மகனின் சாதனையை அறியாமல் மாரடைப்பால் கண் மூடிய தந்தை

மதுரை
: மதுரை மாவட்ட அளவில், பிளஸ் 2 தேர்வில் முதலிடம் பெற்ற மாணவர்
பார்த்தசாரதியின் தந்தை சத்தியமூர்த்தி, மகனின் சாதனையை அறிய முடியாமல்
நேற்று அதிகாலையில் மாரடைப்பால் இறந்தார்.

மதுரை புதூர் கற்பக நகரை சேர்ந்தவர்
சத்தியமூர்த்தி (57). இவர் காரைக்குடி அரசு போக்குவரத்துக் கழக அலுவலக
உதவியாளர். மனைவி தமிழ்ச்செல்வி (50). மதுரை இ.எஸ்.ஐ.,மருத்துவமனை
எழுத்தர். இவர்களது இரண்டாவது மகன் பார்த்தசாரதி, மதுரை சி.இ.ஓ.ஏ.,
மெட்ரிக் மேல்நிலை பள்ளியில் பிளஸ் 2 படித்தார்.இவர் நேற்று வெளியான பிளஸ்
2 பொதுத்தேர்வில் தமிழ் 192, ஆங்கிலம் 194, இயற்பியல் 195, வேதியியல் 199,
கம்ப்யூட்டர் அறிவியல் 199, கணிதம் 200, மொத்தம் 1179 மதிப்பெண்களுடன்,
மதுரை மாவட்ட அளவில் முதலிடம் பெற்றார்.தந்தை இறப்பு: முன்னதாக,
சத்தியமூர்த்திக்கு நேற்று அதிகாலை 4 மணிக்கு திடீர் மாரடைப்பு ஏற்பட்டு
மதுரை மீனாட்சி மிஷன் மருத்துவமனையில் அனுமதிக்கப்பட்டார். நினைவிழந்து,
அவர் தீவிர சிகிச்சை பிரிவில் சேர்க்கப்பட்டார். தேர்வு முடிவுகள் காலை 9
மணிக்கு வெளியானது. மாவட்டத்தில் முதலிடம் பெற்ற விவரம் காலை 9.15 மணிக்கு
பார்த்தசாரதிக்கு தெரிவிக்கப்பட்டது.

ஆசிரியர்கள், நண்பர்கள், உறவினர்கள் அவருக்கு
வாழ்த்துக்களை மொபைல் போனில் தெரிவித்தவாறு இருந்தனர். இதை தந்தைக்கு
தெரிவிக்கலாம் என, மகன் ஆர்வமாக இருந்தார். ஆனால், உடல் நிலையில்
முன்னேற்றம் ஏற்படாமல், மகனின் சாதனை செய்தியை கேட்காமலேயே பகல் 11
மணிக்கு தந்தை கண்மூடினார். பார்த்தசாரதியின் சாதனையை பகிர்ந்து கொள்ள
முடியாமல், குடும்பத்தினர், உறவினர்கள், நண்பர்கள், ஆசிரியர்கள் சோகத்தில்
ஆழ்ந்தனர்.

கலெக்டர் இரங்கல்: மதுரை
மாவட்ட மற்றும் மாநில அளவில் முதலிடம் பெற்ற மாணவர்களுக்கு பாராட்டு விழா
பகல் 12 மணிக்கு கலெக்டர் காமராஜ் தலைமையில் நடந்தது. இதில் பங்கேற்க
வருமாறு பார்த்தசாரதிக்கு அழைப்பு விடுத்தனர். அவர் தந்தை உடலை விட்டு
பிரிய மனமில்லாமல், பாராட்டு விழாவிற்கு வரவில்லை.

கலெக்டர், ''முதலிடம் பெற்ற மாணவர் பார்த்தசாரதியின் தந்தை சத்தியமூர்த்தியின் மறைவிற்கு ஆழ்ந்த இரங்கலை தெரிவித்துக் கொள்கிறோம்,'' என்றார்.

பேட்டிக்கு சென்ற நமது நிருபரிடம் கதறி அழுத பார்த்தசாரதி,''
தேர்வு முடிவுக்காக இன்று (நேற்று) எனது தந்தை விடுப்பு எடுத்திருந்தார்.
நேற்று முன்தினம் இரவு அவருடன் பேசிக் கொண்டிருந்தேன். அவர் எனக்கு
தன்னம்பிக்கை ஊட்டினார். என்னை பி.இ., படிக்க வைக்க ஆசைப்பட்டார்.
மகிழ்ச்சியை பகிர்ந்து கொள்ள அவர் இல்லை. நான் மாவட்ட அளவில் முதலிடம்
பெற்ற விவரத்தை அவர் கடைசி வரை அறிய முடியாமலேயே கண் மூடிவிட்டார்,''
என்று கூறி, தொடர்ந்து பேச முடியாமல் தேம்பி, தேம்பி அழுதார். பேட்டியை
மேலும் தொடராமல் கனத்த இதயத்துடன் நமது நிருபர் திரும்பினார்.
சத்தியமூர்த்தியின் உடல் சொந்த ஊரான ராமநாதபுரம் மாவட்டம், ஆர்.காவனூர்
கொண்டு சென்றனர். மூத்த மகன் வினாயகமூர்த்தி (25) பி.இ., படித்தவர்.
சென்னையில் ஒரு நிறுவனத்தில் பணிபுரிகிறார். thanks:dinamalat

மிகவும் வேதனையான விஷயம்

பார்த்தசாரதிக்கு எமது வாழ்த்துக்கள்
நானும் மதுரை-தான்