ஆஸி., அசத்தல் வெற்றி * வீணானது வெ.இண்டீஸ் அதிரடி

கொழும்பு: வெஸ்ட்
இண்டீஸ் அணிக்கு எதிரான "டுவென்டி-20' உலக கோப்பை லீக் போட்டியில்,
"டக்வொர்த்-லீவிஸ்' விதிப்படி, 17 ரன்கள் வித்தியாசத்தில் ஆஸ்திரேலியா
வெற்றி பெற்றது. கெய்ல், சாமுவேல்ஸ் அதிரடி வீணானது.
இலங்கையில்
நான்காவது "டுவென்டி-20' உலக கோப்பை தொடர் நடக்கிறது. "பி' பிரிவில் நடந்த
லீக் போட்டியில் ஆஸ்திரேலியா, வெஸ்ட் இண்டீஸ் அணிகள் மோதின. "டாஸ்' வென்ற
வெஸ்ட் இண்டீஸ் கேப்டன் சமி, "பேட்டிங்' தேர்வு செய்தார்.
கெய்ல் அதிரடி:
வெஸ்ட்
இண்டீஸ் அணியின் ஸ்மித் (2) விரைவில் வெளியேறி அதிர்ச்சி கொடுத்தார்.
சார்லஸ், ஸ்டார்க் ஓவரில் அடுத்தடுத்து சிக்சர், பவுண்டரி அடித்தார். இதன்
பின் கெய்லின் அதிரடி துவங்கியது.
தனது முதல் ஓவரில் ரன்
எதுவும் கொடுக்காத ("மெய்டன்') கம்மின்ஸ், இம்முறை கெய்ல் புயலில்
சிக்கினார். இவரது இரண்டாவது ஓவரில், மூன்று பவுண்டரிகள், ஒரு சிக்சர் என
விளாசி, 18 ரன்கள் எடுத்தார் கெய்ல்.
சார்லஸ் 16 ரன்னில்
அவுட்டானார். பிராட் ஹாக் பந்தை சிக்சருக்கு அனுப்பிய கெய்ல், மேக்ஸ்வெல்
ஓவரில் 2 சிக்சர், ஒரு பவுண்டரி அடித்தார். "டுவென்டி-20' அரங்கில் 29 வது
அரைசதம் கடந்த கெய்ல், 54 ரன்னில் (33 பந்து) திரும்பினார்.
சாமுவேல்ஸ் அரைசதம்:
அடுத்து
வந்த சாமுவேல்ஸ், அதிரடியை தன்கையில் எடுத்துக் கொண்டார். ஹாக்,
கிறிஸ்டியன் ஓவர்களில் தலா ஒரு சிக்சர், பவுண்டரி அடித்தார் சாமுவேல்ஸ்.
வாட்சன் ஓவரில் இரு சிக்சர் அடித்து மிரட்டிய இவர், தனது 9வது அரைசதம் (50
ரன்கள், 32 பந்து) அடித்து அவுட்டானார்.
போலார்டு (10)
நீடிக்கவில்லை. பிராவோ 27 ரன்கள் எடுத்தார். கடைசி நேரத்தில் சமி (12)
வேகம் காட்டினார். வெஸ்ட் இண்டீஸ் அணி 20 ஓவரில் 8 விக்கெட்டுக்கு 191
ரன்கள் குவித்தது. ஆஸ்திரேலியா சார்பில் ஸ்டார்க் 3, வாட்சன் 2 விக்கெட்
வீழ்த்தினர்.
"சூப்பர்' துவக்கம்:
கடின இலக்கை
துரத்திய ஆஸ்திரேலிய அணிக்கு, வார்னர் அதிரடி துவக்கம் கொடுத்தார்.
ராம்பால் ஓவரில் 2 சிக்சர், 2 பவுண்டரி என, மொத்தம் 22 ரன்கள் எடுத்தார்.
இவர், 14 பந்தில் 28 ரன்கள் எடுத்து அவுட்டானார். பின் மைக்கேல் ஹசி,
வாட்சன் இணைந்து ஸ்கோரை அதிவேகமாக உயர்த்தினர்.
சமி பந்தில்
ஹசியும், சுனில் நரைன் பந்தில் வாட்சனும் சிக்சர் அடித்தனர். சாமுவேல்ஸ்
வீசிய போட்டியின் 8வது ஓவரில், தலா 2 சிக்சர், பவுண்டரி என, அடுத்தடுத்து
விளாசினார் வாட்சன்.
ஆஸி., வெற்றி:
ஆஸ்திரேலிய
அணி 9.1 ஓவரில் ஒரு விக்கெட்டுக்கு 100 ரன்கள் எடுத்திருந்த போது, பலத்த
மழை பெய்ததால் ஆட்டம் நிறுத்தப்பட்டது. "டக்வொர்த்-லீவீஸ்' விதிப்படி 9.1
ஓவரில் 83 ரன்கள் எடுத்தால் போதும் என்ற நிலையில், ஆஸ்திரேலியா 100 ரன்கள்
எடுத்திருந்தது. இதனால், 17 ரன்கள் வித்தியாசத்தில் ஆஸ்திரேலியா வெற்றி
பெற்றதாக அறிவிக்கப்பட்டது. வாட்சன் (41), மைக்கேல் ஹசி (28) அவுட்டாகாமல்
இருந்தனர்.