நிர்வகிக்கப்படுகின்ற 'தமிழ்ச் சோலை' போன்ற
பாடசாலைகள் அதிகரித்துக் காணப்படுகின்றன. பயங்கரவாதம் மற்றும் தியாகம்
போன்ற கருத்துக்களை இந்தப் பாடசாலைகள்தான் இளைய தலைமுறைத் தமிழர்கள்
மனங்களில் விதைக்கின்றன. நோர்வேயில் சிறிலங்காத் தூதரகம்
தாக்குதலுக்குள்ளான சம்பவத்தில் இதுபோன்றதொரு பாடசாலையின் மாணவர்கள்
குற்றவாளிகளாகக் காணப்பட்டிருப்பது இங்கு குறிப்பிடத்தக்கது."

'சைபர்
தாக்குதல்கள்' என அறியப்பட்ட இணைய வழிப் பயங்கரவாதச் செயற்பாடுகள்
இடம்பெற்று வருவதாகவும் ஆரியசிங்க குறிப்பிடுகிறார். விடுதலைப் புலிகளின்
ஆதரவாளர்களது இந்தச் செயற்பாடுகள் அனைத்தினதும் முத்தாய்ப்பாக தற்போது,
தமிழர்கள் பரந்து வாழும் மேற்கினது ஒவ்வொரு நாடுகளிலும் 'நாடு வாரியான
செயற்குழுக்கள்' அமைக்கப்பட்டிருப்பதோடு 'நாடு கடந்த தமிழீழ அரசு'
எனக்கூறும் ஒன்றினை ஏற்படுத்துவதற்காக முனைப்புக்களில் விடுதலைப் புலிகள்
அமைப்பு ஈடுபட்டு வருவதாக தூதுவர் ரவிநாத் ஆரியசிங்க தொடர்ந்து கூறுகிறார்.