பாலாவின் பரதேசி - விமர்சனம் Paradesi movie review

தமிழ் சினிமா வரலாற்றில், ஏன் இந்திய சினிமா
வரலாற்றில் திரைப்பட கலையின் உச்சகட்டத்தை தொட்ட மிகச்சில படங்களில் இந்த
பரதேசியும் ஒன்று.
தமிழர்களாகிய நாம் தினம் தினம் 3 முறை, 6 முறை
அதுக்கும் மேலே என இஷ்டத்துக்கு அருந்தும் டீ-க்குப் பின்னால், அது எப்படி
நம்மீது திணிக்கப்பட்டது.. அதற்காக அப்பாவி ஏழை மக்கள் எப்படி
ஏமாற்றப்பட்டார்கள்.. எப்படி வஞ்சிக்கப்பட்டார்கள் என்ற ஒரு கதை இருக்கிறது
என்பதே மிரட்சியாய் இருக்கிறது.





ஒரு வருமானமில்லாத சுதந்திரமான ஏழைகளாய் ஆட்டம், பாட்டம், கேலி கூத்து
என வாழ்ந்தவர்கள் வருமானத்தை தேடும் சூழ்நிலையில் எப்படி கொஞ்சம் கொஞ்சமாய்
கொடூரமாய் கொத்தடிமைகளாய் மாற்றப்பட்டார்கள் என்பதை ஒரு நெஞ்சைக்
கசக்கிப்பிழியும் அனுபவமாய் தருகிறார் பாலா.

கஷ்டப்படும் ஏழைகளுக்கு வேலை தரும் பெரிய மனிதர் கருங்காணியாய் வரும்
அந்த நடிகரின் சிரிப்பில் துவங்குகிறது அந்த பச்சைத் துரோகம். 48 நாட்களாய்
நடந்து டீ எஸ்டேட்டுக்கு போகும் அந்த பயணமும் அதன் பின்னனியில் வரும்
பாடல் வரிகளும் பஞ்சம் பிழைக்கப் போவதன் வேதணையை அப்பட்டமாய் காட்டுகின்றன.
அதனைத் தொடர்ந்து வரும் அடுத்தடுத்த ஒவ்வொரு நிமிடமும் நம்மை உலுக்கும்
காட்சிகள். டீ எஸ்டேட்டுக்கு வந்துவிட்டோம்.

இனி எல்லாம் நல்லபடியாய் இருக்கும் என்ற அவர்களின் நம்பிக்கையில்
கொஞ்சம் கொஞ்சமாய் ஊற்றப்படும் விஷம் தான் மொத்தக்கதையும். அதை விவரிப்பது
நியாயமில்லை. பார்த்தால் மட்டுமே அந்த அனுபவம் புரியும்.

ஒரு சிறந்த
படம் ரசிகனை என்ன செய்துவிட முடியும்? பார்ப்பவனை கதைக்குள் இழுந்து,
உணர்வுகளை உள்வாங்கச்செய்து, நெஞ்சைப் பிழிந்து, கலங்கடித்து,
அந்தக்கதையின் வாழ்க்கையை நாமும் வாழ்வதைப்போன்ற ஒரு அனுபவத்தைக்
கொடுத்து.. அந்த சுக துக்கங்களை நம்மையும் உணரச்செய்து.. நாம் இதுவரை
அலட்சியமாய் இருந்த சில விசயங்களையும் நமக்கு உணர்த்தி, சில நேரங்களில்
நம்மை நாமே கேள்வி கேட்க வைத்து, போகப்போக எந்தக் கேள்வியும் இல்லாமல்
படத்தை மெய்மறந்து பார்க்கும் அனுவத்தைக் கொடுக்கும். அப்படி ஒரு படத்தை
எடுக்க மிகச்சிறந்த ஒரு கலைஞனால் தான் முடியும். அவர்தான் பாலா. நான்
கடவுள், அவன் இவன் போன்ற படங்களில் சற்று கீழே இறங்கியிருந்த பாலா இந்த
பரதேசி மூலம் சிம்மாசனத்தில் ஏறியமர்கிறார்.

உலகத்தரமான படமென்றால்
அது ஏதோ ஹாலிவுட் படங்களின் லொகேசன்களையும், ஷாட்களையும், அவர்களின்
கருத்துக்களையும் காப்பியடித்து ஒப்பிப்பதில்லை.. நம் கதையை படமாக்கி அதை
உலகமே பார்க்கச்செய்வது என கமலஹாசனுக்கும் பாடம் எடுக்கிறார் இந்த பாலா.
அந்தனை
நடிகர்களும் நடிப்பை பற்றி நினைப்பேயில்லாமல் படம் பார்க்க வைக்கிறார்கள்.
செழியனின் கேமரா முதல் ஷாட்டிலிருந்து கடைசி ஷாட் வரை கதையை இன்னும்
கணமாக்கித்தருகிறது. ஜி.வி.பிரகாஷ் இந்தப் படத்தின் தரத்தையறிந்து
அதற்கேயுரித்தான இசையை பிரம்மாதமாய் கொடுத்திருக்கிறார்.

