காற்று பலமாக வீசியதால் தார்ப்பாய் தூக்கி வீசியது லாரியில் இருந்து விழுந்து 2 பேர் பரிதாப சாவு செங்குன்றம் அருகே நள்ளிரவில் சோகம்

by **Tamil** Sat Apr 20, 2013 8:13 am

புழல்: காற்று பலமாக வீசியதால் தார்ப்பாய் தூக்கி வீசியதில் லாரி கேபின்
மீது அமர்ந்திருந்த பிளஸ் 2 மாணவரும் வாலிபரும் கீழே விழுந்து பரிதாபமாக
இறந்தனர். ஒருவரது நிலைமை கவலைக்கிடமாக உள்ளது. செங்குன்றம் அருகே
நள்ளிரவில் இந்த சோக சம்பவம் நடந்தது.
திருவள்ளூர் மாவட் டம்
கும்மிடிப்பூண்டி அருகே புதுப்பாளையம் மங்களம் கிராமத்தை சேர்ந்தவர்
முருகன். இவரது மகன் சின்ன முருகன் என்ற பாண்டியன் (18). இவர், ஆரணி அரசு
மேல்நிலைப் பள்ளியில் பிளஸ் 2 தேர்வு எழுதி உள்ளார். முருகன் கீரை
வியாபாரம் செய்து வருகிறார். தந்தைக்கு உதவியாக பாண்டியனும் அடிக்கடி கீரை
வியாபாரத்துக்கு செல்வார். கீரை கட்டுகளை மொத்தமாக ஏற்றி வந்து கோயம்பேடு
மார்க்கெட்டில் விற்றுவிட்டு செல்வார்.

புதுப்பாளையம் கிராமத்தை
சேர்ந்த கோதண்ட ரெட்டி மகன் முரளி (28), முத்து (34) ஆகியோரும் கீரை மொத்த
வியாபாரம் செய்து வந்தனர். பாண்டியன், முரளி, முத்து ஆகிய மூவரும்
கும்மிடிப்பூண்டியில் இருந்து நேற்று நள்ளிரவு 12 மணி அளவில் கீரை கட்டுகளை
லாரியில் ஏற்றிக் கொண்டு கோயம்பேடு மார்க்கெட்டுக்கு வந்து
கொண்டிருந்தனர். மூவரும் லாரி கேபின் மீது அமர்ந்திருந்தனர்.செங்குன்றம்
அருகே சோழவரம் செங்காளம்மன் கோயில் பின்புறம் உள்ள பைபாஸ் ரோட்டில் லாரி
வேகமாக வந்து கொண்டிருந்தபோது, காற்று பலமாக வீசியுள்ளது. காற்றின்
வேகத்தில் கேபின் மீது இருந்த தார்ப்பாய் திடீரென தூக்கியது. அதன் மீது
அமர்ந்திருந்த 3 பேரும் நிலைதடுமாறி, லாரியில் இருந்து ரோட்டில்
விழுந்தனர். அவர்கள் மீது லாரி ஏறியதில் பாண்டியன், முரளி இருவரும் சம்பவ
இடத்திலேயே பரிதாபமாக இறந்தனர். முத்து படுகாயத்துடன் துடித்துக்
கொண்டிருந்தார்.

அந்த வழியாக சென்றவர்கள், விபத்தை பார்த்ததும்
போலீசுக்கு தகவல் கொடுத்தனர். சோழவரம் போலீசார் விரைந்து வந்து,
படுகாயமடைந்த முத்துவை மீட்டு சென்னை அண்ணாநகரில் உள்ள தனியார்
மருத்துவமனைக்கு அனுப்பி வைத்தனர். இறந்தவர்களின் உடல்களை மீட்டு பிரேத
பரிசோதனைக்காக கீழ்பாக்கம் அரசு மருத்துவமனைக்கு அனுப்பினர். விபத்தில்
இறந்த முரளிக்கு 9 மாதங்களுக்கு முன்புதான் திருமணம் நடந்தது. அவரது மனைவி
சாமுண்டீஸ்வரி, தற்போது கர்ப்பமாக இருக்கிறார்.

விபத்து நடந்ததும்
லாரி டிரைவர் தப்பியோடி விட்டார். வழக்கு பதிவு செய்துள்ள போலீசார்,
தலைமறைவாக உள்ள டிரைவரை தேடி வருகின்றனர். விபத்து காரணமாக செங்குன்றம்
சாலையில் போக்குவரத்து பாதிக்கப்பட்டது. தார்ப்பாய் தூக்கியதில் லாரியில்
இருந்து விழுந்து 2 பேர் பலியான சம்பவம் புதுப்பாளையம் கிராமத்தில் சோகத்தை
ஏற்படுத்தி உள்ளது.