விபத்து அவசர சிகிச்சை மையங்கள் மூடல் : '108 ஆம்புலன்ஸ்' சேவை எதிரொலி

by **ஜனனி** Thu Mar 25, 2010 9:30 pm

விருதுநகர்
: தமிழகத்தில் '108 ஆம்புலன்ஸ்' சேவை காரணமாக, நெடுஞ்சாலையில் இயங்கி வந்த
விபத்து அவசர சிகிச்சை மையங்கள் மூடப்பட்டு வருகின்றன.

விபத்து அவசர சிகிச்சை பிரிவு:
தமிழகத்தில் நெடுஞ்சாலையில் விபத்து அபாயம் ஏற்படும் இடங்களின் அருகே
போக்குவரத்து துறை சார்பில் அரசு மானியத்துடன் விபத்து, அவசர சிகிச்சை
மையங்கள் துவக்கப்பட்டன. விழுப்புரம் மாவட்டத்தில் ஐந்து மையங்கள்,
திருநெல்வேலி, திருவண்ணாமலையில் தலா ஒன்று, தேனியில் இரண்டு,
நாகப்பட்டிணத்தில் இரண்டு, விருதுநகரில் மூன்று வீதம் 14 மையங்கள் இயங்கி
வந்தன. இவற்றை போனில் அழைப்பதற்கு 1073 என்ற இலவச எண் வழங்கப்பட்டது. இந்த
மையங்களை தனியார் ஆஸ்பத்திரிகள் செயல்படுத்தி வந்தன.

தங்கமான நேரம்: விபத்து
நடந்த பின் ஒரு மணி நேரம் தங்கமான நேரம். அதற்குள் முதலுதவி சிகிச்சை
வழங்கி உடனடியாக ஆஸ்பத்திரியில் காயமடைந்தோர் சேர்க்கப்பட்டு, பல உயிர்கள்
காப்பாற்றப்பட்டன.

108 சேவை அதிகரிப்பு:
தற்போது தமிழகமெங்கும் 108 எண்ணில் அழைத்தால் உடனடியாக துரித ஆம்புலன்ஸ்
சேவை செயல்பட்டு வருகிறது. ஒன்றிய அளவில் தனித்தனியாக ஆம்புலன்ஸ்கள்
இருப்பதால் உடனடியாக விபத்து நடந்த இடத்திற்கு சென்று சேவை செய்து
வருகின்றனர். மேலும் விபத்து மட்டுமில்லாமல் பிரசவம் உள்ளிட்ட பிற
அவசரத்திற்கும் கூட 108 சேவை வழங்கப்பட்டு வருகிறது.

மூன்று மையங்கள் மூடல்:
விருதுநகர் மாவட்டத்தில் இயங்கி வந்த நெடுஞ்சாலை விபத்து அவசர சிகிச்சை
மையங்கள் மூன்றும், 'சேவை'க்கு யாருமே இப்போது அழைப்பதில்லை என்பதால் அந்த
மையங்களை டிசம்பரில் மூடிவிட்டனர். இத்தகவலை தமிழக அரசுக்கு, அவற்றை
நிர்வகித்து வந்த தனியார் ஆஸ்பத்திரி நிர்வாகங்கள் தெரிவித்துவிட்டன. இதே
நிலையில்தான் மற்ற மாவட்டங்களில் உள்ள மையங்களும் உள்ளன. அவைகளையும்
வருங்காலங்களில் மூடப்படும் நிலை உள்ளது.