இலங்கைப் பிரச்னை: மத்திய அரசுக்கு கருணாநிதி எச்சரிக்கை

• 
  
  
  
  
  சென்னையில் ஞாயிற்றுக்கிழமை நடைபெற்ற பாராட்டு விழாவில் பேசுகிறார் திமுக
  தலைவர் கருணாநிதி. உடன், (இடமிருந்து) டி.ஆர்.பாலு, மு.க.ஸ்டாலின்,
  க.அன்பழகன், கி.வீரமணி, சுப.வீரபாண்டியன், தொல்.திருமாவளவன், ஜெ.அன்பழகன்.
  

இலங்கைப் பிரச்னைக்குத் தீர்வு காண ஐ.நா. மூலம்
பொதுவாக்கெடுப்பு நடத்துவதற்கு மத்திய அரசு உறுதுணையாக இருந்தால்தான்
திமுகவும் மத்திய அரசுக்கு உறுதுணையாக இருக்கும் என்றார் கருணாநிதி.

டெசோ மாநாட்டுத் தீர்மானங்களை ஐ.நா.விலும், ஐ.நா. மனித உரிமை ஆணையத்திலும்

அளித்துவிட்டு திமுக பொருளாளர் மு.க.ஸ்டாலின், நாடாளுமன்றத் திமுக
குழுத் தலைவர் டி.ஆர்.பாலு இருவரும் சென்னைக்கு ஞாயிற்றுக்கிழமை
திரும்பினர். அதற்கான பாராட்டு விழா அறிவாலயத்தில் உள்ள கலைஞர் அரங்கில்
ஞாயிற்றுக்கிழமை நடைபெற்றது.

விழாவில் கருணாநிதி பேசியது: டெசோ இயக்கம் ஒரு தலைமையால் மட்டும்
இயங்கும் இயக்கமில்லை. க.அன்பழகன், திருமாவளவன், வீரமணி போன்றோர் இணைந்து
நடத்துகிறோம்.

இதற்கு முன்பான டெசோ இயக்கம் தொடர்ந்து இயங்க முடியாதளவு
தடுக்கப்பட்டது. அந்த இயக்கத்தின் சார்பில் மதுரையில் நடைபெற்ற மாநாட்டில்
என்.டி.ராமாராவ், வாஜ்பாய் போன்ற பெருந்தலைவர்கள் பங்கேற்றனர். அதில்,
இலங்கைத் தமிழர் பிரச்னைக்கு விடிவு காலத்தை உருவாக்க வேண்டும் என்று அரிய
கருத்துகளைத் தெரிவித்தனர்.

ஆனால் யாருக்காக அந்த யோசனைகள் சொல்லப்பட்டனவோ அவர்கள் அதற்கு
உரியவர்களாக நடந்து கொள்ள இயலாத சூழலினால், டெசோ இயக்கம் எடுத்த முயற்சிகளை
நிறைவேற்ற முடியாமல் போய்விட்டது.

அதன் பிறகு, இலங்கையில் ஆயுதப் போர் நடைபெற்ற நேரத்தில் நமக்குள்ளேயே
ஒற்றுமை குலைக்கப்பட்டு, நாமே ஒற்றுமையாக இல்லாத காரணத்தால் எதிர்பார்த்த
வெற்றியைப் பெற முடியவில்லை.

அதனால் லட்சக்கணக்கான தமிழர்களும், இளம்பெண்களும் கொல்லப்பட்டனர். இதன்
காரணமாகவே மீண்டும் டெசோ இயக்கத்தை இன்னும் பலமாகத் தொடங்கியுள்ளோம்.

இதன் பிறகாவது இலங்கைத் தமிழர் பிரச்னைக்கு விடிவு காலம் ஏற்படாதா
என்பதற்காக ஐ.நா.மன்றத்துக்குச் சென்று டெசோ தீர்மானத்தைக் கொடுத்துள்ளோம்.
இதன் மூலம் முழுமையான வெற்றிபெற்றோம் என்று சொல்லமாட்டேன். பயணம்
வெற்றிகரமாக அமைந்தது என்றுதான் சொல்வேன்.

இன்னும் அந்த வெற்றியின் உச்சத்தை அடைய வெகுதூரம் செல்ல வேண்டியிருக்கிறது.

அந்தத் தொலைவை குறுக்குவதற்கும் விரைவுபடுத்துவதற்கும் தமிழக மக்கள்
ஒத்துழைப்பு தரவேண்டும். அதே நேரத்தில் மத்திய அரசினுடைய ஒத்துழைப்பும்
தேவைப்படுகிறது.

மத்திய அரசை கருணாநிதி நினைத்தால் பணிய வைக்க முடியும் என்று
திருமாவளவன் கூறினார். பணிய வைக்க முடியும் என்பதைவிட அவர்களை நம்முடைய
வழிக்கு வரவைக்க முடியும் என்று சொல்லியிருந்தால் இந்திய அரசு கோபப்படாமல்
இருக்க முடியும்.

மத்திய அரசு கோபப்படாவிட்டாலும் சிலர் தூண்டிவிட்டு கோபப்பட வைப்பார்கள்.

எனவே ஜாக்கிரதையாகச் செயல்பட வேண்டும்.

இலங்கைத் தமிழர்கள் மீண்டும் எந்தவகையிலும் பாதிக்கப்பட்டுவிடக் கூடாது.

காந்தி அகிம்சை வழியிலும் பகத்சிங் தீவிர வழியிலும் போராடினர். இருப்பினும் இறுதியில் அகிம்சை வழியிலேயே சுதந்திரம் பெற முடிந்தது.

அதனால் வன்முறை வழியைவிட சாத்வீகமான வழியே சரியானதாகும். இலங்கைத்
தமிழர் பிரச்னைக்குத் தீர்வு காண ஐ.நா. மூலம் பொது வாக்கெடுப்பு எடுக்க
வேண்டும். அதற்கு ஐ.நா.வுக்கு அழுத்தம் கொடுக்க மத்திய அரசு உறுதுணையாக
இருக்க வேண்டும். அப்படியிருந்தால்தான் மத்திய அரசுக்கு திமுகவும்
உறுதுணையாக இருக்க முடியும் என்றார் கருணாநிதி.

விழாவில் திமுக பொதுச்செயலாளர் க.அன்பழகன், திராவிடர் கழகத் தலைவர்
கி.வீரமணி, விடுதலைச் சிறுத்தைகள் கட்சித் தலைவர் தொல்.திருமாவளவன்,
திராவிட இயக்கத் தமிழர் பேரவைத் தலைவர் சுப.வீரபாண்டியன் உள்ளிட்டோர்
மு.க.ஸ்டாலினின் ஐ.நா.பயணம் தொடர்பாக பாராட்டுரைத்தனர்.

விழாவில் திமுக துணைப் பொதுச்செயலாளர்கள் துரைமுருகன், வி.பி.துரைசாமி, எஸ்.பி.

சற்குணபாண்டியன், மத்திய அமைச்சர்கள் பழநிமாணிக்கம், ஜெகத்ரட்சகன், மாநிலங்களவை உறுப்பினர் கனிமொழி உள்பட ஏராளமானோர் பங்கேற்றனர்.