13வது திருத்தச் சட்டமும் தமிழ்நாட்டு அரசியல்வாதிகளின் பித்தலாட்டமும்

by **அருள்** Sat Aug 10, 2013 7:09 am

13வது திருத்தச் சட்டமும் தமிழ்நாட்டு அரசியல்வாதிகளின் பித்தலாட்டமும்
******************************************************

[You must be registered and logged in to see this image.]
இதே தமிழ்நாட்டு அரசியற் கட்சிகள் சிறிலங்காவில் 13வது திருத்தச் சட்டத்தில் குறிப்பிடப்பட்ட விடயங்கள் சில மீறப்பட்ட போது தமது கருத்துக்கள் எதனையும் முன்வைக்காது அமைதி காத்தன.

இவ்வாறு The New Indian Express ஆங்கில ஊடகத்தில் Shyam Balasubramanian எழுதியுள்ள Politicos blow hot and cold on Lanka statute change கட்டுரையில் சுட்டிக்காட்டப்பட்டுள்ளது.

இலங்கைத் தமிழ் மக்களுக்கு அரசியல் அதிகாரங்களை வழங்க வேண்டும் என்கின்ற சரத்தை உள்ளடக்கி 1987ல் உருவாக்கப்பட்ட இந்திய சிறிலங்கா ஒப்பந்தத்தின் கீழ் வரையப்பட்ட 13வது திருத்தச் சட்டத்தை சிறிலங்கா அரசாங்கம் நீர்த்துப் போக அல்லது ஒழிக்கும் நடவடிக்கையில் ஈடுபட்டுள்ளதானது இந்திய மத்திய அரசாங்கத்திற்கு பெரும் அழுத்தத்தை ஏற்படுத்தியுள்ளது.

அதாவது தமிழ்நாட்டைச் சேர்ந்த அரசியற்கட்சிகள், சிறிலங்காவின் இந்த முயற்சிக்கு இந்தியா ஆதரவளிக்கக் கூடாது என அழுத்தம் கொடுக்கின்றன. சிறிலங்கா அரசாங்கம் 13வது திருத்தச் சட்டத்தை நடைமுறையாக்குவதற்கு இதுநாள் வரையில் எவ்வித உறுதியான நடவடிக்கைகளையும் முன்னெடுக்காததால் இந்திய மத்திய அரசாங்கம் பெரிதும் அதிருப்தியடைந்துள்ளது.

இந்த விடயத்தில் மிகவும் கடும்போக்கான நகர்வொன்றை முன்னெடுக்க வேண்டும் என தமிழ்நாட்டு முதலமைச்சர் ஜெ.ஜெயலலிதா, இந்தியப் பிரதமர் மன்மோகன் சிங்கிற்கு எழுதிய கடிதம் ஒன்றில் கோரியிருந்தார். மார்ச் 27,2013 எனத் திகதியிடப்பட்டு எழுதப்பட்ட கடிதம் ஒன்றில், சிறிலங்காவில் வாழும் தமிழ் மக்கள் தனித் தமிழீழம் ஒன்றைப் பெற்று வாழ்வதற்கான கருத்து வாக்கெடுப்பு ஒன்றை மேற்கொள்வதற்கான பரிந்துரையை ஐ.நா பாதுகாப்பு சபையில் இந்தியா முன்மொழிய வேண்டும் எனவும் தமிழ்நாட்டு முதலமைச்சர் கோரியிருந்தார்.

இதேவேளையில், திராவிட முன்னேற்றக் கழகத் தலைவர் மு.கருணாநிதியின் கீழ் செயற்படும் தமிழீழ ஆதரவாளர் அமைப்பு (ரெசோ) யூலை 16 அன்று மேற்கொண்ட சந்திப்பில், சிறிலங்காவில் நவம்பரில் நடக்கவுள்ள பொதுநலவாய அமைப்பின் அரசாங்கத் தலைவர்கள் ஒன்றுகூடும் உச்சி மாநாட்டை இந்தியா புறக்கணிக்க வேண்டும் எனவும், 13வது திருத்தச் சட்டம் நடைமுறைப்படுத்தப்படுவதை உறுதிப்படுத்த வேண்டும் எனவும் கோரி இந்திய மத்திய அரசாங்கத்திற்கு அழுத்தத்தை வழங்கும் நோக்குடன் ஆகஸ்ட் 08 அன்று தமிழ்நாடு முழுவதிலும் ஆர்ப்பாட்டப் பேரணி ஒன்றை நடாத்துவதெனத் தீர்மானித்தது.

சிறிலங்காவில் 13வது திருத்தச் சட்டத்தை நீர்த்துப் போகச் செய்வதற்கான நடவடிக்கைகளை அந்நாட்டு அரசாங்கம் முன்னெடுக்கும் அதேவேளையில், கடந்த சில மாதங்களாக இத்திருத்தச் சட்டம் நடைமுறைப்படுத்தப்பட வேண்டும் என்பதை வலியுறுத்தி தமிழ்நாட்டில் பல்வேறு நடவடிக்கைகள் மேற்கொள்ளப்பட்டு வருகின்றன. இந்த விடயமானது தற்போது சிறிலங்கா மற்றும் அனைத்துலக நாடுகளின் ஊடகங்களில் முதன்மையாகப் பேசப்படுகின்றது. ஆனால் இதற்கு முன்னர் தமிழ்நாட்டு அரசியல்வாதிகள் இத்திருத்தச் சட்டம் தொடர்பில் தமது கவனத்தை முன்வைக்கவில்லை என்பதும் இங்கு குறிப்பிடத்தக்கதே.

