ஐநா அறிக்கை சொல்லும் பகீர் உண்மைகள்… என்ன செய்யப் போகிறது இந்தியா?

இறுதிப் போர் குறித்து பொய்யான தகவல்கள்… 40000 தமிழர் படுகொலை… மனிதகுலம் பார்த்திராத கொடூரம்! – ஐநா அறிக்கை


வன்னிப் போர்... மே 14, 2009

நியூயார்க்: இலங்கையில்
விடுதலைப் புலிகளுக்கு எதிராக இலங்கை அரசு நடத்திய இறுதிப் போரில் 40000
தமிழர்களுக்கு மேல் கொல்லப்பட்டனர் என்றும், அனைத்து போர் விதிமுறைகளையும்
அந்நாடு மீறிவிட்டதாகவும், போர் தொடர்பாக பொய்யான தகவல்களையே கூறி
வந்ததென்றும் ஐநாவின் நிபுணர் குழு அறிக்கை குற்றம்சாட்டியுள்ளது.
இலங்கையில் இறுதிக்கட்ட போர் நடந்தபோது இலங்கை அரசு போர் விதிமுறைகளை மீறி அப்பாவி மக்களை கொன்று குவித்ததாக புகார் கூறப்பட்டது.
இது தொடர்பான விசாரணை நடத்த ஐ.நா.சபை இந்தோனேசிய அட்டர்னி ஜெனரல்
மார்சுகி தருஷ் மென் தலைமையில் 3 பேர் கொண்ட விசாரணை குழுவை அமைத்தது.
அவர்கள் முழுமையாக விசாரணை நடத்தி 214 பக்க அறிக்கையை ஐ.நா. சபையிடம்
தாக்கல் செய்தனர்.
இந்த அறிக்கை அதிகாரப்பூர்வமாக வெளியிடப்படாமல் இருந்தது. ஆனாலும்
அறிக்கையில் உள்ள பல தகவல்கள் கடந்த வாரமே ரகசியமாக வெளிவந்துவிட்டன.
ராஜபக்சே ஆதரவுப் பத்திரிகைகள்தான் இதனை முதலில் வெளியிட்டன. இப்போது
ஐ.நா.சபை இந்த அறிக்கையை அதிகாரப்பூர்வமாக வெளியிட்டு உள்ளது.
முன்பு வெளிவந்த அத்தனை தகவல்களுமே உறுதியாகியுள்ளது, இந்த அதிகாரப்பூர்வ அறிக்கையைப் பார்க்கும்போது.

இந்த அறிக்கையின் சில முக்கிய பகுதிகள்:
இறுதிக்கட்ட போர் நடந்த நேரத்தில் 3 லட்சத்து 30 ஆயிரம் தமிழர்கள் ஒரே
இடத்தில் முடக்கப்பட்டனர். அவர்களை விடுதலைப் புலிகள் மனித கேடயமாகவும்
பயன்படுத்தினர். அதில் இருந்து தப்பி ஓட முயன்றவர்கள் குண்டுகளுக்கு
பலியாகினர். சிங்களப் படை, விடுதலைப் புலிகள் இருதரப்புமே மனித உரிமைகளை
மீறி போர் குற்றங்களைச் செய்துள்ளனர்.
ஆனால் பொதுமக்கள் தங்கி இருந்த இடங்களில் ராணுவம் தெரிந்தே குண்டுகளை
வீசியது. மருத்துவமனை மற்றும் மனிதாபிமான முக்கியத்துவம் வாய்ந்த
இடங்களிலும் கடுமையான குண்டுவீச்சை படையினர் மேற்கொண்டனர். இதன் மூலம் 40
ஆயிரத்துக்கும் மேற்பட்ட அப்பாவி மக்கள் கொல்லப்பட்டனர். கொல்லப்பட்டோர்
எண்ணிக்கை இதற்கு மேலும் கூட இருக்கலாம்.
போரில் பயன்படுத்த தடை விதிக்கப்பட்ட குண்டுகளை இலங்கை படைத் தரப்பு
வீசியுள்ளது. இரு தரப்பினரும் பொதுமக்கள் அருகில் இருந்தபடியே ஆயுதங்களை
பயன்படுத்தினார்கள். போரில் பாதிக்கப்பட்ட மக்களுக்கு மனிதாபிமான உதவி
செய்யவில்லை. அடிப்படை உரிமைகள் முற்றாக மீறப்பட்டன. போர் பகுதிக்குள் ஊடக
அடக்குமுறை கையாளப்பட்டது. உண்மையைச் சொல்ல முயன்ற பத்திரிகைகள்
அடக்கப்பட்டன. பத்திரிகையாளர்கள் தாக்குதலுக்குள்ளாகினர்.

