தமிழகம் வர பிரபாகரன் தாயார் விருப்பம்: முதல்வருக்கு கடிதம்

by **அருள்** Sat May 01, 2010 7:11 am

'தமிழகத்தில்
மருத்துவ சிகிச்சை பெற, மலேசியாவில் இருந்து திருச்சி வருவதற்கு, இந்திய
தூதரகத்தின் மூலமாக ஏற்பாடு செய்து தருமாறு' விடுதலைப் புலிகள் தலைவர்
பிரபாகரனின் தாயார் பார்வதி, முதல்வருக்கு கடிதம் எழுதியுள்ளார்.

விடுதலைப் புலிகளின் தலைவர் பிரபாகரனின்
தாயார் பார்வதி, சிகிச்சைக்காக சென்னை வந்தார். அவரை விமான நிலையத்தில்
இறங்க அனுமதிக்கவில்லை. அப்படியே மலேசியாவுக்கு திருப்பி அனுப்பினர்.
சட்டசபையில் கொண்டு வரப்பட்ட கவன ஈர்ப்பு தீர்மானத்திற்கு பதில் அளித்த
முதல்வர் கருணாநிதி, 'பார்வதி தமிழகத்தில் சிகிச்சை பெற விரும்பினால், அதை
தமிழக அரசிற்கு தெரிவிக்கலாம். அவரது கோரிக்கை மத்திய அரசிற்கு
அனுப்பப்பட்டு, சிகிச்சை வழங்க நடவடிக்கை எடுக்கப்படும்' என்று
தெரிவித்தார். மருத்துவ சிகிச்சை பெற உதவும்படி, முதல்வருக்கு வேண்டுகோள்
விடுத்து, மலேசியாவில் இருந்து பார்வதி கடிதம் எழுதியுள்ளார்.

அதன் விவரம்: நான் நீண்ட
காலமாக பக்கவாதத்தால் பாதிக்கப்பட்டு வலது காலும், கையும் செயலற்ற
நிலையில் இருந்து வருகிறேன். நான் தமிழகத்தில் இருந்த காலத்தில்,
முசிறியில் உள்ள டாக்டர் ராஜேந்திரனிடம் வைத்தியம் பெற்று வந்தேன். ஆனால்,
2003ம் ஆண்டு மே மாதம் இலங்கை சென்றதால், தொடர்ந்து வைத்தியம் செய்ய
முடியாமல் போய்விட்டது. வன்னியிலும், ராணுவ முகாமிலும் சரியான மருத்துவ
வசதிகள் இல்லாதபடியால், எனது உடல்நிலை மேலும் பாதிக்கப்பட்டுள்ளது.
கொழும்பில் எளிதில் விசா எடுக்க முடியாத சூழ்நிலையில், எனது மகள் வினோதினி
ராஜேந்திரன் என்னை மலேசியாவிற்கு வரவழைத்து, அங்கு இந்திய விசா பெற்று,
என்னை சென்னைக்கு ஒரு பெண்ணின் உதவியுடன் அனுப்பி வைத்தார்.

எனது வைத்தியத்திற்கு டாக்டர் ராஜேந்திரன்
வேறு தகுதி வாய்ந்த மருத்துவர்களையும் ஏற்பாடு செய்வார் என்பதால், தயவு
செய்து நான் கோலாலம்பூரில் இருந்து திருச்சிக்கு விமானத்தில் வருவதற்கு,
மலேசியாவில் உள்ள இந்திய தூதரகத்தின் மூலமாக ஏற்பாடு செய்து தருமாறு
அன்போடு வேண்டுகிறேன். தங்கள் உதவியை என்றும் மறக்க மாட்டேன். நீங்கள்
நீடூழி வாழ வாழ்த்துகிறேன். இவ்வாறு கடிதத்தில் தெரிவிக்கப்பட்டுள்ளது.
கடித்தின் கீழ் பகுதியில், 'நன்றியுடன் தங்கள் உடன்பிறப்பு' எனக்
குறிப்பிட்டு, பார்வதியின் கைரேகை பதிக்கப்பட்டுள்ளது. விடுதலைப்
புலிகளின் தலைவர் பிரபாகரன் குறித்து, கடிதத்தில் ஒரு வார்த்தை கூட
குறிப்பிடப்படவில்லை.

மலேசியா தலைநகர் கோலாலம்பூரில், பார்வதி
சிகிச்சை பெற்று வரும், 'டமாய்' மருத்துவமனையில் இருந்து, சென்னையில்
இயங்கி வரும், 'மனிதம்' என்ற அமைப்பின் செயல் இயக்குனர் அக்னி
சுப்பிரமணியம் மூலமாக, இந்த கடிதம் தமிழகத்திற்கு வந்துள்ளதாகவும், அவர்
மூலமாக முதல்வருக்கும் நேற்று கடிதம் சென்று சேர்க்கப்பட்டதாகவும்
கூறப்படுகிறது.

தமிழக அரசுக்கு ஐகோர்ட் உத்தரவு:
'பிரபாகரனின் தாயார் சிகிச்சை தொடர்பாக சென்னையில் தங்குவது குறித்து
தமிழக அரசிடம் முறையிட்டால், அதை மத்திய அரசின் பரிசீலனைக்கு அனுப்ப
வேண்டும்' என சென்னை ஐகோர்ட் உத்தரவிட்டுள்ளது. இதையடுத்து, சென்னை
ஐகோர்ட்டில் வக்கீல் கருப்பன் தாக்கல் செய்த மனுவில், 'சென்னைக்கு பார்வதி
வர ஏதுவாக சிறப்பு விமானத்தை மத்திய அரசு அளிக்க வேண்டும்; அவரது
சிகிச்சைக்காக ஆகும் செலவை மத்திய அரசு ஏற்க வேண்டும்' என கோரியிருந்தார்.
இம்மனுவை தற்காலிக தலைமை நீதிபதி தர்மா ராவ், நீதிபதி சசிதரன் அடங்கிய
'முதல் பெஞ்ச்' நேற்று விசாரித்தது. மத்திய அரசு சார்பில் கூடுதல்
சொலிசிட்டர் ஜெனரல் ரவீந்திரன், தமிழக அரசு சார்பில் அரசு பிளீடர் ராஜா
கலிபுல்லா ஆஜராகினர். வக்கீல் கருப்பனே நேரில் வாதாடினார்.

'முதல் பெஞ்ச்' பிறப்பித்த உத்தரவு:
தமிழகத்தில் சிகிச்சை பெறுவதற்காக இங்கே தங்க அனுமதிக்க வேண்டும் என,
பார்வதியிடம் இருந்து தமிழக அரசுக்கு எந்த முறையீடும் வரவில்லை என அரசு
பிளீடர் கூறியுள்ளார். எனவே, பார்வதி சார்பில் முறையீடு செய்யவோ அல்லது
அவரிடம் இருந்து முறையீடை பெறவோ நடவடிக்கை எடுக்க வேண்டியது மனுதாரரைப்
பொருத்தது. அவ்வாறு முறையீட்டு மனுவை இரண்டு வாரங்களில் தமிழக அரசிடம்
சமர்ப்பித்தால், அதை பெற்ற பின், இரண்டு வாரங்களில் மத்திய அரசின்
பரிசீலனைக்கு தமிழக அரசு அனுப்ப வேண்டும். இவ்வாறு 'முதல் பெஞ்ச்'
உத்தரவிட்டுள்ளது.