இறந்த குழந்தையை எலி கடித்த விவகாரத்தில் கவனக்குறைவாகப் பணியாற்றிய இரு மருத்துவர்கள் உட்பட 9 மருத்துவப் பணியாளர்கள் தற்காலிகப் பணி நீக்கம் செய்து தமிழக முதலமைச்சர் ஜெயலலிதா உத்தரவிட்டுள்ளார்

இறந்த
குழந்தையை எலி கடித்த விவகாரத்தில் கவனக்குறைவாகப் பணியாற்றிய இரு
மருத்துவர்கள் உட்பட 9 மருத்துவப் பணியாளர்கள் தற்காலிகப் பணி நீக்கம்
செய்து தமிழக முதலமைச்சர் ஜெயலலிதா உத்தரவிட்டுள்ளார்



தமிழக முதலமைச்சர் ஜெயலலிதா வெளியிட்டுள்ள அறிக்கையில் கூறியிருப்பதாவது:-



சென்னை, திருவல்லிக்கேணி, அரசு கஸ்தூரிபா காந்தி தாய்சேய் நல
மருத்துவமனையில் இறந்த குழந்தையின் முகத்தில் காயம் ஏற்பட்டது தொடர்பாக
எனக்கு தகவல் வரப்பெற்றதும், இது குறித்து தீவிர விசாரணை நடத்தி, இதற்கு
காரணமானவர்களின் மீது கடுமையான நடவடிக்கை எடுக்க வேண்டும் என்று நான்
உத்தரவிட்டு இருந்தேன்.



இதனையடுத்து, மக்கள்
நல்வாழ்வுத் துறை அமைச்சர் மற்றும் அரசுச் செயலாளர் மருத்துவமனைக்கு சென்று
நடந்த சம்பவம் குறித்து விசாரணை நடத்தியுள்ளனர். மேலும், இந்த நிகழ்வு
குறித்து மருத்துவ அலுவலர்களைக் கொண்ட விசாரணைக் குழு உடனடியாக
அமைக்கப்பட்டது. அந்தக் குழு இது குறித்து தீவிர விசாரணை மேற்கொண்டு,
விசாரணை அறிக்கையை அளித்துள்ளது.



அந்த விசாரணை
அறிக்கையில், ரஞ்ஜித் குமார் என்பவரின் மனைவி மலர் என்பவருக்கு 15.8.2012
அன்று பெண் குழந்தை பிறந்ததாகவும், குழந்தை குறை மாதத்தில் பிறந்ததால்
இங்குபேட்டரில் வைக்கப்பட்டதாகவும், சில நாட்கள் கழித்து குழந்தைக்கு
காய்ச்சல் மற்றும் மூச்சுத் திணறல் ஏற்பட்டதன் காரணமாக செயற்கை சுவாசம்
அளிக்கப்பட்டதாகவும், தீவிர சிகிச்சை அளிக்கப்பட்டும் குழந்தை 26.8.2012
அன்று மாலை 5.45 மணிக்கு இறந்துவிட்டதாகவும், இது குறித்து குழந்தையின்
தந்தை ரஞ்ஜித் குமாருக்கு தகவல் தெரிவிக்கப்பட்டு, அவரும் இறந்த குழந்தையை
பார்த்ததாகவும், அப்போது குழந்தையின் முகத்தில் எவ்விதக் காயமும் இல்லை
என்றும், சம்பந்தப்பட்ட ஆவணத்தில் அவர் கையெழுத்திட்டு இருப்பதாகவும்
தெரிவிக்கப்பட்டுள்ளது.



பின்னர், இறந்த குழந்தையின்
உடலை நன்கு கட்டி ஓர் அறையில் இருந்த தொட்டிலில் பணியில் இருந்த செவிலியர்
வைத்ததாகவும், மறு நாள் காலையில் குழந்தையின் தந்தை அந்தக் குழந்தையை வாங்க
வந்த போது, அவர் குழந்தையின் முகத்தில் இருந்த காயத்தை கவனித்து அதை
பணியிலிருந்த செவிலியரிடமும், உதவிப் பேராசிரியடமும் தெரிவித்ததாகவும் அந்த
அறிக்கையில் குறிப்பிடப்பட்டுள்ளது.



மருத்துவமனையில்
இறப்பு ஏற்பட்டால் பிரேதப் பரிசோதனை தேவையில்லாத இனங்களில் இறந்தவர் உடல்
உடனடியாக உரியவரிடம் ஒப்படைக்கப்பட வேண்டும் என்பது தான் அரசு விதிமுறைகள்
ஆகும்.மேற்காணும் சம்பவத்தில், அவ்வாறான விதிமுறைகள் பின்பற்றப்படவில்லை.
சவக்கிடங்கிற்குள்ளும் இறந்த குழந்தையின் உடல் பாதுகாப்பாக
வைக்கப்படவில்லை. இந்த நிகழ்வில் கவனக்குறைவாகப் பணியாற்றிய இரு
மருத்துவர்கள் உட்பட 9 மருத்துவப் பணியாளர்கள் தற்காலிகப் பணி நீக்கம்
செய்யப்பட்டுள்ளனர்.



விசாரணையில், குழந்தை இறந்த பிறகே
முகத்தில் காயம் ஏற்பட்டுள்ளது என்பது தெரிய வந்துள்ளது. அதற்கான காரணம்
உடலில் செப்டிசீமியாவால் ஏற்பட்டுள்ள திசுக்களின் மாற்றம் போன்றவற்றின்
காரணமாகவே இருக்கக் கூடும். எனினும், எலி கடித்ததால் இந்தக் காயம்
ஏற்பட்டதா என்பதை அறியும் பொருட்டு, பிரேதப் பரிசோதனை மற்றும் தடயவியல்
திசு பரிசோதனைக்கு அனுப்ப நடவடிக்கை எடுக்கப்பட்டுள்ளது.




இவ்வாறு ஜெயலலிதா கூறியுள்ளார்.