சொத்துக் குவிப்பு வழக்கில் தப்பினார் லாலு : பீகார் அரசு முயற்சிக்கு அடி

by **அருள்** Fri Apr 02, 2010 5:34 am

புதுடில்லி
: 'பீகார் முன்னாள் முதல்வர் லாலு பிரசாத் யாதவும், அவரின் மனைவி ரப்ரி
தேவியும் வருமானத்திற்கு அதிகமாக சொத்து சேர்த்ததாக தொடரப்பட்ட வழக்கில்,
சி.பி.ஐ., சிறப்பு கோர்ட் அளித்த தீர்ப்பை எதிர்த்து அப்பீல் செய்ய பீகார்
மாநில அரசுக்கு அதிகாரம் இல்லை' என, சுப்ரீம் கோர்ட் உத்தரவிட்டுள்ளது.
லாலு, ரப்ரியை விடுவித்து சிறப்பு கோர்ட் அளித்த தீர்ப்பு செல்லும்
என்றும் கூறியுள்ளது.

பீகாரில் 1990 முதல் 1997ம் ஆண்டு வரை லாலு
பிரசாத் யாதவ் முதல்வராக இருந்தார். அப்போது, வருமானத்திற்கு அதிகமாக 46
லட்சம் ரூபாய் அளவுக்கு சொத்துகள் சேர்த்ததாக அவர் மீதும், அவரின் மனைவி
ரப்ரி தேவி மீதும் குற்றம் சாட்டப்பட்டது. இந்த வழக்கை சி.பி.ஐ.,
விசாரித்தது. பின், சி.பி.ஐ., சிறப்பு கோர்ட்டில் நடந்த இந்த வழக்கில்,
2006 டிசம்பர் 18ம் தேதி, நீதிபதி முனிலால் பஸ்வான் தீர்ப்பு வழங்கினார்.
'லாலுவும், ரப்ரி தேவியும் குற்றமற்றவர்கள்' என அறிவித்தார். இந்த
தீர்ப்பை எதிர்த்து ஐகோர்ட்டில் அப்பீல் செய்வதில்லை என, சி.பி.ஐ., முடிவு
செய்தது. ஆனால், தீர்ப்பை எதிர்த்து பாட்னா ஐகோர்ட்டில், பீகார் மாநில
அரசு அப்பீல் மனு தாக்கல் செய்தது. இந்த மனுவை விசாரணைக்கு ஏற்றுக்கொண்ட
ஐகோர்ட், 'குற்றவியல் நடைமுறைச் சட்டம் பிரிவு 378ன் கீழ், லாலு, ரப்ரி
விடுவிக்கப்பட்டதை எதிர்த்து பீகார் மாநில அரசு அப்பீல் மனு தாக்கல்
செய்தது சரியானதே' என்றது. இந்தத் தீர்ப்பை எதிர்த்து லாலுவும், அவரின்
மனைவியும் சுப்ரீம் கோர்ட்டில் அப்பீல் மனு தாக்கல் செய்தனர். அதேபோல்,
சி.பி.ஐ.,யும் அப்பீல் மனு செய்தது.

சி.பி.ஐ., தாக்கல் செய்த மனுவில், 'சி.பி.ஐ.,
விசாரித்த ஒரு வழக்கில், கோர்ட் அளித்த தீர்ப்பை எதிர்த்து அப்பீல் செய்ய
மாநில அரசுக்கு அதிகாரம் இல்லை. மத்திய அரசின் நிர்வாக முடிவுக்கு எதிராக
மாநில அரசு செயல்பட முடியாது' என்றது. லாலு, ரப்ரியும் இதே கருத்தை
தெரிவித்தனர். பீகார் அரசோ, 'லாலு, ரப்ரிக்கு எதிரான வழக்கை சி.பி.ஐ.,
விசாரித்திருந்தாலும், அந்த குற்றம் நிகழ்ந்தது பீகார் மாநிலம் என்பதால்,
வழக்கில் சி.பி.ஐ., சிறப்பு கோர்ட் அளித்த தீர்ப்பை எதிர்த்து மாநில அரசு
அப்பீல் செய்ய முடியும். அதனால், எங்களின் அப்பீல் மனுவை பாட்னா ஐகோர்ட்
விசாரணைக்கு ஏற்றது சரியானதே' என்றது. இந்த வழக்கில் கடந்த மார்ச் 10ம்
தேதி, இறுதிக் கட்ட விசாரணை நடந்தது.

