ஈரோடு மாவட்ட வனப்பகுதியில் கருஞ்சிறுத்தைகள்–கழுதை புலிகள் இருப்பது உறுதியாகி உள்ளது

by **Tamil** Thu Dec 26, 2013 3:17 pm

சத்தியமங்கலம், டிச. 26–
ஈரோடு மாவட்ட வனப்பகுதியில் கடந்த சில நாட்களாக வனவிலங்குகள் கணக்கெடுப்பு நடத்தப்பட்டது. சத்தியமங்கலம், பவானி சாகர், ஆசனூர், அந்தியூர், சென்னம்பட்டி, பர்கூர் மற்றும் கடம்பூர் ஆகிய வனப்பகுதிகளில் இந்த கணக்கெடுப்பு பணி நடந்தது.
5 பேர் கொண்ட குழுவினர் ஒரு பகுதிக்கு சென்று பணியில் ஈடுபட்டனர். இப்படி சுமார் 50–க்கும் மேற்பட்ட குழுவினர் காட்டுக்குள் புகுந்தனர். நீலகிரி அரசு கலை கல்லூரி மாணவ–மாணவிகளும் ஆர்வத்துடன் இந்த கணக்கெடுப்பு பணியில் பங்கேற்றனர்.
சத்தியமங்கலம் பண்ணாரி கோவில் எதிரே உள்ள காட்டு பண்ணாரி, பவானிசாகர், தலமலை மற்றும் சென்னம்பட்டி வனப் பகுதிகளில் புலிகள் கால் தடங்களை வன குழுவினர் பார்த்தனர்.
பவானிசாகர் காட்டுக்குள் புலிகள் துள்ளி குதித்து ஓடியதை நேரில் பார்த்த கல்லூரி மாணவிகள் மகிழ்ச்சி அடைந்தனர். அவர்கள் கூறும்போது, "டி.வி. டிஸ்கவரி சேனலில் தான் இப்படி விலங்குகளை பார்த்துள்ளோம். ஆனால் இப்படி காட்டுக்குள் கண் எதிரே புலிகளை பார்த்தது மிகவும் சந்தோஷமாக இருக்கிறது. எங்கள் வாழ்நாளில் இதை மறக்க முடியாது" என்று கூறினர்.
பல இடங்களில் வன கணக்கெடுப்பு குழுவினரை யானைகளும், கரடி மற்றும் செந்நாய்கள் விரட்டிய 'திகில்' சம்பவமும் நடந்து உள்ளதாக வன அதிகாரிகள் தெரிவித்தனர்.
ஈரோடு மாவட்ட வனப் பகுதியில் கருஞ்சிறுத்தை நடமாட்டம் இருப்பதாக முன்பு கூறப்பட்டது. இதை உறுதிப்படுத்தும் வகையில் அடர்ந்த வனப்பகுதியான தலமலை, காளிதிம்பம், பவானிசாகரில் இருந்து தெங்குமரகடா செல்லும் வனப்பகுதியில் கருஞ்சிறுத்தைகள் நடமாட்டம் உள்ளதை கால்தடம் மூலம் கணக்கெடுப்பு குழுவினர் அறிந்தனர்.
சத்தி, பவானிசாகர் வனத்தில் 10–க்கும் மேற்பட்ட கருஞ்சிறுத்தைகள் இருக்கலாம் என்று வன அதிகாரி ஒருவர் தெரிவித்தார்.
அதேபோல் மேற்கண்ட பகுதிகளில் கழுதை புலிகளின் கால் தடத்தையும் பார்த்து உள்ளனர். இந்த கழுதை புலிகளை கண்டாலே புலி, சிறுத்தை போன்ற விலங்குகள் கூட பயந்து ஓடுமாம். காரணம் அதன்மீது வீசும் வாடைதான். இந்த கழுதை புலி, காட்டுக்குள் செத்து அழுகி போய் கிடக்கும் வனவிலங்குகளின் உடலை சாப்பிடும். இதனால் அதன்மீது கெட்ட வாடை வீசும்.
புலியோ..சிறுத்தையோ மான் மற்றும் காட்டெருமையை அடித்து சாப்பிடும் சமயத்தில் கழுதை புலிகள் கூட்டம்...கூட்டமாக வந்து அவற்றை பறித்துக் கொள்ளும். ஒரு கழுதை புலியின் வாடையே பலமாக அடிக்கும்போது கூட்டம்..கூட்டமாக வந்தால் அவற்றின் மீது 'குப்பென்று' அடிக்கும் துர்நாற்றத்தை பொறுக்க முடியாமல், அடித்த விலங்குகளை போட்டு விட்டு புலியும், சிறுத்தையும் ஓடி விடுமாம். இது கழுதை புலிகளுக்கு கடும் கொண்டாட்டமாகி விடும்.
மேலும் இந்த கழுதை புலிகளுக்கு பயந்து தான் சிறுத்தைகள் தான் வேட்டையாடிய மான் மற்றும் வனவிலங்குகளின் உடல்களை மரத்தின் ஏறி வைத்து கொண்டு சாப்பிடுமாம்.
இப்படி பல இடங்களில் மான் போன்ற விலங்குகளின் மாமிசத்தையும் எலும்புகளையும் கணக்கெடுப்பு குழுவினர் பார்த்துள்ளனர்.
மேலும் பவானிசாகர் வனப்பகுதியில் மாயாற்றை யொட்டி உள்ள காட்டில் உள்ள உயர்ந்த மரங்களில் 50–க்கும் மேற்பட்ட பிணம் தின்னும் கழுகுகளின் ராட்சத கூட்டையும் பார்த்து உள்ளனர்.
இவைபோக மேலும் பல அரிய வகை விலங்குகளின் கால் தடத்தையும் கணக்கெடுப்பு குழுவினர் பார்த்து உள்ளனர்.
இவற்றையெல்லாம் பார்க்கும்போது இந்தியாவில் வேறு எங்கும் இல்லாத வகையில் ஆபூர்வ வன விலங்குகள் வசிக்கும் காடாக ஈரோடு வனப்பகுதி உள்ளது குறிப்பிடத்தக்கது.