அரையிறுதியில் இந்தியா-இலங்கை மோதல்

by **மாலதி** Tue Jun 18, 2013 7:45 am

ஓவல்: சாம்பியன்ஸ் டிராபி தொடரின் அரையிறுதி வாய்ப்பை இழந்து வெளியேறியது "நடப்பு சாம்பியன்' ஆஸ்திரேலியா. நேற்று நடந்த பரபரப்பான லீக் போட்டியில் இலங்கையிடம் 20 ரன்கள் வித்தியாசத்தில் வீழ்ந்தது. வரும் 20ம் தேதி நடக்கும் இரண்டாவது அரையிறுதி போட்டியில் இந்தியா, இலங்கை அணிகள் மோதுகின்றன. இதில் வென்றால், இந்திய அணி பைனலுக்கு முன்னேறலாம்.
இங்கிலாந்தில் சாம்பியன்ஸ் டிராபி தொடர் நடக்கிறது. நேற்று நடந்த லீக் போட்டியில் இலங்கை, ஆஸ்திரேலிய அணிகள் மோதின. "டாஸ்' வென்ற ஆஸ்திரேலிய கேப்டன் ஜார்ஜ் பெய்லி, "பீல்டிங்' தேர்வு செய்தார்.
திரிமான்னே அரைசதம்:
அரையிறுதிக்கு முன்னேற கட்டாய வெற்றியை எதிர்நோக்கி களமிறங்கிய இலங்கை அணிக்கு குசல் பெரேரா(4), சங்ககரா(3 ) ஏமாற்றினர். பின் தில்ஷன், திரிமான்னே சேர்ந்து பொறுப்பாக ஆடினர். பால்க்னர் ஓவரில் அடுத்தடுத்து பவுண்டரிகள் விளாசிய திரிமான்னே, மார்ஷ் பந்துகளையும் விட்டு வைக்கவில்லை. மறுமுனையில் பந்துகளை "விழுங்கிய' தில்ஷன் (34 ரன், 58 பந்து), தோகர்டி "சுழலில்' வெளியேறினார். தனது 5வது அரைசதம் அடித்த திரிமான்னே, 57 ரன்னுக்கு அவுட்டானார்.
ஜெயவர்தனா அபாரம்:
கேப்டன் மாத்யூஸ் (12) நிலைக்கவில்லை. அதிரடியாக ரன் சேர்த்த ஜெயவர்தனா, ஒருநாள் அரங்கில் 69வது அரைசதம் அடித்தார். இலங்கை அணிக்காக முதல் சிக்சர் அடித்த சண்டிமால், 31 ரன்கள் எடுத்தார். குலசேகரா (6), ஹெராத் (2) ரன் அவுட்டாகினர். இலங்கை அணி 50 ஓவரில் 8 விக்கெட்டுக்கு 253 ரன்கள் எடுத்தது. ஜெயவர்தனா (84), மலிங்கா (2) அவுட்டாகாமல் இருந்தனர்.
விக்கெட் சரிவு:
ஆஸ்திரேலிய அணி 29.1 ஓவரில் 254 ரன்கள் எடுத்தால், அரையிறுதிக்கு முன்னேறலாம் என்ற இக்கட்டான நிலையில் களமிறங்கியது. குலசேகரா "வேகத்தில்' வாட்சன்(5) போல்டாக, ஆரம்பமே படுமோசமாக அமைந்தது. ஹியுஸ்(13) நிலைக்கவில்லை. சிறிது நேரம் அதிரடி காட்டிய மேக்ஸ்வெல்(32), மலிங்கா பந்தில் போல்டானார். பெய்லி(4) ரன் அவுட்டானார். மிட்சல் மார்ஷ்(4) ஏமாற்றினார். இப்படி "டாப்-ஆர்டர்' பேட்ஸ்மேன்கள் சொதப்ப, 13 ஓவரில் 5 விக்கெட்டுக்கு 80 ரன்கள் எடுத்து தவித்தது.
பின் ஆடம் வோஜஸ், மாத்யூ வேட் சேர்ந்து போராடினர். குலசேகரா பந்தில் வேட்(31) வெளியேறினார். பால்க்னர்(17), ஜான்சன்(4) நிலைக்கவில்லை. வோஜஸ்(49) அரைசதம் அடிக்கும் வாய்ப்பை இழந்தார்.
தில்ஷன் அசத்தல்:
கடைசி கட்டத்தில் மெக்கே, தோகர்டி துணிச்சலாக விளையாட, போட்டியில் சூடு பிடித்தது. இந்த நேரத்தில் பந்துவீச வந்த தில்ஷன் திருப்புமுனை ஏற்படுத்தினார். இவரது கலக்கல் "கேட்ச்சில்' மெக்கே(30) அவுட்டாக, இலங்கை வீரர்கள் மகிழ்ச்சியில் துள்ளிக் குதித்தனர். ஆஸ்திரேலிய அணி 42.3 ஓவரில் 233 ரன்களுக்கு ஆல் அவுட்டாகி தோல்வி அடைந்தது. தோகர்டி(15) அவுட்டாகாமல் இருந்தார்.
ஆட்டநாயகன் விருதை ஜெயவர்தனா வென்றார்.
வரும் 20ம் தேதி நடக்கும் இரண்டாவது அரையிறுதி போட்டியில் இந்தியா, இலங்கை அணிகள் மோதுகின்றன. 19ம் நடக்கும் முதலாவது அரையிறுதியில் இங்கிலாந்து அணி, தென் ஆப்ரிக்காவை சந்திக்கும்.

11 ஆயிரம் ரன்கள்
நேற்று, 84 ரன்கள் எடுத்த இலங்கை அணியின் மகிளா ஜெயவர்தனா, 62வது ரன்னை கடந்த போது, ஒருநாள் கிரிக்கெட் அரங்கில் 11 ஆயிரம் ரன்கள் என்ற புதிய மைல்கல்லை எட்டினார். இதுவரை இவர், 394 போட்டியில் 15 சதம், 69 அரைசதம் <உட்பட 11,022 ரன்கள் எடுத்துள்ளார். இதன்மூலம் இந்த இலக்கை எட்டிய 3வது இலங்கை வீரர் மற்றும் 8வது சர்வதேச வீரரானார்.
முன்னதாக இந்தியாவின் சச்சின் (18426 ரன்), ஆஸ்திரேலியாவின் பாண்டிங் (13704), இலங்கையின் ஜெயசூர்யா (13430), பாகிஸ்தானின் இன்சமாம் (11739), தென் ஆப்ரிக்காவின் காலிஸ் (11498), இந்தியாவின் கங்குலி (11363), இலங்கையின் சங்ககரா (11231) ஆகியோர் இம்மைல்கல்லை எட்டினர்.