முதலீட்டாளர்களுக்கு பணம் வழங்காத ஈமு பண்ணை நிறுவனங்களின் சொத்துகள் பறிமுதல்: முதல்வர்

by **மாலதி** Sat Aug 18, 2012 8:13 am

ஈமு பண்ணை பிரச்னை தொடர்பாக தலைமைச் செயலகத்தில்
முதல்வர் ஜெயலலிதா தலைமையில் வெள்ளிக்கிழமை நடந்த ஆய்வுக்கூட்டத்தில்
பங்கேற்ற (வலமிருந்து) கால்நடை பராமரி

சென்னை,
ஆக. 17: முதலீட்டாளர்களுக்கு பணம் வழங்காத ஈமு பண்ணை நிறுவனங்களின்
சொத்துகளை நீதிமன்ற நடவடிக்கைகள் மூலம் பறிமுதல் செய்ய முதல்வர் ஜெயலலிதா
உத்தரவிட்டுள்ளார்.ஈமு பண்ணையில் முதலீடு செய்தவர்களை ஏமாற்றிய ஈமு
பண்ணை நிறுவனங்கள் மீது விரைந்து நடவடிக்கை எடுப்பது குறித்து முதல்வர்
ஜெயலலிதா தலைமையில் விரிவான ஆய்வுக் கூட்டம் தலைமைச் செயலகத்தில்
வெள்ளிக்கிழமை நடைபெற்றது. இதில் தலைமைச் செயலாளர் தேவேந்திரநாத் சாரங்கி,
உள்துறை முதன்மைச் செயலாளர் ராஜகோபால், கால்நடை பராமரிப்பு மற்றும் மீன்
வளத் துறைச் செயலாளர் ககன்தீப்சிங் பேடி உள்ளிட்ட அரசு உயர் அதிகாரிகள்
கலந்து கொண்டனர்.இந்தக் கூட்டத்தில் எடுக்கப்பட்ட முடிவுகள் குறித்து முதல்வர் ஜெயலலிதா வெளியிட்ட அறிவிப்பு:ஈரோடு
மற்றும் கோயம்புத்தூர் மாவட்டங்களில் சில ஆண்டுகளாக, ஈமு கோழிப்
பண்ணைகளில் முதலீடு செய்தால் அதிக அளவு லாபம் ஈட்டலாம் என்று கூறி, 36
ஆயிரத்துக்கும் மேற்பட்ட மக்களிடமிருந்து லட்சக்கணக்கான ரூபாயை வைப்பு
நிதியாக சில ஈமு கோழிப் பண்ணை நிறுவனங்கள் திரட்டின.இவ்வாறு
பொதுமக்கள் முதலீடு செய்த தொகைக்கு ஈடாக அவர்களுக்கு ஈமு கோழிக் குஞ்சுகள்
கொடுக்கப்பட்டு அதை முதலீட்டாளர்கள் அவர்களது பண்ணையிலேயே வைத்து வளர்க்க
வேண்டும். அதற்கென மாதம் குறிப்பிட்ட ஒரு தொகை வழங்கப்படும். குறிப்பிட்ட
காலத்திற்குப் பின் வைப்புத் தொகை திரும்ப வழங்கப்படும்.இது
மட்டுமல்லாமல், ஈமு கோழிகளை வளர்க்க இடமில்லாதவர்களைப் பொருத்தவரையில்,
அந்த பண்ணை நிறுவனங்களே ஈமு கோழிக் குஞ்சுகளை வளர்த்து மாதம் குறிப்பிட்ட
ஒரு தொகையினை அந்த முதலீட்டாளர்களுக்கு வழங்கி, குறிப்பிட்ட காலத்திற்குப்
பின் முதலீட்டுத் தொகையை திரும்ப வழங்கும் திட்டமும் சில தனியார்
நிறுவனங்களால் செயல்படுத்தப்பட்டு வந்தது. சொத்துகள் பறிமுதல்:
இந்தத் திட்டத்தின்படி, மாதா மாதம் வழங்கப்பட வேண்டிய தொகையை ஆகஸ்ட் மாதம்
