விமான பயணம்; நட்சத்திர ஓட்டல் 'ஜாலி' : இன்ஸ்பெக்டர் சஸ்பெண்ட்

சென்னை
: மனு அளிக்க வந்தவரிடம் பணம் வாங்கிய விவகாரத்தில், மத்திய குற்றப்பிரிவு
இன்ஸ்பெக்டர் செந்தில் குமார் நேற்று அதிரடியாக சஸ்பெண்ட் செய்யப்பட்டார்.

சென்னை போலீஸ் கமிஷனர் அலுவலகத்தில், மத்திய
குற்றப்பிரிவு நிர்வாகப் பிரிவில் இன்ஸ்பெக்டராக பணியாற்றியவர் செந்தில்
குமார். 1987ம் ஆண்டு நேரடி எஸ்.ஐ.,யாக பணியில் சேர்ந்த இவர்,
பெரும்பாலும் போலீஸ் உயர் அதிகாரிகளின் கீழ் வரும் சிறப்பு பிரிவுகளிலேயே
பணியாற்றியுள்ளார்.இதனால், நேரடி ஐ.பி.எஸ்., அதிகாரிகள் பலரின் கீழ்
பணியாற்றும் வாய்ப்பு ஏற்பட்டது. இதைப் பயன்படுத்திக் கொண்டு,
உயரதிகாரிகளை மதிக்காமல் மெத்தனமாகவே நடந்தார். ஒரு ஆண்டுக்கு முன் சென்னை
மத்திய குற்றப்பிரிவு நிர்வாக பணியில் செந்தில்குமார்
நியமிக்கப்பட்டார்.மத்திய குற்றப்பிரிவில் பல்வேறு மோசடி வழக்குகள்
விசாரிக்கப்படுகின்றன. பல கோடி ரூபாய் மோசடியில் ஈடுபட்டவர்களை
விசாரிக்கும் பொறுப்பை இந்த பிரிவினர் மேற்கொண்டு வருகின்றனர்.
இவ்வழக்குகளில் ஒரு சிலவற்றை குற்றப்பிரிவு துணை கமிஷனர் ஸ்ரீதர்,
செந்தில்குமாரிடம் ஒப்படைத்தார்.

இந்த வழக்குகள் சம்பந்தமாக விசாரணைக்கு வரும்
மனுதாரர் மற்றும் எதிர் மனுதாரர்களிடம் லட்சக்கணக்கில் லஞ்சம் பெற்றதாக,
செந்தில்குமார் மீது புகார் எழுந்துள்ளது.இதனால், செந்தில்குமாரை கட்டாய
மருத்துவ விடுப்பில் செல்லுமாறு, உயர் அதிகாரிகள் உத்தரவிட்டனர். மேலும்,
செந்தில்குமாரின் மீதான புகார்கள் குறித்து ரகசிய விசாரணைக்கும்
உத்தரவிடப்பட்டது.இந்த விசாரணையில் பல்வேறு அதிர்ச்சித் தகவல்கள்
தெரியவந்துள்ளன. வழக்கு தொடர்பாக தன்னிடம் வரும் மனுதாரரிடம் நடவடிக்கை
எடுப்பதற்காகவும், குற்றச்சாட்டப்பட்டவரிடம் வழக்கில் இருந்து காப்பதாக
கூறியும் செந்தில்குமார் பணம் வசூலித்ததாக தெரியவந்துள்ளது. அவரிடம்
ஒப்படைக்கப்பட்ட வழக்குகளில் இரு தரப்பிலும் செந்தில்குமார் பணம்
வசூலித்ததாக விசாரணையில் தெரிந்தது.

வழக்கு ஒன்றில் விசாரணைக்காக சென்னையில்
இருந்து விமானம் மூலம் செந்தில்குமார் மும்பை சென்றதும், அங்கு
மனுதாரரிடம் நட்சத்திர ஓட்டலில் அறை, 'ஜாலியாக' இருக்க வசதிகள் செய்து
தரும்படிகேட்ட தகவலும் வெளிச்சத்திற்கு வந்தது. இதையடுத்து, லஞ்ச புகார்
உண்மை தான் என சென்னை போலீஸ் கமிஷனர் ராஜேந்திரனுக்கு அறிக்கை
சமர்ப்பிக்கப்பட்டது.இந்த அறிக்கையின் அடிப்படையில், செந்தில்குமார் மீது
நடவடிக்கை எடுக்க பரிந்துரைக்கப்பட்டது. இதன் பேரில் செந்தில்குமாரை
சஸ்பெண்ட் செய்து டி.ஜி.பி., லத்திகா சரண் நேற்று முன்தினம்
உத்தரவிட்டார். இந்த உத்தரவு நகலை சென்னை மாநகர போலீசார் நேற்று காலை
செந்தில்குமாரிடம் வழங்கியதாக கூறப்படுகிறது.
சி.பி.ஐ., பெயரை சொல்லி மிரட்டல் :தற்போது
சஸ்பெண்ட் செய்யப்பட்டுள்ள செந்தில்குமார், சில ஆண்டுகள் சி.பி.ஐ.,யில்
பணிபுரிந்துள்ளார். இதனால் எதெற்கெடுத்தாலும், 'நான் சி.பி.ஐ.,யிலேயே
பணியாற்றியுள்ளேன். இங்குள்ளவர்கள் என்ன வேலை செய்கின்றனர்' என்று
அலுத்துக் கொள்வார் என, இவரோடு பணியாற்றிய போலீசார்
தெரிவித்துள்ளனர்.மேலும், சி.பி.ஐ., பெயரைச் செல்லி மனுதாரர் மற்றும்
எதிர் மனுதாரர்களை மிரட்டி, பணம் பெற்றார் என்ற குற்றச்சாட்டும் உள்ளது