அணு கதிர்வீச்சு பாதிப்புக்கு சட்டமில்லை: அமைச்சர் ஒப்புதல்

மே 10,2010,00:00 IST
















அணு
கதிர்வீச்சு ஏற்பட்டு மக்கள் பாதிக்கப்பட்டால் அவர்களுக்கு நிவாரணம்
வழங்குவது குறித்து வகை செய்வதற்கு மத்தியிலோ அல்லது மாநிலங்களிலோ இதுவரை
எந்த சட்டமும் இல்லை என்று, தெரியவந்துள்ளது.

தமிழகத்தில் கல்பாக்கம் மற்றும் கூடங்குளம்
அணுமின் நிலையம் இருக்கும் சூழ்நிலையில், இதுபோன்ற சட்டமே இல்லை என்று
பார்லிமென்டில் அரசு அறிவித்திருப்பதன் மூலம் பெரும் அதிர்ச்சி
ஏற்பட்டுள்ளது.மேற்கு டில்லி, மாயாபுரியில் பழைய இரும்பு சாமான்கள்
விற்கும் சந்தை உள்ளது. இங்கு பழைய இரும்புக் கழிவுகள், ஏராளமாக
வருவதுண்டு. சில வாரங்களுக்கு முன், இந்த சந்தையில் இருந்த கோபால்ட்-16
ரேடியோ கதிரியக்க பொருளால், ஏழெட்டு பேர் மருத்துவமனையில் கவலைக்கிடமான
நிலையில் அனுமதிக்கப்பட்டனர். அவர்களில் ஒருவர், பலியாகிவிட்டார்.
இச்சம்பவம் குறித்து லோக்சபாவில் கவன ஈர்ப்பு தீர்மானம் கொண்டு வரப்பட்டது.

இந்திய கம்யூனிஸ்ட் தலைவர் குருதாஸ் தாஸ் குப்தா பேசியதாவது:ரேடியோ
கதிரியக்க வீச்சிலிருந்து பாதிக்கப்படும் மக்களை பாதுகாக்க சட்டம் இல்லை.
நாடு சுதந்திரமடைந்து 60 ஆண்டுகளாகியும் இந்த நிலை நீடிப்பது கேவலமானது.
மக்களின் பாதுகாப்புக்கு, அரசே பொறுப்பேற்க வேண்டும்.நிவாரணம் மற்றும்
இழப்பீட்டுத் தொகை வழங்குவதற்கு அரசு சட்டம் கொண்டு வரவேண்டும். அணுமின்
நிலையங்கள் நிறைய கொண்டு வரவேண்டுமென பிரதமர் விரும்புகிறார். ஆனால்,
பாதுகாப்பு தருவதற்கு மட்டும் தயங்குகிறார்.பழைய இரும்பு கழிவு தொழிலில்
நாடு முழுவதும் 15 லட்சம் பேர் வேலை பார்க்கின்றனர். கழிவுகளை சுழற்சி
முறையில் சுத்தம் செய்யும் பணியை இவர்கள் மேற்கொள் கின்றனர். இவர்களுக்கு
எந்த விதமான பாதுகாப்பும் இல்லை.இந்தியாவிற்கு வெளிநாடுகளில் இருந்து
ஆண்டொன்றுக்கு 64 லட்சம் டன் இரும்பு கழிவுகள் வருகின்றன. இந்தியாவில்
மட்டும் 57 லட்சம் டன் வரை இரும்பு கழிவுகள் சேகரிக்கப்படுகின்றன.நாடு
முழுவதும் ஆயிரத்து 485 அறிவியல் மையங்களில் 8,000 நியூக்ளியர் உபகரணங்கள்
உள்ளன. இவைகள் எந்த அளவில் பாதுகாப்பாக உள்ளன என்பது பற்றி யாருக்கும்
தெரியாது. இது குறித்த சட்ட திட்டங்களும் சரிவர இல்லை. டில்லி மார்க்கெட்
சம்பவத்தில் யார் மீது வழக்கு போடப் பட்டுள்ளது? சம்பந்தப்பட்ட பல்கலைக்
கழகத்தின் துணைவேந்தர் மற்றும் துறை தலைவர் மீது வழக்கு போட
வேண்டும்.இவ்வாறு குருதாஸ் தாஸ் குப்தா பேசினார்.

