பி.ஆர்.பி.க்கு 24 ஆயிரம் ஏக்கர்; துரை தயாநிதிக்கு 1,800 ஏக்கர் சொத்து!

by **ஜனனி** Wed Oct 03, 2012 7:14 am

பி.ஆர்.பி. கிரானைட் நிறுவன அதிபர்
பி.ஆர்.பழனிச்சாமிக்கு மதுரை, தேனி உள்ளிட்ட பல்வேறு இடங்களில் ஏறத்தாழ 24
ஆயிரம் ஏக்கர் சொத்து இருப்பது தெரியவந்துள்ளதாக போலீஸ் அதிகாரிகள்
தெரிவித்தனர்.

மேலும், இதர கிரானைட் நிறுவனத்தைச் சேர்ந்தவர்களுக்கு 12 ஆயிரம் ஏக்கர்
சொத்துகள் இருப்பதும் கண்டறியப்பட்டுள்ளது. இதுதொடர்பான பல முக்கிய
ஆவணங்கள் காவல் துறையினரால் கைப்பற்றப்பட்டுள்ளன.

கிரானைட் முறைகேடு தொடர்பாக கைது செய்யப்பட்டு சிறையில் அடைக்கப்பட்ட
பி.ஆர்.பழனிசாமி மீது இதுவரை 23 வழக்குகள் பதிவு செய்யப்பட்டுள்ளன. அரசின்
விதிமுறையை மீறி கிரானைட் வெட்டி எடுத்தது, கிரானைட் கற்களை அரசு கண்மாய்,
கால்வாய்களில் அடுக்கி வைத்து நீர்நிலைகளை அழித்தது, நிலங்களை மிரட்டி
வாங்கியது உள்ளிட்ட பல்வேறு புகார்களின் அடிப்படையில் பி.ஆர்.பழனிச்சாமி
மீது போலீஸார் வழக்குப் பதிந்துள்ளனர்.

கிரானைட் மூலம் கிடைத்த வருவாயில் பி.ஆர்.பழனிச்சாமி மதுரை, தேனி
மட்டுமன்றி, பல மாவட்டங்களில் விவசாய நிலம் மற்றும் வீட்டுமனை உள்ளிட்டவை
வாங்கியிருப்பது தெரியவந்தது.

பி.ஆர்.பி. நிறுவனம் பெயரிலும், அவரது குடும்பத்தினர் பெயரிலும் மதுரை,
தேனி, திண்டுக்கல், சிவகங்கை, விருதுநகர், ராமநாதபுரம், கோவை, நாமக்கல்,
சேலம், கருர், புதுக்கோட்டை, தூத்துக்குடி ஆகிய மாவட்டங்களில் 24 ஆயிரம்
ஏக்கர் சொத்துகள் வாங்கப்பட்டிருப்பதாகவும் காவல் துறை அதிகாரிகள்
கூறுகின்றனர்.

இதில் தேனியில் மட்டும் சுமார் 700 ஏக்கருக்கும் மேலாக விவசாய நிலம்
வாங்கப்பட்டு, அதில் கரும்பு, தென்னை மரங்கள் சாகுபடி செய்யப்பட்டுள்ளதும்
தெரியவந்துள்ளது. அந்த நிலங்களில் பெரும்பாலானவை பி.ஆர். பழனிச்சாமி
பெயரில் இருப்பதும் தெரிய வந்துள்ளது.

பி.ஆர்.பி. நிறுவனப் பெயரிலும், தனது பெயரிலும், தனது மகன், மகள்,
சகோதரிகளின் பிள்ளைகள் என 15-க்கும் மேற்பட்டோர் பெயரிலும் சொத்துகள்
வாங்கியிருப்பது தெரியவந்துள்ளது. அவரது சொத்துகளுக்குரிய சுமார் 6 ஆயிரம்
ஆவணங்கள் கைப்பற்றப்பட்டுள்ளன.

துரை தயாநிதிக்கு 1,800 ஏக்கர்: ஒலிம்பஸ் நிறுவனத்துக்கு 160 ஏக்கர்
சொத்துகளும், அதில் பங்குதாரராக இருந்த மத்திய அமைச்சர் மு.க.அழகிரியின்
மகன் துரைதயாநிதி பெயரில் 1800 ஏக்கர் சொத்துகள் இருப்பதற்கான ஆவணங்களைக்
கைப்பற்றி ஆய்வுக்கு உள்படுத்தியிருப்பதாகவும் போலீஸ் உயரதிகாரிகள்
கூறுகின்றனர்.

மேலும், பி.எஸ். கிரானைட் நிறுவனத்துக்கு 6 ஆயிரம் ஏக்கர், மதுரா
கிரானைட் நிறுவனத்துக்கு 3,060 ஏக்கர், சிந்து கிரானைட் நிறுவனத்துக்கு 800
ஏக்கர் சொத்துகளுக்குரிய ஆவணங்கள் கிடைத்துள்ளதாகவும் அவை ஆய்வுக்கு
உள்படுத்தப்பட்டுள்ளதாகவும் கூறப்படுகிறது.

பி.ஆர்.பி. நிறுவனத்தைத் தவிர்த்த மற்ற நிறுவனங்களின் சொத்து சுமார்
12,035 ஏக்கர் என்றும் தனிப்படைப் பிரிவு போலீஸார்
கூறுகின்றனர்.இதுகுறித்து மதுரை ஊரக மாவட்ட காவல் கண்காணிப்பாளர்
வே.பாலகிருஷ்ணனிடம் கேட்டபோது, கிரானைட் முறைகேடு தொடர்பாக பல்வேறு
ஆவணங்கள் கைப்பற்றப்பட்டுள்ளன. இதில் நிறுவனத்தைச் சேர்ந்தவர்களது சொத்து
ஆவணங்களும் அடக்கம். அவை பரிசீலிக்கப்பட்டு சட்டரீதியான நடவடிக்கை
எடுக்கப்படுகிறது என்றார்.