தமிழா! இதுதான் புதிய தமிழா?

சில தினங்களாக உங்களுக்கு வந்த சந்தேகத்தை,உங்களுக்காகத் தந்துள்ளேன். இல்லை,சம்பந்தப்பட்டவர்களிடம் உங்கள்  சார்பாகக் கேட்டுள்ளேன்.

தேவையேற்பட்டால் ஒரு மொழியை தெரிந்து கொள்ள வேண்டியதுதான்.அப்படி அந்த மொழி தெரியாவிட்டால் கவலைப்பட வேண்டியதில்லை.எல்லோரும் எல்லாம் தெரிந்து கொண்டு வருவதில்லை. ஆங்கிலம் படிப்பது மிகவும் சுலபமான ஒன்றாகும். அதே சமயம் ஆங்கிலம் தெரியாது போனால்,தெரிந்தவர்கள் போல் தமிழுடன் ஆங்கில வார்த்தைகளை கலந்து பேசுவது, நம்மை நாமே ஏமாற்றிக் கொள்ளுவதாகும்.

சில நாட்களாக பதிவுகள் ஆங்கில மொழிபெயர்ப்புடன் வருவதைக் காண்கிறோம். ஏன் என்ற கேள்விக்குப் பதில் இல்லை. சில ஆங்கில சொற்களுக்கு சரியான தமிழ் சொல் எழுதும் போது, உடன் வந்து விடுவதில்லை.சில தொழில்நுட்ப சொற்கள் போன்றவற்றை தமிழில் தந்தால் சில சமயம் புரிந்து கொள்ள சிரமம் ஏற்படலாம்.சில பழக்கப்பட்ட ஆங்கிலச் சொற்களுக்கு உடனே தமிழ் மொழிபெயர்ப்பு வந்துவிடுவதில்லை. இப்படியான சந்தர்ப்பங்களில் ஆங்கிலச் சொற்களை பயன்படுத்தலாம்.

ஆனால் கீழே உள்ள சிந்தனைக்களப் பதிவுகளின் தலைப்புகளைப் பார்த்தால்,ஏன் ஆங்கிலம் வந்தது என்று மூளையை குழப்பிக் கொண்டாலும் பதில் வராது. பதிவோ தமிழில்,தலைப்போ தமிழிலும் ஆங்கிலத்திலும்.இந்தத் தலைப்புகளுக்கு ஆங்கில மொழிபெயர்ப்பு தேவையா? தமிழ் தலைப்பே நன்றாகப் புரிகிறதே!

தமிழனே தமிழைப் புறக்கணித்தால், யார் தமிழைப் படிப்பது,பேசுவது? தமிழனுக்கு தமிழைப் புரிய வைக்க ஆங்கிலத் தலைப்பு வேண்டுமா? சினிமாவிற்கு தமிழில் தலைப்பும், செம்மொழி மநாட்டிற்காக கடைகளின் விளம்பரப் பலகையில் தமிழும் குடி கொண்டு, அப்புறம் மநாட்டிற்குப் பின் தமிழ் காணாமல் போனது போல், இது இருக்காதா? தமிழும் ஆங்கிலமும் கொண்ட தலைப்பு நாளை தமிழ் காணாமல் போக,ஆங்கிலத் தலைப்பும்,ஆங்கிலப் பதிவும் ஆக்கிரமித்துக் கொள்ளாதா?
அல்லது ஆங்கில மோகமா?
...........................
புத்தரின் பிச்சை பாத்திரம் எங்கே? இந்திய அதிகாரிகள் விசாரணை! Where is the Buddha's begging bowl? Indian officials investigating!

மருந்தில்லாமல் இரத்த கொதிப்பை கட்டுப்படுத்தலாம்..Control the blood pressure Without medicine

சீனாவிலிருந்து அமெரிக்காவுக்கு ரெயில்: கடலுக்கடியில் 125 மைல் ரெயில் பாதை ..Railroad from China to the United States: a 125-mile undersea rail track ..

பொற்கோயில் ரணகளமான சோகக் கதை...The tragic story of the Golden Temple...

ப்ளஸ் 2 தேர்வு முடிவுகள்... ஒரு வேண்டுகோள்!Plus 2 Examination Results ... a request!
+2result நம் தளத்தில் காணலாம் Tamilnadu 12th Class Results

கல்விகடன் பற்றி About education loan

இதைவிட,

mortgage interest rates in india
Vehicle insurance ….................ஆங்கிலப் பதிவு இவை.

ஆங்கிலத்தில் இருந்து தமிழில் மொழிமாற்றம் செய்து பதிவைத் தரலாம்.அப்படி இல்லாமல் ஆங்கிலத்திலேயே பதிவைக் கொடுப்பது என்றால்,குறிப்பிட்ட தளத்தின் முகவரியை-லிங்கை- கொடுத்து இங்கே படிக்கலாம் என்று சொல்லி விடலாமே!

சிந்தியுங்கள்.
ஆங்கில மோகமா?
அல்லது இதுதான் புதிய தமிழா?