பிரபாகரன் உண்மையில் மாவீரன் : பொன்சேகா சொல்லும் உண்மைகள்..!

by **அருள்** Sat Mar 16, 2013 7:37 am

உண்மையில் பிரபாகரன் சரணடைவதாக இருந்தால், சரணடைவதற்கான
சந்தர்ப்பம் இருந்தது. அப்படி அவர் சரணடைந்து இருந்தால் இன்று அமைச்சராக
இருந்திருப்பார். அவர் சரணடையவில்லை. இறுதி ரவை முடியும்வரை போராடுவதற்கு
அவர் தீர்மானித்தார். இவ்வாறு முன்னாள் இறாணுவத் தளபதி சரத் பொன்சேகா ஊடகம்
ஒன்றுக்கு வழங்கிய பேட்டியொன்றில் தெரிவித்துள்ளார்.

சமகால அரசியல் நிலைமைகள் தொடர்பில் வழங்கிய பேட்டியில் அவர் மேலும் தெரிவிக்கையில் :-

உண்மையில் அவர்கள் தீவிரவாதக் குழுவாக இருந்தாலும், பிரபாகரன் காட்டியது
வீரத்தின் இலட்சணம் என்பதை ஜெனரல் என்ற அடிப்படையில் நான்
ஏற்றுக்கொள்கின்றேன். சரணடையும் எண்ணம் எள்ளளவும் இல்லாத மனிதன் என்பதை
அவரில் நான் பார்க்கிறேன்.

இறுதிக் கட்டத்தின் போது, நந்திக் கடலின் வடக்குப் பகுதியில் மோதல்
இடம்பெற்றது. இந்த மோதலின் போது கிடைத்த சடலங்களில் பிரபாகரனின் சடலமும்
இருந்தது.

அந்த சந்தர்ப்பத்தில் சரணடைய வேண்டாம் என்று கத்தியதாகவும் அது
பிரபாகரனின் குரலாக இருக்கலாம் என்றும் வி.ஐ.ஆர். ரெஜிமெண்டில் இருந்த ஒரு
தமிழ் தெரிந்த இராணுவ அதிகாரி குறிப்பிட்டிருந்தார். அது பிரபாகரனின்
குரலாக இருக்கவேண்டுமென்று நான் கருதுகின்றேன். எனவே சரணடையும்
நடவடிக்கைகள் இடம்பெறவில்லை. 17 ஆம் திகதி முதல் 19 ஆம் திகதி காலை வரை
பாரிய மோதல் ஒன்று இடம்பெற்றது. எமது இராணுவ வீரர்களும்
உயிர்ப்பலியானார்கள். அது குறித்து யாரும் கதைக்கவில்லை.

இந்தப் பகுதியில் மிகவும் நெருக்கமான நிலையிலேயே யுத்தம் நடைபெற்றது.
இதன்போது எவரும் சரணடையவில்லை. இரவு பகலாக 48 மணிநேரம் மோதல் இடம்பெற்றது.
இவ்வாறான ஒரு சந்தர்ப்பத்தில் சரணடைவதும் கடினமானது. மோதலில் இறங்கிய
பின்னர் அந்த வழி யில் செல்வதும் கடினமானது. ஏனென்றால் எமது வீரர்களும்
கொமாண்டோக்களும் ஒவ்வொரு இடத்தாலும் நுழைந்திருந்தார்கள்.

இது அவ்வாறானதொரு மோதலாக இருந்தது. இந்த மோதலில் இருந்து விலகுவதற்கும்
சரணடைவதற்கும் சந்தர்ப்பம் இருக்கவில்லை. அவர் சரணடைய வேண்டும் என்று
இருந்தால் அதற்குப் பல சந்தர்ப்பங்கள் இருந்தன. இதன்போது வேறு யாரும்
சரணடைய முயற்சிக்கவில்லை. இந்த மோதலின் போது தீவிரவாதிகள் சுமார் 400 இற்கு
மேல் உயிரிழந்தார்கள். அந்தச் சந்தர்ப்பத்தில் சரணடையும் நடவடிக்கைகள்
இடம்பெறவில்லை.

இறுதிக்கட்டத்தின்போது, 14 ஆம் திகதி அளவி ல் 85,000 பொதுமக்கள்
சரணடைந்தனர். முல்லைத்தீவு களப்பு பகுதியில் இருந்து தப்பி வந்து
சரணடைந்தனர். அந்த சந்தர்ப்பத்தில் தீவிரவாத குழுத் தலைவர்கள் இருப்பதாக
தெரிவித்தனர். பிரபாகரன் இருப்பதாக யாரும் கூறவில்லை. அதன் பின்னர் யாரும்
சரணடையவில்லை என அவர் குறிப்பிட்டார்.

சர்வதேசத்தின் தலையீடு இந்த சந்தர்ப்பத்தில் இருந்ததா? என்ற
கேள்விக்குப் பதிலளித்த அவர்:- மீண்டும் பொய் வழக்கில் சிக்கி சிறைச்சோறு
சாப்பிடுவதற்கு நான் விரும்பவில்லை என்றார். மேலும், அது தொடர்பில்
ஊடகங்களில் வெளியான தகவல்களை நீங்கள் அறிந்திருப்பீர்கள். நீங்கள் எதைக்
கண்டீர்களோ, அதையேதான் நானும் காண்கிறேன் எனவும் கூறினார்.

தற்போது இலங்கைக்கு எதிராக மனித உரிமை மீறல் குற்றச்சாட்டுக்களை
சுமத்தும் நாடுகள், போர் நடைபெற்ற காலத்தில் விடுதலைப் புலிகளுக்கு எதிரான
யுத்தத்திற்கு ஒத்துழைப்புகளை வழங்கியிருந்தன. கடற்புலிகளை
எதிர்கொள்வதற்கும் புலிகளின் கடல் கலன்களை அழிப்பதற்கும் ஆயுத விநியோகத்தை
தடுப்பதற்கும் பாரியளவில் அந்த நாடுகள் உதவிகளை வழங்கியிருந்தன.

இந்த நாடுகளின் உதவி இல்லாமல், எமக்கு இந்த யுத்தத்தை வெல்வது கடினமாக
இருந்திருக்கும். இந்தியா, அமெரிக்கா போன்ற நாடுகளின் பாரிய உதவியினால்தான்
யுத்தத்தை வெற்றிகொள்ள முடிந்தது. இலங்கை அரசு அவர்களை உரிய முறையில்
கையாளத் தவறியுள்ளமையினால் தான் அந்த நாடுகள் இலங்கைக்கெதிரான நடவடிக்கைகளை
முன்னெடுக்கின்றன எனவும் பொன்சேகா மேலும் தெரிவித்துள்ளார்.