அமைச்சர் பிருதிவிராஜ் சவுகான் பதிலளித்து பேசியதாவது:கடந்த
1984ம் ஆண்டில் போபாலில் கார்பைடு நிறுவனத்தில் விபத்து ஏற்பட்டது. இதன்
பின், 1991ம் ஆண்டு கெமிக்கல் தொழிற்கூடங்களில் ஏற்படும் விபத்து
இழப்பீடுகள் குறித்த சட்டம் பார்லிமென்டில் இயற்றப்பட்டது. இச்சட்டம்
மட்டுமே தற்போதைக்கு இருந்து வருகிறது.ஆனால், அணு கதிர்வீச்சு மற்றும்
ரேடியோ கதிரியக்கத்தால் ஏற்படும் பாதிப்புகளுக்கு உரிய நிவாரணம் மற்றும்
இழப்பீடு வழங்குவதற்கு உண்டான சட்டங்கள் மத்திய அரசு மற்றும் மாநில
அரசுகள் தரப்பில் இதுவரை இல்லை.இந்தியாவில் 19 இடங்களில் அணுமின்
நிலையங்கள் உள்ளன. எந்த இடத்திலும் ரேடியோ கதிரியக்க லீக்கேஜ்கள் இல்லை.
எல்லா இடங்களுமே பாதுகாப்பாக இருந்து வருகின்றன.டில்லி சம்பவத்தில்
குறிப்பிடப்பட்ட காமா செல்லை பழைய இரும்பு கழிவுகளுக்கு விற்கக் கூடாது
என்று சட்டம் உள்ளது. 1969ம் ஆண்டு கனடாவில் இருந்து டில்லி பல்கலைக்
கழகத்திற்கு 69 காமா செல்கள் வாங்கப்பட்டன. இதில் மீதியிருப்பவற்றை நரோரா
அணுமின் நிலையத்திற்கு கொண்டு செல்லப்பட்டு பாதுகாப்பாக
வைக்கப்பட்டுள்ளது. இவ்வாறு பிருதிவிராஜ் சவுகான் தெரிவித்தார்.

கடந்த 1984ம் ஆண்டு போபாலில் கார்பைடு
நிறுவனத்தில் பெரும் விபத்து ஏற்பட்டு ஆயிரக்கணக்கான மக்கள் பலியாயினர்.
இவ்வளவு பெரிய விபத்து ஏற்பட்டு இத்தனை ஆண்டுகள் ஆகியும் மத்திய, மாநில
அரசுகள் சட்டம் இயற்றவில்லை. இன்னமும் அதே நிலை நீடிக்கிறது.தமிழகத்தைப்
பொறுத்தவரை கல்பாக்கத்திலும், கூடங்குளத்திலும் அணுமின் நிலையங்கள் உள்ளன.
அணு கதிர்வீச்சு அபாயம் இந்த நிலையங்களில் இருக்கலாம் என்று அவ்வப்போது
பேச்சுக்கள் எழுவதுண்டு.இந்நிலையில், அணுமின் நிலையங்களில் ஏதாவது
அசம்பாவிதம் ஏற்பட்டால் அது பெரும் ஆபத்தை விளைவிக்கும்.இந்த ஆபத்தால்
ஏற்படும் பாதிப்புகளுக்கு நிவாரணமோ அல்லது இழப்பீடோ வழங்குவதற்கு இன்னமும்
சட்டங்கள் இல்லை என்று மத்திய அமைச்சரே பார்லிமென்டில் ஒப்புக்
கொண்டிருப்பது அதிர்ச்சியை ஏற்படுத்துவதாக உள்ளது.thanks:dinamalar