தமிழக சட்ட மேலவை: மாநிலங்களவையில் மசோதா நிறைவேறியது: அதிமுக கடும் எதிர்ப்பு

புது
தில்லி, மே 5: தமிழகத்தில் மீண்டும் சட்ட மேலவையை கொண்டுவருவதற்கு வகை
செய்யும் மசோதா மாநிலங்களவையில் புதன்கிழமை நிறைவேற்றப்பட்டது.இந்த மசோதாவை மத்திய சட்ட அமைச்சர் வீரப்ப மொய்லி தாக்கல் செய்தார்.இந்த
மசோதாவில், தமிழ்நாட்டில் சட்ட மேலவை 1986-ல் கலைக்கப்பட்டது. எனினும்
தமிழகத்தில் மீண்டும் சட்ட மேலவையை அமைப்பதற்கு வகை செய்யும் தீர்மானம்
அந்த மாநில சட்டப் பேரவையில் ஏப்ரல் 12, 2010-ல் நிறைவேற்றப்பட்டுள்ளது
என்று கூறப்பட்டுள்ளது.முன்னதாக தமிழகத்தில் சட்ட மேலவை
அமைய மத்திய அரசு கொள்கை அளவில் ஒப்புதல் அளித்தது. பிரதமர் மன்மோகன் சிங்
தலைமையில் செவ்வாய்க்கிழமை இரவு நடந்த அமைச்சரவைக் கூட்டம் இந்த ஒப்புதலை
அளித்தது.தமிழகத்தில் மீண்டும் சட்ட மேலவை கொண்டு வரப்படும்
என்பதை தமது தேர்தல் வாக்குறுதியாக 2006ம் ஆண்டில் நடந்த பேரவைத்
தேர்தலின்போது திமுக அறிவித்திருந்தது. அதற்கேற்ப கடந்த ஏப்ரல் 12ம் தேதி
பேரவையில் தமிழகத்தில் மீண்டும் சட்ட மேலவை கொண்டு வர வகை செய்யும்
தீர்மானத்தை முதல்வர் கருணாநிதி தாக்கல் செய்தார். இதற்கு அதிமுக,
இடதுசாரிகள் எதிர்ப்பு தெரிவித்தன.திமுக,அதன் கூட்டணி
கட்சிகளான காங்கிரஸ், விடுதலைச்சிறுத்தைகள் கட்சிகள் ஆதரவு தெரிவித்தன.
திமுக கூட்டணியில் இல்லாத பாமகவும் இந்த மசோதாவுக்கு ஆதரவு தெரிவித்தது.
இந்த தீர்மானத்துக்கு 155 பேர் ஆதரவு, 61 பேர் எதிர்ப்பு தெரிவித்தனர்.
மூன்றில் இரு பங்கு ஆதரவுடன் இந்த தீர்மானம் நிறைவேறியது. இதையடுத்து மத்திய அரசின் ஒப்புதலுக்காக இது தொடர்பான கருத்துருவை தமிழக அரசு அனுப்பியது.78
இடங்களுடன் சட்ட மேலவை அமைய அனுமதி அளிக்கும் இந்த மசோதாவை வீரப்ப மொய்லி
மாநிலங்களவையில் தாக்கல் செய்ததும் அதிமுக உறுப்பினர்கள் கடும் எதிர்ப்பு
தெரிவித்தனர்.அதிமுக உறுப்பினர் மைத்ரேயன், இந்த மசோதாவை ஆரம்பநிலையிலேயே தான் எதிர்ப்பதாகத் தெரிவித்தார். தமிழகத்தில்
மேலவை இல்லாத போதிலும் அனைத்து விதத்திலும் வளர்ச்சி கண்டுள்ளது.
குறிப்பாக அதிமுக ஆட்சியில் இருந்த போது மாநிலம் குறிப்பிடத்தக்க
வளர்ச்சியை எட்டியது என்று அவர் குறிப்பிட்டார்.நாட்டில்
உள்ள 28 மாநிலங்களில் 6 மாநிலங்களில் மட்டுமே சட்ட மேலவை உள்ளது. இதனால்
தமிழகத்துக்கு சட்ட மேலவை அவசியமா என்றும் மைத்ரேயன் கேள்வி எழுப்பினார்.மேலவையின்
அவசியத்தை நியாயப்படுத்திய அமைச்சர் வீரப்பமொய்லி, "சட்டப் பேரவையுடன்
மற்றொரு அவையும் மாநிலங்களில் இருப்பது அவசியம் என்று அரசியல் சாசனத்தை
வடிவமைத்த அம்பேத்கரே கூறியுள்ளார். மத்திய - மாநில அரசுகளிள் இடையேயான
உறவு குறித்து சர்காரியா கமிஷன் அளித்த பரிந்துரையிலும் இதே கருத்து
வலியுறுத்தப்பட்டுள்ளது' என்றார் அவர்."இவ்வளவு அவசரமாக
இந்த மசோதாவை நிறைவேற்ற வேண்டிய அவசியம் என்ன? உங்கள் கூட்டணி ஆளும் கட்சி
மாநிலம் என்பதற்காகத் தானே இவ்வளவு கரிசனம், பஞ்சாப், அசாமில் இதே
கோரிக்கை வலியுறுத்தப்பட்டும் அது நிறைவேற்றப்படாதது ஏன்' பாஜக தலைவர்
வெங்கய்ய நாயுடு கேள்வி எழுப்பினார்."சட்ட மேலவைக்கான செலவை
அந்தந்த மாநிலங்களே ஏற்றுக் கொள்ள வேண்டும். நிதி விஷயத்தால் பஞ்சாப்
மாநில அரசு மேலவை இப்போதைக்கு வேண்டாம் என்று கூறியுள்ளது. மேலவை தொடர்பாக
அசாம் அரசுக்கு மத்திய அரசு பலமுறை நினைவூட்டியும் பதில் கிடைக்கவில்லை'
என்றார் மொய்லி.