ரமதான் (ரம்ழான்) என்றால் என்ன? சிந்திக்க வேண்டியது என்ன?

ஆரம்பம்: 28 சூன்-28 சூலை2014
லைலத் அல் கதிர்-Lailat al Kadr -23./24. சூலை 2014
ஈதுல் பிதிர் -Eid al-Fitr – 28 சூலை 2014

இந்தத் திகதி மற்றும் நேரம் நாட்டுக்கு நாடும்,சில முஸ்லீம் பிரிவுகளைப் பொறுத்தும் சிறிது வேறுபடுகிறது. இந்து,கிறிஸ்தவ மதங்களிடையே பல பிரிவுகள்-sect- இருப்பது போல் இஸ்லாமிய மதத்திலும் ஏறக் குறைய 73 வரையிலான சிறு பிரிவுகள் உண்டு. அவற்றில் முக்கியமான பிரிவுகள் Sufi Muslims,Shi'ite Muslims,Sunni Muslims, Bahaiism , Wahhabis ,Shia Ahmadiyya, Alawis ,Druze என்பவையாகும்.

ரமதான்-ரம்ழான்- என்பது இஸ்லாமிய காலண்டரின் 9 வது மாதமாகும்.இது ramida / ar-ramad என்ற சொல்லில் இருந்து வந்ததாகும்.அதிக வெப்பம் என்பது பொருளாக இருந்தாலும்,நோன்பு இருப்பதன் மூலம்  பாவங்களை அழிக்கும் மாதமெனவும் சிலர் சொல்கிறார்கள். நோன்பு இருக்கும் இந்தப் புனித மாதத்தில்,பகலில் உணவு,தண்ணீர் அனைத்தையும் நீக்கி,இரவில் உணவு எடுக்கப்படுகிறது. இரவு எடுக்கப்படும் நேரம் பிறையை வைத்து  கணிக்கப்படுகிறது. அதனால் வாழும் நாட்டைப் பொறுத்து இந்த நேரம் வேறுபடுகிறது. இலங்கை,இந்தியா வில் வாழும் முஸ்லீம்களும்,அரபு நாடுகள்,அமெரிக்கா என வேறு நாடுகளில் வாழ்பவர்களும் வெவ்வேறு நேரத்தில் நோன்பைத் தொடக்கி முடிக்கிறார்கள்.

இந்த நோன்பின் போது அனுட்டிக்கும் விரதம் நிய்யாஹ் எனப்படுகிறது. அதாவது நோன்பு இருப்பவர்களின் எண்ணம், அல்லா என்ற இறைவனை நோக்கிய விரதமாக இருக்க வேண்டும். விரத முடிவில் தக்பீர் சொல்லி முடிக்கிறார்கள். இது நோன்பில் மட்டுமல்ல எப்போதும் சொல்லி முடிப்பது வழக்கம். தக்பீர் என்பது அல்லா என்ற இறைவனைத் தவிர உயர்ந்தது இந்த உலகில் வேறு எதுவுமில்லை என்பதாகும்.ஆண்கள் சத்தமாகவும்,பெண்கள் மனத்துக்குள்ளும் தக்பீர் ஓதுகிறார்கள்.
கி.பி 610 அளவில்(Hira cave, Mount Nur,  Mecca ) ரமதான் வரலாற்றில் பதியப்படுகிறது. அதாவது அன்றைய காலத்தில் மொகமதுவிற்கு கபிரியெல் என்ற வான தூதன்,குரான் ஓதப்படுவதை அறிவிப்பதுடன் தொடங்குகிறது.

குரானின் முதல் வாசகம் அல்லாவினால் சொல்லப்பட்ட மாதம் ரமதான் என நம்புகிறார்கள்.இந்த நோன்பு மாதமான ரமதான்,  முடிந்து, அடுத்த மாதமான சௌவால் மாதத்தின் (Shawwal ) முதல் நாளில் ஈதுல் பிதிர் (Eid al-Fitr) கொண்டாட்டங்களுடன் முடிவடைகிறது.

லைலது கதிர் என்ற இரவு என்பது,இறைவனால் முகமதுவிற்கு சொல்லப்பட்ட இரவு என ஒரு பகுதியினரும்,வேறு சிலர் இரண்டு பகுதியாக சொல்லப்பட்ட குரானில் முதற் பகுதி ஓதப்பட்ட இரவு என்றும் சொல்கிறார்கள்.