இதே தமிழ்நாட்டு அரசியற் கட்சிகள் சிறிலங்காவில் 13வது திருத்தச் சட்டத்தில் குறிப்பிடப்பட்ட விடயங்கள் சில மீறப்பட்ட போது தமது கருத்துக்கள் எதனையும் முன்வைக்காது அமைதி காத்தன.

குறிப்பாக 13வது திருத்தச் சட்டத்தின் கீழ் வடக்கு கிழக்கு பிரிக்கப்படக் கூடாது எனக் குறிப்பிடப்பட்ட போதிலும், 2006ல் வடக்கு கிழக்கு பிரிக்கப்பட்டு, இரு மாகாணங்களாக மாற்றப்படுவதாக சிறிலங்கா உயர் நீதிமன்றம் அறிவித்த போது இந்த விடயத்தில் இந்திய மத்திய அரசாங்கமும் தமிழ்நாட்டு அரசியற் கட்சிகளும் எவ்வித எதிர்ப்பையும் காட்டாது அமைதி காத்தன.

தமிழீழ விடுதலைப் புலிகள் ஆயுதங்களைக் கீழே போட்டுவிட்டு பிரதான அரசியல் நீரோட்டத்துடன் கலக்க வேண்டும் என்பதை 13வது திருத்தச் சட்டம் வலியுறுத்தியதால் புலிகள் இதனை முற்றாக எதிர்த்தனர். புலிகளின் கோரிக்கைகள் எவற்றையும் இத்திருத்தச் சட்டம் திருப்திப்படுத்ததால் புலிகள் இதனை நிராகரித்தனர். ஈழத்தமிழர்களின் பிரச்சினை என்பது தமிழ்நாட்டு அரசியலில் மிகப் பெரும் உணர்வலையை ஏற்படுத்துகின்ற ஒன்றாகக் காணப்பட்டது.

இதற்காக தமிழ்நாட்டு அரசியற் கட்சிகள் அனைத்தும் ஒரேவிதமான நடவடிக்கைகளை முன்னெடுத்தன. அப்போதைய முதலமைச்சர் எம்.ஜி.இராமச்சந்திரன் மட்டும் இதற்கு விதிவிலக்காக இருந்தார். 13வது திருத்தச் சட்டம் வெற்றிபெறுவதை உறுதிப்படுத்துமாறு சிறிலங்காவில் செயற்பட்ட அனைத்து தமிழ் ஆயுதக் குழுக்களிடமும் இராமச்சந்திரன் கோரிக்கை விடுத்திருந்தார்.

சிறிலங்காவில் தமிழர் வாழும் மாகாணங்களுக்கு தன்னாட்சி வழங்கி, கருத்து வாக்கெடுப்பு மேற்கொள்ள வேண்டும் எனவும் கருணாநிதி கோரிக்கை விடுத்திருந்தார். 2012ல் மீண்டும் ரெசோ அமைப்பிற்கு கருணாநிதி புத்துயிர் அளித்த போது, ஈழத்தமிழ் மக்களுக்கான தனித் தமிழீழம் வழங்கப்பட வேண்டும் என்பதை வலியுறுத்தினார். ஆனால் சில மாதங்களின் பின்னர் ஏற்பட்ட உண்மையான அரசியல் மாற்றங்கள், மற்றும் நடைமுறை உண்மைகள் போன்றவற்றால் கருணாநிதி தான் முன்வைத்த கோரிக்கையிலிருந்து பின்வாங்க வேண்டிய நிலை ஏற்பட்டது.

“தமிழ்நாட்டின் பிரதான அரசியற் கட்சிகளின் போக்கானது அரசியல் போட்டித்தன்மையின் விளைவால் மாற்றமுறுகிறது. கருணாநிதியின் தற்போதைய நிலைப்பாடானது, சிறிலங்காவில் இறுதிக்கட்ட யுத்தம் நடந்தபோது இந்திய மத்திய அரசாங்கத்திற்கு இவர் வழங்கிய ஆதரவின் அடிப்படையில் நோக்கப்பட வேண்டியுள்ளது. இவர் தனது ஆதரவை இந்திய மத்திய அரசாங்கத்திற்கு தொடர்ந்தும் வழங்கி வந்தார். ஆனால் தற்போது மீண்டும் தான் தமிழ் மக்களின் மீட்பார் என்பதைக் காட்டிக் கொள்ள விரும்புகிறார். இதனாலேயே இவர் ரெசோ அமைப்பிற்கு மீண்டும் புத்துயிரளித்துள்ளார்” என அரசியல் வல்லுனரான பேராசிரியர் வி.சூர்யநாராயணன் சுட்டிக்காட்டியுள்ளார்.

தமிழ்நாட்டில் செயற்படும் சிறிய கட்சிகள் கடந்த இரு பத்தாண்டுகளாக தாம் கைக்கொண்டு வந்த நிலையிலிருந்து பெரிதும் மாறவில்லை. ஆனால் ம.தி.மு.க தலைவர் வைகோ, ப.ம.க தலைவர் இராமதாஸ், நாம் தமிழர் கட்சித் தலைவர் சீமான் ஆகியோர் ஐ.நா ஆதரவுடன் மேற்கொள்ளப்படும் கருத்துவாக்கெடுப்பு மூலம், சிறிலங்காத் தமிழ் மக்களுக்கு தன்னாட்சியுடன் கூடிய தனித் தமிழீழம் பெற்றுக் கொடுப்பது உறுதிப்படுத்தப்பட வேண்டும் எனத் தொடர்ந்தும் குரல்கொடுத்து வருகின்றனர்.

புதினப்பலகை- நித்தியபாரதி.