கடவுளின் மண்ணில் விராத் விளாசல் :இந்தியா அசத்தல் வெற்றி

by **அருள்** Fri Nov 22, 2013 7:27 am

கொச்சி: வெஸ்ட் இண்டீசுக்கு எதிரான ஒருநாள் தொடரை இந்திய அணி வெற்றியுடன் துவக்கியது. கொச்சியில் நேற்று நடந்த முதலாவது ஒருநாள் போட்டியில், ரோகித் சர்மா, விராத் கோஹ்லியின் அபார ஆட்டம் கைகொடுக்க, இந்திய அணி 6 விக்கெட் வித்தியாசத்தில் வெற்றி பெற்றது. டெஸ்ட் போட்டியை தொடர்ந்து, ஒருநாள் போட்டியிலும் வெஸ்ட் இண்டீஸ் அணியின் தோல்வி பயணம் தொடர்கிறது.
இந்தியா வந்துள்ள வெஸ்ட் இண்டீஸ் அணி, மூன்று போட்டிகள் கொண்ட ஒருநாள் தொடரில் பங்கேற்கிறது. இரு அணிகள் இடையிலான முதல் போட்டி, இயற்கை எழில் சூழ்ந்த, கடவுளின் சொந்தமண் என்றழைக்கப்படும் கேரளாவின் கொச்சியில் நடந்தது. "டாஸ்' வென்ற வெஸ்ட் இண்டீஸ் கேப்டன் டுவைன் பிராவோ, "பேட்டிங்' தேர்வு செய்தார்.
கெய்ல் ஏமாற்றம்:
வெஸ்ட் இண்டீஸ் அணிக்கு முதல் ஓவரில் அதிர்ச்சி காத்திருந்தது. புவனேஷ்வர் குமார் வீசிய ஆட்டத்தின் 2வது பந்தில், தேவையில்லாமல் ஒரு ரன்னுக்கு ஓடிய கிறிஸ் கெய்ல் (0) "ரன்-அவுட்' ஆனார். உனத்கத் பந்தை சிக்சருக்கு பறக்கவிட்ட சார்லஸ், புவனேஷ்வர் வீசிய 7வது ஓவரில் "ஹாட்ரிக்' பவுண்டரி விளாசினார். இரண்டாவது விக்கெட்டுக்கு 65 ரன்கள் சேர்த்த போது, ஜடேஜா "சுழலில்' சார்லஸ் (42) சிக்கினார். சாமுவேல்ஸ் (24) நிலைக்கவில்லை.
டேரன் அரைசதம்:
பின் இணைந்த டேரன் பிராவோ, சிம்மன்ஸ் ஜோடி நிதானமாக ஆடியது. ஜடேஜா பந்தில் இரண்டு சிக்சர் விளாசிய டேரன் பிராவோ, அஷ்வின், ரெய்னா ஆகியோரது பந்தில் தலா 2 பவுண்டரி அடித்தார். பொறுப்பாக ஆடிய இவர், ஒருநாள் போட்டியில் தனது 13வது அரைசதத்தை பதிவு செய்தார். நான்காவது விக்கெட்டுக்கு 65 ரன்கள் சேர்த்த போது, ரெய்னா பந்தில் சிம்மன்ஸ் (29) அவுட்டானார். அடுத்து வந்த தியோநரைன் (4), ரெய்னா "சுழலில்' போல்டானார். டேரன் பிராவோ (59), முகமது ஷமி "வேகத்தில்' வெளியேறினார்.
கேப்டன் டுவைன் பிராவோ (24) பெரிய அளவில் சோபிக்கவில்லை. அடுத்து வந்த டேரன் சமி (5), சுனில் நரைன் (0), ரவி ராம்பால் (1) சொற்ப ரன்னில் அவுட்டானார்கள். வெஸ்ட் இண்டீஸ் அணி 48.5 ஓவரில் 211 ரன்களுக்கு "ஆல்-அவுட்' ஆனது. ஹோல்டர் (16) அவுட்டாகாமல் இருந்தார். இந்தியா சார்பில் ரவிந்திர ஜடேஜா, சுரேஷ் ரெய்னா தலா 3, அஷ்வின் 2, முகமது ஷமி ஒரு விக்கெட் கைப்பற்றினர்.
ரோகித் அபாரம்:
சுலப இலக்கை விரட்டிய இந்திய அணிக்கு ஷிகர் தவான் (5) ஏமாற்றினார். பின், விராத் கோஹ்லியுடன் இணைந்த ரோகித் சர்மா அபார ஆட்டத்தை வெளிப்படுத்தினார். சுனில் நரைன் பந்தை சிக்சருக்கு அனுப்பிய ரோகித், தியோநரைன் வீசிய 16வது ஓவரில் அடுத்தடுத்து இரண்டு பவுண்டரி விளாசினார். பொறுப்பாக ஆடிய ரோகித், ஒருநாள் போட்டியில் தனது 20வது அரைசதத்தை பதிவு செய்தார். பவுண்டரி அடித்து ரன் கணக்கை துவக்கிய கோஹ்லி, தன்பங்கிற்கு அரைசதம் அடித்தார். இரண்டாவது விக்கெட்டுக்கு 133 ரன்கள் சேர்த்த போது ரோகித் (72) அவுட்டானார்.