முதல் முதலீடு செய்தவர்களுக்கு மேற்படி நிறுவனங்கள் வழங்கவில்லை.
இதனையடுத்து, இது தொடர்பாக சில ஈமு பண்ணை நிறுவனங்கள் மீது 16 புகார்கள்
காவல் துறையினரால் பெறப்பட்டுள்ளன. இந்தப் புகார்களின் மீது நடவடிக்கை
எடுக்கப்பட்டு 33 நபர்கள் எதிரிகளாக சேர்க்கப்பட்டுள்ளனர். இதுவரை பணம்
வழங்காதமைக்காக 4 எதிரிகள் கைது செய்யப்பட்டு நீதிமன்றக் காவலில்
அடைக்கப்பட்டுள்ளனர். இதர எதிரிகள் தலைமறைவாகி விட்டனர். தலைமறைவானவர்களை விரைந்து கைது செய்வதற்கான நடவடிக்கைகளை எடுக்குமாறு காவல் துறைக்கு நான் உத்தரவிட்டுள்ளேன். முதலீட்டாளர்களுக்கு
பணம் வழங்காத ஈமு பண்ணை நிறுவனங்களின் சொத்துக்களை நீதிமன்ற நடவடிக்கைகள்
மூலம் பறிமுதல் செய்யவும், முதலீட்டாளர்களுக்கு அவர்கள் முதலீடு செய்த
பணத்தை திருப்பி வழங்க நடவடிக்கை எடுக்கவும் காவல் துறைக்கு
உத்தரவிட்டுள்ளேன். கால்நடை பராமரிப்புத் துறை ஏற்பு: ஈமு பண்ணை
நிறுவனதாரர்கள் தலைமறைவாகிவிட்ட காரணத்தாலும், பண்ணையில் பணிபுரிபவர்கள்
அங்கிருந்து சென்றுவிட்ட காரணத்தாலும், ஈமு பண்ணைகளில் உள்ள கோழிகளை பேணிப்
பாதுகாப்பதில் தொய்வு ஏற்பட்டுள்ளது.இதன் காரணமாக ஈமுக் கோழிகள்
இறக்கும் சூழ்நிலை ஏற்பட்டதையடுத்து, கால்நடை பராமரிப்புத் துறை மூலம்
தீவனம் அளித்து அந்தக் கோழிகளை பேணிப் பாதுகாக்க நான் உத்தரவிட்டுள்ளேன்.
கால்நடை பராமரிப்புத் துறை இந்தப் பணிகளை மேற்கொண்டு வருகிறது. இது தவிர,
நாமக்கல் கால்நடை மருத்துவக் கல்லூரியிலிருந்தும், கால்நடை பராமரிப்புத்
துறையிலிருந்தும் கால்நடை மருத்துவர்கள் இந்தப் பண்ணைகளுக்கு சென்று
கோழிகளுக்குத் தேவையான மருத்துவ வசதிகளை செய்து கொடுத்துள்ளனர்.ஈமு
கோழிக் குஞ்சுகள் முழு வளர்ச்சி அடைய இன்னும் 3 மாத காலம் ஆகும் என்பதால்,
அவற்றைப் பராமரிக்கத் தேவையான நிதி வசதியை கால்நடை பராமரிப்புத் துறைக்கு
வழங்க நான் உத்தரவிட்டுள்ளேன். கோழிக் குஞ்சுகள் முழு வளர்ச்சி அடைந்தவுடன்
அவற்றை விற்பதற்கான நடவடிக்கைகள் எடுக்கப்பட்டு, அதன் மூலம் பெறப்படும்
தொகை கோழித் தீவனச் செலவிற்கு ஈடு செய்யப்பட்டு, மீதித் தொகை
முதலீட்டாளர்களுக்கு வழங்கப்படும் என்று முதல்வர் ஜெயலலிதா
தெரிவித்துள்ளார்.