//ரமளான் மாதம் எத்தகையதென்றால் அதில் தான் மனிதர்களுக்கு (முழுமையான வழிகாட்டியாகவும், தெளிவான சான்றுகளைக் கொண்டதாகவும்; (நன்மை - தீமைகளைப்) பிரித்தறிவிப்பதுமான அல் குர்ஆன் இறக்கியருளப் பெற்றது; ஆகவே, உங்களில் எவர் அம்மாதத்தை அடைகிறாரோ, அவர் அம்மாதம் நோன்பு நோற்க வேண்டும்; எனினும் எவர் நோயாளியாகவோ அல்லது பயணத்திலோ இருக்கிறாரோ (அவர் அக்குறிப்பிட்ட நாட்களின் நோன்பைப்) பின்வரும் நாட்களில் நோற்க வேண்டும்; அல்லாஹ் உங்களுக்கு இலகுவானதை நாடுகிறானே தவிர, உங்களுக்கு சிரமமானதை அவன் நாடவில்லை; குறிப்பிட்ட நாட்கள் (நோன்பில் விடுபட்டுப் போனதைப்) பூர்த்தி செய்யவும், உங்களுக்கு நேர்வழி காட்டியதற்காக அல்லாஹ்வின் மகத்துவத்தை நீங்கள் போற்றி நன்றி செலுத்துவதற்காகவுமே (அல்லாஹ் இதன் மூலம் நாடுகிறான்).//
என குரான்-2.185 இல் சொல்லப்படுகிறது.
….........................
படைத்தவனை வணங்கு; படைக்கப்பட்டவற்றை வணங்காதே, என கூறும் குரானும்,அதை தழுவும் இஸ்லாமும், பல கட்டுப்பாடுகளுடன் வாழ்வதாகச் சொல்லிக் கொண்டுள்ள நிலையில்,சிலர் தங்கள் மக்களையே கொன்று குவித்துக் கொண்டிருப்பதும்,அதற்கு அவர்கள் இஸ்லாமியர்கள் என்ற ஒரே காரனத்திற்காக, அந்த மத வெறியர்களுக்கு உலகின் பல இடங்களில் வாழும் முஸ்லீம்கள் துணை போவதையும், இந்த ரமதான் மாதத்தில் எண்ணிப் பார்க்க வேண்டும்.அவர்களுக்கு துணை போவதை, அவர்கள் வணங்கும் அல்லா என்ற இறைவன் ஏற்றுக் கொள்வானா என்பதையும் சிந்தித்துப் பார்க்க வேண்டும்.

மக்களை மக்களாகப் பார்க்கச் சொன்ன இஸ்லாம்,இன்று ஈழத் தமிழர்கள் கொல்லப்பட்ட போது கண்களை மூடிக் கொண்டதும்,மியன்மாரில் இஸ்லாமியர்களே படுகொலைக்கு உள்ளான போது கண் மூடி இருந்ததும்,ஆப்கானிலும் பாகிஸ்தானிலும் ஈராக்,ஈரானிலும் நடைபெறும் அராஜகங்களை,வன்முறைகளை, கண்டு கொள்ளாமல் அல்லது அதற்கு மறைமுக ஆதரவு கொடுப்பதையும் எண்ணிப் பார்க்க வேண்டும்.

மத நூல்கள் யாரால் சொல்லப்பட்டிருந்தாலும், அன்றைய நாளில் வாழ்ந்த சமூகத்திற்கு, எதற்காக தேவைப்பட்டதோ அதற்காக சொல்லப்பட்டுள்ளது என்பதை புரிந்து கொள்ள வேண்டும். நாட்டின் சட்டங்கள் திருத்தப்படுவதும்,துணைச் சட்டங்கள் உருவாக்கப்படுவதும் சில பிரிவுகள் நீக்கப்படுவதும் மனிதன் வாழும் காலகட்டத்திற்கு தேவைப்படுகிறது.கணினி இல்லாத கால சட்டங்களை, இன்றைய கணினி காலகட்டத்தில் பயன்படுத்த முடியாது. அவை திருத்தப்படல் வேண்டும்.

அது போல் மத நூல்களும் எழுதப்பட்ட காலத்தில் இருந்த சூழல்களைப் பொறுத்தே எழுதப்பட்டன. அவற்றை இன்றைய காலத்தில் முற்றாகப் பயன்படுத்த முடியாது.திருத்தம் வேண்டும்.அல்லது மாற்றம் வேண்டும்.எந்த மத நூலும் இறைவனால் சொல்லப்பட்டது கிடையாது. மனிதனால் அன்று வாழ்ந்த மணிதனுக்காக,அவனை நெறிப்படுத்தி சரியான வழியில் வழி நடத்திச் செல்ல உருவாக்கப்பட்டவை மத நூல்களாகும்.

இன்று குரான் சொல்லப்பட்டிருந்தால், அதில் அன்று சொல்லப்பட்டது போல்,பல வாசகங்கள் இருக்காது. ஏனென்றால் அன்றைய சமூகமும்,சமூக அமைப்பும் இன்றைய சமூக அமைப்பும், அவற்றுக்கிடையெ உள்ள வேறுபாடுகளும் மிக அதிகம்.எனவே சமூக அமைப்பிற்கும் வேறுபாடுகளுக்கு ஏற்பவும் மத நூல்கள் திருத்தப்படல் வேண்டும். மாற்றப்படல் வேண்டும். கண்ணை மூடிக் கொண்டு பழையவற்றைப் பின்பற்றும் மூடத்தனம் மாற வேண்டும்.

இன்று உலகில் எத்தனை மதங்கள்?அத்தனை மதங்களுக்குள்ளும் எத்தனை பிரிவுகள்? இப்படி பல மதங்களும்,மதங்களுக்குள்ளேயே பல பிரிவுகளும் இருக்கும் நிலையில், ஒருவருக்கொருவர் அடித்துக் கொள்ளாது, நடுநிலையுடன் மனிதர்களாக மனிதர்களை மதித்து வாழ வேண்டும். குறைந்தது மனிதர்களாக வாழவாவது முயற்சிக்க வேண்டும்.

சிந்தியுங்கள்.

கட்டுரையின் விளக்கமும் அர்த்தங்களும் அருமையாக உள்ளது ..நாம் குறிப்பாக தமிழர்கள் சிந்திக்க வேண்டிய விடையம் தான்