டில்லியில் பயங்கரவாதிகள் தாக்குதல்: மத்திய அரசுக்கு எச்சரிக்கை

by **மாலதி** Sun May 02, 2010 7:46 am

புதுடில்லி
: 'இந்தியாவில், டில்லியில் மக்கள் நடமாட்டம் அதிகம் உள்ள கன்னாட் பிளேஸ்,
கிரேட்டர் கைலாஷ் உள்ளிட்ட பகுதிகளில் பயங்கரவாதிகள் எந்த நேரத்திலும்
தாக்குதல் நடத்தும் அபாயம் உள்ளது' என, அமெரிக்கா, பிரிட்டன் உள்ளிட்ட
நாடுகள் எச்சரித்துள்ளன. டில்லியில் உள்ள அமெரிக்க தூதரகம் ஒரு அறிக்கையை
நேற்று வெளியிட்டுள்ளது.

டில்லியில் தங்கியுள்ள தங்கள் நாட்டு
மக்களுக்கு அறிவுரை கூறும் வகையில் வெளியாகியுள்ள அந்த அறிக்கையில்
கூறப்பட்டுள்ளதாவது: டில்லியில், அமெரிக்கா மற்றும் மேற்கத்திய நாடுகளைச்
சேர்ந்த மக்கள் அதிகம் தங்கியுள்ள பகுதிகளில், பயங்கரவாதிகள் விரைவில்
தாக்குதல் நடத்தவுள்ளதாக தகவல் கிடைத்துள்ளது. மக்கள் நடமாட்டம் அதிகம்
உள்ள சாந்தினி சவுக், கன்னாட் பிளேஸ், கிரேட்டர் கைலாஷ், கரோல் பாக்,
சரோஜினி நகர் ஆகிய பகுதிகள், பயங்கரவாதிகளின் தாக்குதலுக்கு இலக்காக
இருக்க வாய்ப்புள்ளது. டில்லியில் தங்கியுள்ள அமெரிக்கர்கள், இந்த
விஷயத்தில் மிகவும் உஷாராக இருக்க வேண்டும். பொது இடங்களில் நடமாடுவதை
தவிர்ப்பது நல்லது. இந்தியாவுக்கு பயணம் செய்யும் அமெரிக்கர்களும், இந்த
விஷயத்தில் கவனமாக இருக்க வேண்டும். மிகவும் விழிப்புணர்வுடன் நடந்து
கொள்ள வேண்டும். டில்லியில் தற்போது நிலவும் சூழ்நிலை, பத்திரிகைகளில்
வெளியாகும் செய்திகள் ஆகியவற்றை தொடர்ந்து கண்காணித்து, அதன் அடிப்படையில்
நடந்து கொள்ள வேண்டும். இவ்வாறு அந்த அறிக்கையில் தெரிவிக்கப்பட்டுள்ளது.

கடந்த மாதம் 21ம் தேதியும், இதே போன்ற ஒரு
அறிக்கை, அமெரிக்காசார்பில் வெளியிடப்பட்டது. பயங்கரவாத தாக்குதல்
நடக்கும் அபாயம் உள்ளதாக தற்போது மீண்டும் அமெரிக்கா எச்சரித்துள்ளது,
பாதுகாப்பு வட்டாரங்களிடையே பரபரப்பை ஏற்படுத்தியுள்ளது.பிரிட்டன்
வெளியுறவு அமைச்சகம் வெளியிட்டுள்ள அறிக்கையில், 'டில்லியில்
பயங்கரவாதிகள் தாக்குதல் நடத்தும் அபாயம் உள்ளதாக தகவல்கிடைத்துள்ளது.
முக்கியமான அரசு அலுவலகங்கள், சுற்றுலா தலங்கள் ஆகியவற்றுக்கு செல்லும்
பிரிட்டன் மக்கள் மிகவும் உஷாராக இருக்க வேண்டும்' என தெரிவிக்கப்
பட்டுள்ளது.

ஆஸ்திரேலியாவெளியிட்டுள்ள அறிக்கையில், 'கடந்த
ஏப்ரல் 22ம் தேதியிலிருந்தே, டில்லி மீது பயங்கரவாதிகள் குறி
வைத்துள்ளனர். எந்த நேரத்திலும் அங்கு தாக்குதல் நடத்தப்படலாம் என
நம்பத்தகுந்த வட்டாரங்கள் இந்த தகவலை கூறியுள்ளன' என, தெரிவித்துள்ளது.
இதுகுறித்து உள்துறை அமைச்சக வட்டாரங்கள், 'காஷ்மீரில் ஊடுருவல்
அதிகரித்துள்ளதாக வெளியான தகவலை அடுத்து, இதுபோன்ற எச்சரிக்கையை அமெரிக்கா
உள்ளிட்ட நாடுகள் விடுத்திருக்கலாம். இந்த விஷயத்தில் அரசு உஷாராக உள்ளது.
இதற்காக மக்கள் பீதி அடையத் தேவையில்லை' என தெரிவித்தன.

டில்லியில் அதிகபட்ச பாதுகாப்பு:
அமெரிக்கா, பிரிட்டன் நாடுகளின் எச்சரிக்கையை அடுத்து, டில்லியில்
பாதுகாப்பு பலப்படுத்தப் பட்டுள்ளது. இதுகுறித்து டில்லி போலீசாரின்
செய்தித் தொடர் பாளர் ராஜன் பகத் கூறியதாவது: அமெரிக்க தூதரகம்
வெளியிட்டுள்ள எச்சரிக்கை, எங்கள் கவனத்துக்கு வந்துள்ளது. இதன்
அடிப்படையில், டில்லியில் பாதுகாப்பு மேலும் அதிகரிக்கப் பட்டுள்ளது.
பொதுமக்கள் விழிப்புணர்வுடன் நடந்து கொள்ளும்படி அறிவுறுத்தப்
பட்டுள்ளனர். சந்தேகத்திற்கிடமாக ஏதாவது ஒரு பொருள் கீழே கிடந்தாலோ,
சந்தேகப்படும்படியான வாகனங்கள் நின்றாலோ, பொதுமக்கள் இதுகுறித்து
போலீசாருக்கு உடனடியாக தகவல் தெரிவிக்க வேண்டும். டில்லி போலீசாருக்கான
விடுமுறை ரத்து செய்யப்பட்டுள்ளது. நாட்டின் பிற பகுதிகளில் இருந்து
டில்லி நுழையும் அனைத்து வழித்தடங்களிலும், கண்காணிப்பு
பலப்படுத்தப்பட்டுள்ளது. இவ்வாறு ராஜன் பகத் கூறினார்.