சல்மான் குர்ஷித்தின் ஊழலை நிரூபிக்க மேலும் ஆதாரங்களை வெளியிடுகிறார் கெஜ்ரிவால்

மத்திய சட்டத்துறை அமைச்சர் சல்மான் குர்ஷித்துக்கு எதிராக மேலும் ஆதாரங்களை இன்று வெளியிடப்போவதாக கெஜ்ரிவால் அறிவித்துள்ளார்.
மத்திய சட்ட அமைச்சரும், காங்கிரஸ் மூத்த
தலைவருமான சல்மான் குர்ஷித், உத்தர பிரதேசத்தில் ஜாகிர் உசேன் மெமோரியல்
டிரஸ்ட் என்ற அறக்கட்டளையை நடத்தி வருகிறார்.

அவரது மனைவி லூயிஸ் இதன் முக்கிய நிர்வாகியாக இருக்க, இந்த அறக்கட்டளை மாற்றுத் திறனாளிகளுக்கு உதவும் நடவடிக்கைகளில் ஈடுபட்டுள்ளது.

எனவே அறக்கட்டளைக்கு மத்திய அரசு சார்பில் ரூ. 71 லட்சம் மானியம் அளிக்கப்பட்டது.

இந்நிலையில், இந்த மானியத்தை மாற்றுத் திறனாளிகளுக்கு உதவுவதற்கு
பயன்படுத்தாமல், முறைகேடாக பயன்படுத்தியதாக மத்திய கணக்கு தணிக்கை
அலுவலகத்தின் அறிக்கையில் கூறப்பட்டுள்ளதாக தனியார் டி.வி ஒன்று நடத்திய
ஸ்டிங் ஆபரேஷனில் தெரியவந்தது.

உத்தர பிரதேச மாநில அமைச்சர்களின் கையெழுத்தை போலியாக இட்டு இந்த அறக்கட்டளைக்கு நிதி திரட்டியதாகவும் குற்றம் சாட்டப்பட்டது.

எனவே இந்த குற்றச்சாட்டுகளுக்கு பொறுப்பேற்று சட்டத்துறை அமைச்சர்
சல்மான் குர்ஷித் தனது அமைச்சர் பதவியை இராஜினாமா செய்ய வேண்டும் என
ஊழலுக்கு எதிரான இந்தியா அமைப்பை சேர்ந்த அரவிந்த் கெஜ்ரிவால் போராட்டம்
நடத்தி வருகிறார்.

இந்நிலையில், லண்டனிலிருந்து நேற்று இந்தியா வந்த சல்மான் குர்ஷித் தனது மனைவியுடன் நிருபர்களிடம் பேசினார்.

அப்போது மாற்றுத்திறனாளிகளுக்கான நிதியில் எவ்வித மோசடியும் நடக்கவில்லை என்று அதற்கான புகைப்பட ஆதாரங்களை வெளியிட்டார்.

மேலும் இந்த புகார்களை கெஜ்ரிவால் நிரூபிக்கும் பட்சத்தில் பதவிவிலக தயாராக இருப்பதாகவும் கூறினார்.

தற்போது குர்ஷித்தின் இந்த விளக்கத்திற்கு இன்று பதிலளித்துள்ள கெஜ்ரிவால், குர்ஷித்தின் ஆதாரங்கள் தவறானவை என்று தெரிவித்துள்ளார்.

குர்ஷித் நேற்று வெளியிட்ட புகைப்பட ஆதாரங்கள் 2010ம் ஆண்டில்
எடுக்கப்பட்டவை என்றும் தாங்கள் குற்றம் சாட்டியபடி இது 2009ம் ஆண்டில்
அவர் எந்த முகாமையும் நடத்த வில்லை என்று தெரிவித்துள்ளார்.

மேலும், குர்ஷித்துக்கு எதிராக மேலும் பல ஆதாரங்களை இன்று வெளியிடப்போவதாகவும் கெஜ்ரிவால் தெரிவித்துள்ளார்.