நடையை கட்டியது இங்கிலாந்து! * அரையிறுதியில் இலங்கை

பல்லேகலே: "டுவென்டி-20
உலக கோப்பை தொடரில் இருந்து வெளியேறியது "நடப்பு சாம்பியன் இங்கிலாந்து.
நேற்று நடந்த "சூப்பர்-8 போட்டியில் இலங்கையிடம் 19 ரன்கள் வித்தியாசத்தில்
வீழ்ந்தது. "பிரிவு-1ல் இருந்து அரையிறுதிக்கு இலங்கை, வெஸ்ட் இண்டீஸ்
அணிகள் தகுதி பெற்றன.
இலங்கையில் நான்காவது "டுவென்டி-20 உலக
கோப்பை தொடர் நடக்கிறது. நேற்று இரவு நடந்த பிரிவு-1, "சூப்பர்-8
போட்டியில் இலங்கை, இங்கிலாந்து அணிகள் மோதின.
சங்ககரா கேப்டன்:
தாமதமாக
பந்துவீசிய சர்ச்சையில் அபராதம் விதிக்கப்பட்ட ஜெயவர்தனாவுக்கு தொடர்ந்து
சிக்கல் ஏற்படாமல் இருக்க, கேப்டன் பொறுப்பு இம்முறை சங்ககராவிடம்
வழங்கப்பட்டது. "டாஸ் வென்ற இங்கிலாந்து கேப்டன் ஸ்டூவர்ட் பிராட்,
"பீல்டிங் தேர்வு செய்தார்.
ஜெயவர்தனா அபாரம்:
இலங்கை
அணிக்கு ஜெயவர்தனா, தில்ஷன் சேர்ந்து நல்ல துவக்கம் தந்தனர். டெர்ன்பாக்
ஓவரில் இருவரும் தலா ஒரு சிக்சர் அடித்தனர். தில்ஷன் 16 ரன்களுக்கு
வெளியேறினார். தனது அதிரடியை தொடர்ந்த ஜெயவர்தனா பவுண்டரிகளாக விளாசினார்.
நழுவிய "ஹாட்ரிக்:
இந்த
நேரத்தில் சுவான் வீசிய போட்டியின் 11வது ஓவரின் முதல் பந்தில்
ஜெயவர்தனா(42) அவுட்டானார். இரண்டாவது பந்தில் சங்ககரா(13) வீழ்ந்தார்.
மூன்றாவது பந்தை ஜீவன் மெண்டிஸ் தடுத்த ஆட, சுவானின் "ஹாட்ரிக் வாய்ப்பு
நழுவியது. இதே ஓவரில் ஜீவன் 2 பவுண்டரி அடித்து, ரன் வேகம் குறையாமல்
பார்த்துக் கொண்டார். பிராட் வீசிய போட்டியின் 16வது ஓவரில் ஜீவன்
மெண்டிஸ்(18), ஏஞ்சலோ மாத்யூஸ்(28) வரிசையாக அவுட்டாகினர். அடுத்த பந்தில்
பெரேரா 2 ரன் எடுக்க, இன்னொரு "ஹாட்ரிக் வாய்ப்பு பறிபோனது.
பெரேரா அதிரடி:
கடைசி
கட்டத்தில் பெரேரா, திரிமான்னே அதிவிரைவாக ரன் சேர்த்தனர். டெர்ன்பாக்
ஓவரில் இருவரும் தலா ஒரு சிக்சர் விளாசினர். தொடர்ந்து பிராட் ஓவரிலும்
பெரேரா ஒரு சிக்சர் அடித்தார். திரிமான்னே 13 ரன்களுக்கு அவுட்டானார்.
இலங்கை அணி 20 ஓவரில் 6 விக்கெட்டுக்கு 169 ரன்கள் எடுத்தது. பெரேரா(26),
குலசேகரா(1) அவுட்டாகாமல் இருந்தனர்.
இங்கிலாந்து சார்பில் பிராட் 3, சுவான் 2 விக்கெட் வீழ்த்தினர்.
கடின இலக்கு:
குறைந்தது
13 ஓவரில் வெற்றி இலக்கை எட்டினால், அரையிறுதிக்கு முன்னேறலாம் என்ற
இக்கட்டான நிலையில் இங்கிலாந்து களமிறங்கியது. மலிங்காவின் முதல் ஓவரில்
லூக் ரைட்(12), பேர்ஸ்டோவ்(2), ஹேல்ஸ்(3) என 3 விக்கெட்டுகள் சரிய, சிக்கல்
ஆரம்பமானது.
படேல் அரைசதம்:
பின் தனிநபராக போராடிய
சமித் படேல், மாத்யூஸ் பந்தில் ஒரு இமாலய சிக்சர் அடித்தார். தொடர்ந்து
அஜந்தா மெண்டிஸ் "சுழலில் 3 பவுண்டரி விளாசிய இவர், அரைசதம் கடந்தார்.
மார்கன்(10), போபரா(1), பட்லர்(8), பிராட்(1) நிலைக்கவில்லை.
மலிங்கா 5 விக்.,:
மலிங்கா
"வேகத்தில் சமித் படேல்(67) போல்டானார். இதன் மூலம் தனது 5வது விக்கெட்டை
பெற்றார். கடைசி கட்டத்தில் அதிரடி காட்டிய சுவான் 34 ரன்களுக்கு குலசேகரா
பந்தில் போல்டானார். இங்கிலாந்து அணி 20 ஓவரில் 9 விக்கெட்டுக்கு 150
ரன்கள் எடுத்து, தோல்வி அடைந்தது.
ஆட்ட நாயகன் விருதை மலிங்கா வென்றார்.
பிரிவு -1ல் முதல் இரு இடம் பிடித்த இலங்கை(6 புள்ளி), வெ.இண்டீஸ்(4 புள்ளி) அரையிறுதிக்கு முன்னேறின. இங்கிலாந்து வெளியேறியது.