இன்சூரன்ஸ், ஓய்வூதியத்தில் அன்னிய முதலீடு அதிகரிப்பு: மத்திய அரசுக்கு ஜெயலலிதா கண்டனம்

முதல்-அமைச்சர் ஜெயலலிதா இன்று வெளியிட்டுள்ள அறிக்கையில் கூறி இருப்பதாவது:-

ஐக்கிய முற்போக்கு கூட்டணி அரசு சாதாரண பொதுமக்கள், சிறு வியாபாரிகள், மற்றும் விவசாயிகள் பாதிப்பு அடைவது பற்றி கொஞ்சம் கூட கவலைப்படாமல், அதிர்ச்சி அடையாமல் உள்ளது. மத்திய அரசு மீதான தொடர் ஊழல் குற்றச்சாட்டுக்களை மறக் கடிப்பதற்காக குறிப்பாக எந்த நேரத்திலும் தேர்தல் வரலாம் என்ற தவிர்க்க இயலாத சூழ்நிலையில் அன்னிய நேரடி முதலீடு என்பதை ஐக்கிய முற்போக்கு கூட்டணி அரசு திசை திருப்பும் செயலாக மேற் கொண்டுள்ளது.

அன்னிய நேரடி முதலீட்டுக்கு அனுமதி கொடுத் துள்ள மத்திய மந்திரி சபை, இந்த சீர் திருத்தங்கள் பொருளாதாரத்தில் அபரிதமான வளர்ச்சியை எற்படுத்தும் என்று கூறி இருப்பது தெளிவற்றதாகும். ஏனெனில் பொது காப் பீட்டுத் துறையில் அன்னிய நேரடி முதலீடு 26 சதவீதத்தில் இருந்து 49 சதவீதமாக அதிகரிக்கப்பட்டு இருப்பதற்கும், ஓய்வூதிய நிதியில் அன்னிய நேரடி முதலீட்டுக்கு 26 சதவீதம் என அனுமதி கொடுக்கப்பட்டதற்கும் சட்டம் நிறைவேற்றப்பட வேண்டும். அதாவது பாராளு மன்றத்தின் இரு சபைகளிலும் ஓய்வூதிய நிதி ஒழுங்கு முறை மேம்பாட்டு ஆணைய சட்டம்-2011 மற்றும் காப்பீட்டு சட்டத் திருத்த மசோதா 2008 நிறைவேற்றப்பட வேண்டும். இதில் ஐக்கிய முற்போக்கு கூட்டணி அரசு ஏராளமான சிக்கல்கள், இடர்பாடுகளை எதிர் நோக்கியுள்ளது.

காப்பீட்டுத்துறையில் 26 சதவீத அன்னிய நேரடி முதலீட்டுக்கு அனுமதி கொடுக் கப்பட்டிருந்த போது, மக்கள் பயன் அடையும் வகையில் பாராட்டத்தகும்படி எதுவும் நடைபெறவில்லை. இந்த நிலையில் பாராளுமன்ற நிலைக்குழுவின் பரிந்துரையை மீறி, காப்பீட்டுத் துறையில் 49 சதவீதமாக அன்னிய நேரடி முத லீட்டை உயர்த்தி இருப்பது பின்ன டைவையும் பாதிப்பையும் ஏற்படுத்தும். முக்கியமான ஒரு துறையில் அரசு குழப் பத்தை ஏற்படுத்தி இருப்பது விவாதத்துக்குரிய சர்ச்சையாகிவிட்டது.

காப்பீட்டு நிறுவனங்களுக்கு ரூ.50 கோடி முதல் இருந்தால் போதும் என்ற கட்டுப்பாடு காரணமாக நிறைய சிறு நிறுவனங்கள் காளான்கள் போல தோன்றும். அனுபவமும், ஆற்றலும் இல்லாத இந்த நிறு வனங்களால் ஆபத்துதான் ஏற்படும். நமது சாதாரண குடிமகன்களை உறுதியற்ற ஒரு நிலைக்கு தேவை இல்லாமல் ஆட்படுத்தி விடும்.

ஓய்வூதிய நிதியில் அன்னிய நேரடி முதலீட்டை அனுமதி கொடுத்திருப்பதன் மூலம், மூத்த குடிமக்களின் உள்ளூர் சேமிப்பும் பணம் மிகப் பெரும் இடையூறுக்கு தள்ளப்பட்டுள்ளது. கணிக்க முடியாத மூலதன சந்தை மூத்த குடிமக்களின் எதிர் காலத்தை மேலும் பெரிய ஆபத்தில் தள்ளி விடும். காப்பீட்டுத் துறையில் அன்னிய நேரடி முதலீட்டை அதிகரித்திருப்பதால், அது தனியார் காப்பீட்டு நிறுவனங்களின் ஆதிக்கத்துக்கு வழி வகுத்து விடும். இதனால் காப்பீட்டு நிறுவனங்களின் நோக்கம் முழுமையான வணிகமாக மாறிவிடும். எல்.ஐ.சி. போன்ற பொதுத்துறை காப்பீட்டு நிறுவனங்கள் மேம்பாட்டு நடவடிக்கைகளில் தீவிரமாக ஈடுபட்டுள்ளன.

மத்திய அரசின் செயல்பாடு காரணமாக அதில் பாதிப்பு உண்டாகும். இதன் விளைவாக நாட்டின் வளர்ச்சியில், மேம் பாட்டு நடவடிக்கைகளில் மிக கடுமையான பாதிப்பு ஏற்படும். மத்திய அரசு எடுத்துள்ள முடிவுகள் மக்களை காயப்படுத்துவது போல உள்ளது. பொருளாதார சீர் திருத்தம் என்ற பெயரில் மத்திய அரசு நாட்டு மக்களை ஏமாற்றுகிறது. மக்களை மயக்கும் பேச்சால், உண்மையயை மாற்ற முடியாது. எனவே நாட்டு மக்களின் எதிர்கால வாழ்வை பாழாக்கும் மத்திய அரசின் இந்த திட்டங்களை நான் கடுமையாக எதிர்க்கிறேன்.