இந்தப்
படம் தமிழ்நாட்டில், இந்தியாவில் மட்டுமில்லை உலகில் எங்கேல்லாம் சினிமா
ரசிக்கப்படுகிறதோ அங்கே எல்லாம் கௌரவிக்கப்படவேண்டிய படைப்பு.

இனி
ஒவ்வொரு முறை டீ குடிக்கும் போதும் கொஞ்சம் உறுத்தல் வரத்தான் செய்யும்.
கேரளாவுக்கு டூர் போய் அந்த தேயிலைத்தோட்டங்களை பார்க்கும் போது
வியப்பைத்தாண்டிய ஒரு வேதனை வரத்தான் செய்யும்.

பரதேசி..!! விமர்சனம்..!!!
*********************

எந்த எதிர்பார்ப்பும் இல்லாம படத்துக்கு போனேன்.!!

தேயிலை தோட்ட தொழிலாளர்களை பற்றிய கதைன்னு விளக்கத்தோட படம் தொடங்கியது..

படத்தோட கலருக்கே 5 மார்க் குடுக்கலாம்.. அப்புறம் கேமரா அட்டகாசம்..

படம் ஆரம்பிச்ச முதல் 3 நிமிஷம் அதர்வா பேசுறதே புரியாம செம கடுப்பா இருந்திச்சி..

அப்புறம் ஹீரோயின் வந்தப்புறம் கொஞ்சம் ஸ்பீடு கூடுது.. கிராமத்து கல்யாண
வீடு... கல்யாண வீட்டுல கிழவன் சாவுறது... விருந்து சாப்பாட்டுக்காக கிழவன்
செத்ததை மறைக்கிறது இப்படி எல்லாமே கலகலப்பு & எதார்த்தம்..!!

ஹீரோ - ஹீரோயின்.. கல்யாண வீடு அப்புறம் ஒரு பாட்டுலயே லவ் பண்ண
ஆரம்பிச்சிடுறாங்க.. அப்புறம் ஹீரோ ஹீரோயினோட அம்மாகிட்ட போய் நான் உன்
பொண்ணை தான் நினைக்கிறேன்னு சொன்னதுக்கு ஹீரோயின் அம்மா ஒரு பஞ்சாயத்தை
கூட்டுவா பாருங்க.. அந்த சீன் அட்டகாசம்.. பஞ்சாயத்து சீன்ல வேதிகா -
அதர்வா நடிப்பு அட்டகாசம்..!!!

அதுக்கப்புறம் தான் கதையே
தொடக்கம்.. ஒட்டு மொத்த ஊர் மக்களையும் பணத்தாசை காட்டி ஏமாற்றி தேயிலை
தோட்டத்துக்கு வேலைக்கு கூட்டிட்டு போய் கொடுமை படுத்துறது தான் கதையே..!!

தேயிலை தோட்ட வேலைக்கு என் போனாங்கிறதுக்காக ஒரு டீக்கடை சீன் ஒன்னு வரும்..!!

செஞ்ச வேலைக்கு அதர்வாக்கு கூலி குடுக்காம அடிச்சி விரட்டுவார்
டீக்கடைக்காரர்.. அப்போ தான் தேயிலை தோட்ட வேலைக்கு பண்ணையார் அப்ரோச்..!!

தேயிலை தோட்டத்துல நடக்குற கொடுமைய பார்த்தா நமக்கு ரத்தக்கண்ணீரே வந்திடும்..!!

எப்போதுமே யாருமே தொடாத தொட விரும்பாத சப்ஜெக்டை அழகா குடுக்குறது பாலா
ஸ்டைல்.. ஆனா இந்த படம் அங்காடி தெருவுல வசந்தபாலன் தொட்ட சப்ஜெக்ட் தான்..
ஆனா வேற கோணம்.. வேற களம்..!!

சிவசங்கர் மாஸ்டர் & அந்த
ஃபாரீன் டாக்டர் பண்ற விஷயங்களை பாலா தைரியமா சொல்லியிருக்கார்.. அதை நான்
பேச முடியாது..!! பார்த்து தெரிஞ்சிக்கோங்க..!!

இசை ரொம்ப நல்லா
இருக்கு..!! படம் முடிஞ்சி வெளிய வரும் போது நாமெல்லாம் ரொம்ப குடுத்து
வச்சவங்கன்னு ஃபீல் பண்ணுவோம்.. சுதந்திரத்தோட முக்கியத்துவம் என்னான்னு
ஒவ்வொருத்தருக்கும் புரியும்..!!!

மொத்தத்துல...

"" பாலா டிரைலர்ல அடிச்ச ஒவ்வொரு அடிக்கும்..
படம் பார்க்கும் போது உங்க மனசுல இருந்து ரத்தம் வரும்""

## பரதேசி... மிரட்டல்...!!

பி.கு : இந்த விமர்சனம் மொத்தமும் என்னோட ஆங்கிள்.. இதை படிச்சிட்டு
படத்துக்கு போய்ட்டு படம் நல்லாயில்லேன்னு என்னை யாராவது சைக்கோன்னு
திட்டுனீங்க.. உங்க சுவர்களில் ராஜகுமாரன் போஸ்ட் ஒட்டிருவேன்..!!