USAஉளவு நிறுவனமான NSA வால் அதிகளவு இந்தியக் கணணி நெட்வேர்க்குகள் வேவு

by **logu** Mon Jun 10, 2013 8:14 am

அமெரிக்காவின் அரச புலனாய்வுத் துறையான NSA இனால் அதன் எதிரி மற்றும்
போட்டி நாடுகளின் கணணி நெட்வேர்க்குகள் அனுமதியின்றி வேவு பார்க்கப் பட்டு
வருகின்றன.

இதன் அடிப்படையில் NSA ஆல் ஈ-மெயில், குறுந்தகவல்கள் உட்பட கணணி
நெட்வேர்க்குகள் தீவிரமாக வேவு பார்க்கப் படும் நாடுகளின் பட்டியலில்
இந்தியா 5 ஆவது இடத்தில் இருப்பதாக அதிர்ச்சித் தகவல் வெளியாகியுள்ளது.

இத்தகவலை
பிரிட்டன் பத்திரிகையான தி கார்டியனில் ஞாயிற்றுக் கிழமை வெளியிடப்பட்ட
அறிக்கை ஊர்ஜிதப் படுத்தியுள்ளது. அதாவது இவ்வருடம் மார்ச் மாதம் மட்டும்
NSA ஆல் 6.3 பில்லியன் புலனாய்வுத் தகவல்கள் இந்தியாவிலுள்ள கணணி
நெட்வேர்க்குகளில் இருந்து திரட்டப் பட்டுள்ளது.

மேலும் NSA ஆல் வேவு பார்க்கப் படும் நாடுகளின் பட்டியலில் ஈரான் 14
பில்லியன் தகவல்களுடன் முதலாம் இடத்திலும், பாகிஸ்தான் 13.5 பில்லியன்
தகவல்களுடன் 2 ஆவது இடத்திலும், ஜோர்டான் 12.7 பில்லியன் தகவல்களுடன் 3
ஆவது இடத்திலும் எகிப்து 7.6 பில்லியன் தகவல்களுடன் 4 ஆவது இடத்திலும்
உள்ளன.

2013 மார்ச்சில் மட்டும் NSA ஆல் உலகம் முழுவதும் 97
பில்லியன் புலனாய்வுத் தகவல்கள் கணணி நெட்வேர்க்குகளில் இருந்து திரட்டப்
பட்டுள்ளன. இத்தகவல்களைத் திருடக் கூடியவாறு மிக உயர்ந்த தகவல் தொழிநுட்ப
ஆற்றலை NSA கொண்டிருப்பதாகவும் இப் பத்திரிகையில் குறிப்பிடப் பட்டுள்ளது.

இதேவேளை முன்னர் வெளியாகியிருந்த தகவல்களின் படி PRISM எனும்
செயற்திட்டம் மூலம் அமெரிக்காவைத் தளமாகக் கொண்ட முக்கிய 9 இணைய
நிறுவனங்களிடம் இருந்து அமெரிக்க அரசு தகவல்களை இலகுவாகத் திரட்ட
அந்நிறுவனங்கள் அனுமதி வழங்கியிருப்பதாகக் கூறப்பட்டிருந்தது.

குறித்த
அந்த நிறுவனங்கள் Google, AOL, Apple, Yahoo, Microsoft, Skype,
Facebook, YouTube மற்றும் PalTalk ஆகியவை ஆகும். ஆனால் இந்த நிறுவனங்கள்
அமெரிக்க அரசுக்கு தகவல்களை வழங்குவதை மறுத்துள்ளன. இதனை Facebook இன்
இயக்குனர் மார்க் சூக்கெர்பேர்க் உம் Google இயக்குனர் லாரி பேஜ் உம் தாம்
நேரடியாக அரசுக்கு செய்திகளை வழங்குவதை வெள்ளிக்கிழமை மறுத்திருந்தனர்.

இவ்விடயம்
தொடர்பாக அமெரிக்க அதிபர் ஒபாமா கருத்துரைக்கையில் NSA இன் இச்செயற்பாடு
அமெரிக்க குடி மக்களை மட்டும் இலக்காகக் கொண்டதல்ல என்று தெரிவித்திருந்தமை
குறிப்பிடத்தக்கது.