கோஹ்லி அசத்தல்:
தொடர்ந்து அசத்தலாக ஆடிய கோஹ்லி, டுவைன் பிராவோ வீசிய 26வது ஓவரில் அடுத்தடுத்து இரண்டு பவுண்டரி அடித்தார். ராம்பால், ஹோல்டர் பந்தில் தலா ஒரு சிக்சர் அடித்த கோஹ்லி, ஒருநாள் அரங்கில் 5000 ரன்களை எட்டினார். இவர், 86 ரன்கள் எடுத்த போது, ஹோல்டர் "வேகத்தில்' வெளியேறினார். அடுத்து வந்த சுரேஷ் ரெய்னா "டக்-அவுட்' ஆனார். ஹோல்டர் வீசிய 34வது ஓவரில், கேப்டன் தோனி அடுத்தடுத்து இரண்டு பவுண்டரி அடித்தார். டுவைன் பிராவோ பந்தில் பவுண்டரி அடித்த யுவராஜ் சிங், அணியின் வெற்றியை உறுதி செய்தார்.
இந்திய அணி 35.2 ஓவரில் 4 விக்கெட்டுக்கு 212 ரன்கள் எடுத்து வெற்றி பெற்றது. யுவராஜ் சிங் (16), தோனி (13) அவுட்டாகாமல் இருந்தனர். வெஸ்ட் இண்டீஸ் சார்பில் ஹோல்டர் 2, ராம்பால், சுனில் நரைன் தலா ஒரு விக்கெட் வீழ்த்தினர்.
ஆட்டநாயகன் விருது இந்திய வீரர் விராத் கோஹ்லிக்கு வழங்கப்பட்டது. சிறந்த பீல்டருக்கான விருதை இந்திய அணியின் புவனேஷ்வர் பெற்றார். இந்த வெற்றியின் மூலம், இந்திய அணி 1-0 என தொடரில் முன்னிலை வகிக்கிறது. இரண்டாவது போட்டி விசாகப்பட்டினத்தில் வரும் நவ., 24ம் தேதி நடக்கிறது.
கெய்ல் காயம்
நேற்றைய போட்டியின் போது ஒரு ரன்னுக்கு ஓடிய வெஸ்ட் இண்டீஸ் வீரர் கிறிஸ் கெய்ல், தடுமாறி கீழே விழுந்தார். அப்போது இவரது இடது கால் தொடையின் பின்பகுதியில் காயம் ஏற்பட்டது. உடனடியாக இவருக்கு கொச்சியில் உள்ள தனியார் மருத்துவமனையில் எம்.ஆர்.ஐ., ஸ்கேன் எடுக்கப்பட்டது. இதில் காயம் உறுதி செய்யப்பட்டது. தவிர, காயம் குணமடைய 2 முதல் 4 வாரங்கள் தேவைப்படும் என தெரிவிக்கப்பட்டது. இதனையடுத்து இந்தியாவுக்கு எதிராக மீதமுள்ள இரண்டு ஒருநாள் போட்டிகளில் கெய்ல் விளையாடுவது சந்தேகம்.
5000
அபாரமாக ஆடிய இந்திய வீரர் விராத் கோஹ்லி 86 ரன்கள் எடுத்தார். இவர், 81வது ரன்னை எட்டிய போது, ஒருநாள் போட்டியில் 5000 ரன்கள் என்ற புதிய மைல்கல்லை எட்டினார். இதுவரை இவர், 120 போட்டியில் (114 இன்னிங்ஸ்), 17 சதம், 27 அரைசதம் உட்பட 5005 ரன்கள் எடுத்துள்ளார். இதன்மூலம் குறைந்த இன்னிங்சில் அதிவேகமாக 5000 ரன்களை எட்டிய முன்னாள் வெஸ்ட் இண்டீஸ் வீரர் விவியன் ரிச்சர்ட்சின் (126 போட்டி, 114 இன்னிங்ஸ்) சாதனையை சமன் செய்தார்.
1143
அசத்தலாக ஆடிய இந்திய வீரர் ரோகித் சர்மா 72 ரன்கள் எடுத்தார். இதன்மூலம் இந்த ஆண்டு விளையாடிய ஒருநாள் போட்டிகளில் அதிக ரன்கள் எடுத்த வீரர்கள் பட்டியலில் முதலிடம் பிடித்தார். இவர், 23 போட்டியில் 2 சதம், 8 அரைசதம் உட்பட 1143 ரன்கள் எடுத்துள்ளார். இரண்டாவது இடத்தில் இந்தியாவின் விராத் கோஹ்லி (29 போட்டி, 4 சதம், 6 அரைசதம், 1119 ரன்கள்), பாகிஸ்தானின் மிஸ்பா (26 போட்டி, 12 அரைசதம், 1119 ரன்கள்) உள்ளனர். நான்காவது, 5வது இடத்தில் முறையே ஆஸ்திரேலியாவின் ஜார்ஜ் பெய்லி (1098 ரன்கள்), இலங்கையின் சங்ககரா (1033 ரன்கள்) உள்ளனர். மற்றொரு இந்திய வீரர் ஷிகர் தவான் (21 போட்டி, 996 ரன், 4 சதம், 4 அரைசதம்) 6வது இடத்தில் உள்ளார்.