தமிழ்ப் பெண்களை மிகக் கொடூரமாக மானபங்கப்படுத்தியுள்ளது இலங்கை
படைத்தரப்பு. கற்பழிப்புகள் சர்வசாதராணமாக நடந்துள்ளன. பெண்கள் முழுமையாக
நிர்வாணமாக்கப்பட்டும் கூட்டாக கற்பழிக்கப்பட்டும் சிதைக்கப்பட்டுள்ளனர்.
அங்கு நடந்த படுகொலைகள் போர் குற்றமாகும். எனவே இலங்கை அரசு மீது போர் குற்ற விசாரணை நடத்தலாம்.
அனைத்துமே பொய்யான தகவல்கள்
இலங்கையின் இறுதிக் கட்டப் போர் குறித்தும், கொல்லப்பட்ட தமிழர்கள்
குறித்தும், தமிழர் பாதுகாப்பு குறித்தும் இலங்கை சொன்ன அனைத்துமே பொய்யான
தகவல்கள் என்பது ஊர்ஜிதப்படுத்தப்படுகிறது.
சர்வதேசத்தின் முன் அனைத்து உண்மைகளையும் மறைத்துவிட்டது இலங்கை.
1 லட்சம் பேருக்கு மேல் காணவில்லை
அதேபோல இறுதிப் போரின் போது, பாதுகாப்பு வலயப் பகுதிக்கு வந்த
தமிழர்களில் 1 லட்சம் பேருக்கு மேல் காணவில்லை அல்லது கணக்கில்
காட்டப்படவில்லை. இந்த எண்ணிக்கையை இலங்கை அரசு வேண்டுமென்றே குறைத்துக்
காட்டியுள்ளது.
கொல்லப்பட்ட புலிகளின் தலைவர்கள்

புலிகளின் முக்கியத் தலைவர்கள் சரணடைய வந்தபோது, அவர்களை சர்வதேச
சட்டங்களை மீறி சுட்டும் சித்திரவதைப்படுத்தியும் கொன்றுள்ளது இலங்கைப்
படை.
இசைப்பிரியா போன்ற ஆயுதமேந்தாத கலைஞர்களையும் சிவிலியன்களையும் மிக மோசமாக சிதைத்துள்ளனர் ராணுவத்தினர்.
தங்களிடம் பிடிபட்ட போராளிகள், குறிப்பாக பெண் போராளிகளை உலகிலேயே
இதுவரை யாரும் செய்யாத அளவு கொடூரமான முறையில் கொன்று குவித்திருப்பது
தெரிகிறது. சில பெண்களை கொல்லப்பட்ட பிறகு ராணுவத்தினர் கற்பழித்து
சிதைத்திருப்பதும் உறுதிப்படுத்தப்பட்டுள்ளது. இவை மனித இனத்துக்கே எதிரான
மிகப் பெரிய குற்றங்கள். இதற்கு சேனல் 4 மற்றும் பல ஊடகங்களிடம் உள்ள
வீடியோ ஆதாரங்கள் தகுதியான சான்றுகளே.

பட்டினியால் பல ஆயிரம்பேரைக் கொன்ற இலங்கை
போருக்குப் பின் சரணடைந்த தமிழர்கள் பாதுகாப்பு முகாம்களில்
அடைக்கப்பட்டனர். இவர்களின் எண்ணிக்கையை வேண்டுமென்றே இலங்கை அரசு
குறைத்துச்சொன்னது நிரூபணமாகியுள்ளது. இப்படி குறைத்துச் சொன்னதால், உலக
உணவுத் திட்டத்தின் வழங்கப்பட்ட உணவின் அளவும் குறைந்தது.
இதனால், உணவுப் பற்றாக்குறை ஏற்பட்டது. இலங்கை அரசு தமிழர் எண்ணிக்கையை
குறைத்துக் காட்டியதாலேயே இந்த நிலை ஏற்பட்டது. இதனால் பல ஆயிரம்
தமிழர்கள் பட்டினியாலும் கொடிய நோய்களாலும் சத்து பற்றாக்குறையாலும்
இறந்துள்ளனர்.

-இப்படி இலங்கைக்கு எதிரான ஐநாவின் குற்றப்பட்டியல் நீண்டுகொண்டே
போகிறது. உலகில் வேறு எந்த நாடும் செய்யாத அளவு, மனிதகுலமே கண்டிராத
கொடுமைகளை இலங்கை அரசு தமிழர்களுக்கு எதிராக அரங்கேற்றியதையும், செய்து
வருவதையும் எந்த தயக்கமும் இன்றி தெள்ளத் தெளிவாக எடுத்துக் கூறியுள்ளது
ஐநா நிபுணர் குழு.
இப்போது சர்வதேச சமூகம் உரத்துக் கேட்பது ஒன்றைத்தான்:
இலங்கையின் போர்க்குற்றங்களுக்கு உற்ற தோழனாய் நின்ற இந்தியா என்ன செய்யப் போகிறது?
ஐநா வெளியிட்டுள்ள 214 பக்க அறிக்கை முழுமையாக