வழக்கை விசாரித்த தலைமை நீதிபதி
கே.ஜி.பாலகிருஷ்ணன், நீதிபதிகள் லோதா மற்றும் சவுகான் ஆகியோர் அடங்கிய
சுப்ரீம் கோர்ட் பெஞ்ச் நேற்று பிறப்பித்த உத்தரவு விவரம் வருமாறு:
வருமானத்திற்கு அதிகமாக சொத்து சேர்த்ததாக, லாலு மற்றும் ரப்ரிக்கு எதிராக
தொடரப் பட்ட வழக்கில், சிறப்பு கோர்ட் அளித்த தீர்ப்பை எதிர்த்து அப்பீல்
செய்ய, பீகார் மாநில அரசுக்கு அதிகாரம் இல்லை. இந்த வழக்கை
பொறுத்தமட்டில், மத்திய அரசோ அல்லது சி.பி.ஐ., அமைப்போ தான் அப்பீல்
செய்வது பற்றி முடிவு செய்ய முடியும். மாநில அரசு அப்பீல் செய்ய முடியாது.
எனவே, லாலு, ரப்ரியை சி.பி.ஐ., சிறப்பு கோர்ட் விடுவித்தது செல்லும்.
இவ்வாறு நீதிபதிகள் தெரிவித்தனர். சுப்ரீம் கோர்ட்டின் இந்த உத்தரவால்,
லாலு மற்றும் ரப்ரி தேவிக்கு நிவாரணம் கிடைத்துள்ளது.

சுப்ரீம் கோர்ட் கடவுள்: இத்
தீர்ப்பு பற்றி கருத்து தெரிவித்த லாலு, ''நீதித்துறை மீது நான் மிகுந்த
நம்பிக்கை வைத்துள்ளேன். சுப்ரீம் கோர்ட் கடவுள் போன்றது; அதன் தீர்ப்பு
முற்றிலும் வரவேற்கத்தக்கது மற்றும் ஏற்றுக் கொள்ளத்தக்கது,'' என்றார்.
இதேபோல், லாலுவுக்கு ஆதரவாக கிடைத்த தீர்ப்பை, லோக் ஜனசக்தி கட்சித்
தலைவர் ராம்விலாஸ் பஸ்வானும் வரவேற்றுள்ளார்.

பீகார் துணை முதல்வர் சுஷில்குமார் மோடி இது
பற்றி கூறுகையில், ''சுப்ரீம் கோர்ட் தீர்ப்பு குறித்து சட்ட
நிபுணர்களுடன் மாநில அரசு கலந்து ஆலோசிக்கும்; அதன் பின், எதிர்கால
நடவடிக்கை பற்றி முடிவு செய்யும்,'' என்றார். பிரச்னை ஓயவில்லை: சுப்ரீம்
கோர்ட் அளித்த தீர்ப்பால், வருமானத்திற்கு அதிகமாக சொத்து சேர்த்த
வழக்கில் இருந்து லாலுவுக்கு விடுதலை கிடைத்தாலும், பிரச்னைகளில் இருந்து
அவர் முழுமையாக விடுபடவில்லை. பீகாரில் நிகழ்ந்த பல கோடி ரூபாய் மாட்டுத்
தீவன ஊழலில், லாலுவுக்கு எதிராக தொடரப்பட்ட ஆறு வழக்குகள் பல்வேறு
கட்டத்தில் விசாரணை நிலையில் உள்ளன. அந்த வழக்குகளில் இருந்தும்
விடுவிக்கப்பட்டால் மட்டுமே, அவர் முழு நிவாரணம் பெற முடியும்.