ராஜாஜியின் வாழ்க்கை வரலாறு -Rajaji's Biography

by **mmani** Fri Jan 17, 2014 9:39 pm

காந்தியின் தமிழ்ப்பற்று!

ராஜாஜியின் வாழ்க்கை வரலாற்றை ராஜ்மோகன் காந்தி எழுதியிருக்கிறார். அது ஆயிரம் பக்க அளவில் வானதி பதிப்பக வெளியீடாக வந்துள்ளது.

ராஜாஜி அன்றும் இன்றும் வாதப் பிரதிவாதங்களின் மையமாக இருப்பவர். அவரைப் பற்றி நிறைய சர்ச்சைகளும் கடுமையான விமர்சனங்களும் இருக்கின்றன. அதில் எது உண்மை, எது பொய் என அறிந்து கொள்வதற்காவே இந்த நூலைப் படிக்கத் துவங்கினேன்.

காந்தியின் மகன் தேவதாஸ், ராஜாஜியின் மகள் லட்சுமியை காதலித்து திருமணம் செய்து கொண்டார், அவர்களது பிள்ளைதான் ராஜ்மோகன் காந்தி, அந்தவகையில் அவர் ராஜாஜியின் பேரன், தனது தாத்தாவின் வாழ்க்கை வரலாற்றை எழுதுகிறோம், எந்த சார்புநிலையும் வந்துவிடக்கூடாது என்று முடிவு செய்து கொண்டு துல்லியமாக, நேர்மையாக, ராஜாஜியின் அகபுற உலகின் முக்கிய நிகழ்வுகளை தகுந்த ஆதாரங்களுடன் விளக்கி எழுதியிருக்கிறார் ராஜ்மோகன் காந்தி, அதற்கு ஓர் உதாரணம் எல்லா இடங்களிலும் ராஜாஜியை சி. ஆர். என்றே சுட்டி எழுதியிருப்பது. அப்படித்தான் அன்று ராஜாஜி அழைக்கப்பட்டார், ராஜாஜியின் குடும்ப விஷயங்களைப் பற்றி எழுதும்போதுகூட ராஜ்மோகன் காந்தி உணர்ச்சிவசப்படாமல் நடந்த உண்மைகளை, தான் அறிந்த விதத்தில் அழகாக வெளிப்படுத்தியிருக்கிறார்.

ஆங்கிலத்தில் எழுதப்பட்ட இந்த நூலை கல்கி ராஜேந்திரன் மிக நேர்த்தியாக மொழியாக்கம் செய்திருக்கிறார். ராஜாஜியின் முக்கிய சீடர்களில் ஒருவர் கல்கி என்பதால், கல்கி ராஜேந்திரன் இதை மிகவும் உணர்ச்சிபூர்வமாக, தான் செய்ய வேண்டிய முக்கியக் கடமை என்பதைப் போல முழுமையான அக்கறை எடுத்து செழுமையாக மொழியாக்கம் செய்திருக்கிறார்.

ஆயிரம் பக்க நூல் என்றாலும் ஒரு நாவல் படிப்பது போல அத்தனை சுவாரஸ்யமாகவும், வியப்பூட்டும் தகவல்கள், ஆளுமைகள், நிகழ்ச்சிகள் என இந்திய சுதந்திரப் போராட்ட காலத்தின் குறுக்குவெட்டு தோற்றம் போல இந்த நூல் அமைந்துள்ளது.

காந்தியின் மீதான ஈடுபாடுதான் ராஜாஜியை சுதந்திரப் போராட்ட களத்தினுள் இழுத்துக்கொண்டு வருகிறது. காந்தியின் கட்டுரைகளை அவர் மொழியாக்கம் செய்து வெளியிட்டிருக்கிறார். காந்தியின் மகத்துவத்தை ஆரம்ப காலங்களிலே உணர்ந்து கொண்டவர் ராஜாஜி.

இந்த நூலில் என்னை உலுக்கிய பகுதி தனது மகனுக்கு ராஜாஜி ஆங்கிலத்தில்தான் கடிதம் எழுதுகிறார் என்று தெரிந்த மகாத்மா காந்தி மிகுந்த மனவருத்ததுடன் தமிழன்னையின் மிகச்சிறந்த புதல்வர்களே அவளை கைவிடுவார்களேயானால் பெருவாரியான தமிழ் மக்கள் என்ன செய்வது, பொது ஜனங்களிடையே ஊழியம் புரிய வேண்டியவர்கள் எதிர்காலம் என்ன ஆகும், இனி உங்கள் மகனுடன் நீங்கள் தமிழில்தான் கடித தொடர்பு கொள்வேன் என எனக்கு சத்தியம் செய்து தரவும், உங்களை நினைத்து என்னால் தூங்க முடியவில்லை, இது சம்பந்தமாக எனக்கு விளக்கம் தரவும் என ராஜாஜிக்கு கண்டனக் கடிதம் எழுதியிருக்கிறார் காந்தி.

அத்தோடு ராஜாஜி மகனையும் தனது தந்தைக்கு தமிழில் கடிதம் எழுதச் செய்திருக்கிறார். தமிழ் மீது காந்திக்கு இருந்த பற்றும், தாய்மொழியை புறக்கணித்துவிட்டு பொதுவாழ்க்கையில் ஈடுபடக்கூடாது என்ற உண்மையும் முகத்தில் அறைவது போல கூறப்பட்டுள்ளது.

ராஜாஜியின் வாழ்க்கை வரலாறு தமிழக சுதந்திரப் போராட்ட காலத்தின் முக்கிய ஆவணங்களில் ஒன்றாக எழுதப்பட்டுள்ளது. இந்த நூலை வரவேற்றுக் கொண்டாட வேண்டியது நமது கையில்தானிருக்கிறது.

‘ராஜாஜி வாழ்க்கை வரலாறு’
ஆசிரியர்: ராஜ்மோகன் காந்தி
தமிழில்: கல்கி ராஜேந்திரன்,
விலை: 475,
வெளியீடு:
வானதி பதிப்பகம்,
தீனதயாளு சாலை,
சென்னை - 17