அதிககட்டணம் வசூலிக்கும் தனியார் பள்ளிகளுக்கு கல்வி அமைச்சர் எச்சரிக்கை

சென்னை
: தனியார் பள்ளிகளுக்கு கல்விக் கட்டணம் நிர்ணயிப்பதற்காக அரசால்
அமைக்கப்பட்ட கோவிந்தராஜன் குழு, கட்டணத்தை நேற்று அறிவித்தது. இதை மீறி
அதிக கட்டணம் வசூலிக்கும் தனியார் பள்ளிகள் மீது கடும் நடவடிக்கை
எடுக்கப்படும் என, பள்ளிக் கல்வித்துறை அமைச்சர் தங்கம் தென்னரசு
எச்சரித்துள்ளார்.

தனியார் பள்ளிகளில் அதிகளவு கட்டணம்
வசூலிக்கப்படுவதாக எழுந்த புகாரையடுத்து, சென்னை ஐகோர்ட்டின் ஓய்வுபெற்ற
நீதிபதி கோவிந்தராஜன் தலைமையில் குழு அமைத்து அரசு நடவடிக்கை எடுத்தது.
குழுத் தலைவர் கோவிந்தராஜன் நிருபர்களிடம் கூறியதாவது: கல்வி நிறுவனங்கள்,
மாணவர்களிடமிருந்து கட்டணம் வசூல் செய்வது தொடர்பாக பல்வேறு வழக்குகளில்,
சுப்ரீம் கோர்ட் மற்றும் சென்னை ஐகோர்ட்டால் வழங்கப் பட்ட தீர்ப்புகளின்
அடிப்படையில், ஒவ்வொரு பள்ளிக்கும் தனித்தனியாக உள்கட்டமைப்பு வசதிகள்,
ஆய்வக வசதிகள், மாணவர் எண்ணிக்கை, தற்போது வசூல் செய்யும் கட்டணம்,
ஆசிரியர்கள் மற்றும் பணியாளர்களுக்கு வழங்கப்படும் ஊதியம் போன்ற விவரங்களை
சரிபார்க்க, 200 ஆசிரியர்கள் அடங்கிய குழு அமைக்கப்பட்டது. பள்ளிக் கல்வி
இயக்குனர் மற்றும் ஒரு சிறப்பு அலுவலர் மேற்பார்வையில், ஒவ்வொரு
பள்ளிக்கும் தனித் தனியாக நிர்ணயம் செய்யப் பட வேண்டிய கட்டணம்
குறிப்பிடப் பட்டு, ஒவ்வொரு பள்ளியின் விவரமும் குழுவால் பரிசீலிக்கப்
பட்டு இறுதி செய்யப்பட்டது.

ஒவ்வொரு பள்ளியிலும் அளிக்கப் பட்ட
விவரங்களின் அடிப்படையில், அப்பள்ளியின் மொத்த வருமானம் கணக்கிடப்பட்டு,
அப்பள்ளியில் பயிலும் மாணவர்களின் எண்ணிக்கையால் வகுக்கப்பட்டு, ஒவ்வொரு
மாணவருக்கும் சராசரி வருமானம் மற்றும் செலவீனம் கணக்கிடப்பட்டது.
இக்குழுவால் தற்சமயம் நிர்ணயம் செய்யப்பட்டுள்ள கட்டணம் மூன்று
ஆண்டுகளுக்கு நடைமுறையில் இருக்கும். பள்ளியின் வளர்ச்சிக்காக, ஆண்டுக்கு
10 சதவீதம் அதிகரித்துக் கொள்ள வழிவகை செய்யப்பட்டு உள்ளது. தற்போது
நிர்ணயிக்கப் பட்டுள்ள கட்டண விதிமுறைகளை மீறி செயல்படும் பள்ளிகளுக்கு,
அங்கீகாரத்தை ரத்து செய்ய, அரசுக்கு இந்த குழு பரிந்துரை செய்யும்
என்றார். இதற்கிடையே, பள்ளிக்கல்வித் துறை அமைச்சர் தங்கம் தென்னரசு,
சட்டசபையில் நேற்று பேசும்போது, 'அரசு அமைத்துள்ள குழுவின் கட்டணத்தை விட
அதிக கட்டணம் வசூலிக்கும் தனியார் பள்ளிகள் மீது கடும் நடவடிக்கை
எடுக்கப்படும்' என, எச்சரிக்கை விடுத்தார்.

பள்ளி கட்டண நிர்ணய ஆணை 2 நாட்களில் அனுப்பப்படும்:
தனியார் பள்ளிகளுக்கு கட்டணம் நிர்ணயிப்பது தொடர்பான உத்தரவு 2 நாட்களில்
அனுப்பி வைக்கப்படும் என அரசு நியமித்த ஆய்வுக் குழுவின் தலைவரான ஓய்வு
பெற்ற ஐகோர்ட் நீதிபதி கோவிந்த ராஜன் தெரிவித்தார். அவர் மேலும்
கூறியதாவது: அரசு நிர்ணயித்த கட்டணத்தை மீறி, குழுவின் முன் அனுமதியின்றி,
மூன்று ஆண்டுகளுக்குள் இடைப் பட்ட காலத்தில் கட்டணத்தை உயர்த்தி வசூல்
செய்ய, பள்ளிகளுக்கு அதிகாரமில்லை. கட்டணம் நிர்ணயம் செய்யப்பட்ட ஆணைகள்,
சம்பந்தப்பட்ட பள்ளிகளுக்கு, இன்னும் இரண்டு நாட்களில், முதன்மைக் கல்வி
அலுவலர்கள் மூலம் அனுப்பப்படும். அனைத்து தனியார் பள்ளிகளுக்கும், தற்போது
நிர்ணயம் செய்யப்படும் கட்டணம், பள்ளிக் கல்வித் துறையின், [You must be registered and logged in to see this link.] என்ற
இணையதளத்தில் இன்னும் 2 நாட்களில் வெளியிடப்படும். எங்கள் குழுவிற்கு வினா
படிவங்களை வழங்கியுள்ள சி.பி.எஸ்.இ., பள்ளி களுக்கும், இந்தக் கட்டண முறை
பொருந்தும்.