கட்டுக்கட்டாக பணம், தங்க நகைகள், கொலுசுகள் பறிமுதல்

தமிழகத்தில் இரண்டு நாட்களாக நடத்தப்பட்ட சோதனைகளில், கட்டு கட்டாக பணமும், புடவைகளும், தங்க நகைகளும் பறிமுதல் செய்யப்பட்டன.
கிருஷ்ணகிரி: நேற்று பகல் 12 மணியளவில், கிருஷ்ணகிரி
டோல்கேட்டில், கர்நாடக மாநிலத்தில் இருந்து கிருஷ்ணகிரி நோக்கி வந்த,
"டாடா சபாரி' காரை நிறுத்தி, போலீசார் சோதனை செய்தனர். சோதனையில், காரில்
இருந்த சூட்கேசில், இரண்டு லட்சத்து 37 ஆயிரம் ரூபாய் இருந்தது.
விசாரணையில், பணத்துக்கும், காருக்கும் உரிய ஆவணங்கள் எதுவும் இல்லாதது
தெரிய வந்தது. பறக்கும் படையினர், பணத்தையும், காரையும் பறிமுதல் செய்து,
பணத்தை வருமான வரித்துறையினரிடம் ஒப்படைத்தனர். காரில் வந்த இருவரும்
ஆவணங்களை ஒப்படைத்து விட்டு, காரை எடுத்துச் செல்லுமாறு அதிகாரிகள்
கூறினர்.
திருச்செங்கோடு: நேற்று காலை திருச்செங்கோடு மலைச்சுத்தி
சாலையில், துணை ராணுவத்தினர் வாகன தணிக்கை மேற்கொண்டிருந்தனர். அப்போது
திருச்சியில் இருந்து வந்த டாடா சுமோ காரில், கணக்கில் காட்டப்படாத,
நான்கு கிலோ தங்க நகைகள் இருந்தது தெரிய வந்தது. அவற்றை பறிமுதல் செய்த
போலீசார், ஆர்.டி.ஓ.,விடம் ஒப்படைத்தனர். காரில் வந்த பிரசன்னா, பிரகாஷ்
ஆகியோரிடம் விசாரணை நடக்கிறது.
வந்தவாசி: நேற்று முன்தினம், இரவு 10.30 அளவில், வந்தவாசி
நகரில் ஐந்து கண் பாலம் அருகே, போலீசார் வாகன சோதனையில் ஈடுபட்டனர்.
அப்போது, காஞ்சிபுரத்திலிருந்து வந்தவாசி வழியாக, நெல்லைக்கு சென்ற,
"மேக்சி கேப்' வேனை நிறுத்தி சோதனை செய்தனர். வேனில், 164 பெட்டிகளில்,
871 பட்டுச் சேலைகள் இருந்தது தெரிந்தது; இவற்றின் மொத்த மதிப்பு, 1
கோடியே 30 லட்சம் ரூபாய். வேனில் வந்த பிரசாத், சீனிவாசன் ஆகிய
இருவரிடமும், பறக்கும் படை தாசில்தார் விசாரணை நடத்தினார். பிரசாத்
கூறுகையில், "காஞ்சிபுரத்தில், 99 கடைகளில் இருந்து மொத்தமாக கொள்முதல்
செய்த பட்டுச் சேலைகளை விற்பனைக்காக, நெல்லை ஜவுளி கடைக்கு எடுத்துச்
செல்கிறோம்' என கூறினார்.இருப்பினும் வேனுடன் பட்டுச் சேலைகளை அதிகாரிகள்
பறிமுதல் செய்து விசாரிக்கின்றனர். பட்டுச் சேலைகள் கொள்முதல் செய்த பில்
உண்மையானதா, போலியா; தேர்தல் பணிக்கு எடுத்துச் செல்லப்பட்டதா என்பது
குறித்து, தொடர்ந்து விசாரணை நடக்கிறது.
ஈரோடு: நேற்று முன்தினம், மாலை 5.45 மணிக்கு, ஈரோடு - கோவை
நெடுஞ்சாலையில், திண்டல்மலை செக்-போஸ்ட் அருகே, போலீசார் வாகன சோதனை
நடத்தினர். ஈரோடு நோக்கி வந்த, "டாடா இண்டிகா' காரை சோதனையிட்ட போது,
டிக்கியில், காக்கி கவர் சுற்றப்பட்ட இரண்டு பண்டல்கள் இருந்தன. ஒரு
பண்டலில் 1,000 ரூபாய் கட்டுகள் எட்டும், 500 ரூபாய் கட்டுகள் 34ம்
இருந்தன; இவற்றின் மொத்த மதிப்பு, 25 லட்சம் ரூபாய். மற்றொரு பண்டலில்
1,000 ரூபாய் கட்டுகள் ஏழும், 500 ரூபாய் கட்டுகள் 36ம் இருந்தன; இவற்றின்
மதிப்பு, 25 லட்சம் ரூபாய். மொத்தம் 50 லட்சம் ரூபாய் இருந்தது. பணத்தை
ஈரோடு ஆர்.டி.ஓ., சுகுமார் பறிமுதல் செய்தார். பணம் கொண்டு வந்த ஜீவா,
ஜீவானந்தம் ஆகியோரிடம், வருமான வரித் துறை அதிகாரிகள் விசாரணை நடத்தி
வருகின்றனர். அவர்கள் பயன்படுத்திய கார் பறிமுதல் செய்யப்பட்டது.ஜவுளித்
தொழில் செய்பவர்கள், ரியல் எஸ்டேட் தொழில் செய்பவர்களும் இது போல் பணம்
எடுத்துச் செல்லும் வழக்கம் கொண்டிருப்பதால், போலீசார் தீவிரமாக
விசாரித்து வருகின்றனர்.
கம்பம்: நேற்று மாலை கம்பம் நுகர்பொருள் வாணிப கழக அலுவலகம்
அருகே, அதிகாரி பழனிச்சாமி தலைமையிலான குழுவினர், மதுரை நோக்கி சென்ற
அம்பாசிடர் கார் ஒன்றை நிறுத்தி சோதனை செய்தனர். காரில் மதுரையை சேர்ந்த
பாலகிருஷ்ணன் பையில் 70 கிலோ எடை கொண்ட வெள்ளி கொலுசுகள் வைத்திருந்தார்.
இதற்கான ஆவணங்கள் ஏதும் இல்லை. கம்பம் வடக்கு போலீஸ் ஸ்டேஷனுக்கு
பாலகிருஷ்ணனை அழைத்து சென்றனர். முறையான ஆவணங்கள் இல்லாததால் 70 கிலோ
வெள்ளி கொலுசுகளை போலீசார் பறிமுதல் செய்தனர்.
தேவதானப்பட்டி: தேவதானப்பட்டி அருகே ஜெயமங்கலம் நான்கு ரோட்டில்
ஈரோட்டில் இருந்து ஆண்டிபட்டி வந்த இரண்டு, டாடா 909 சரக்கு
வேனில்,அ.தி.மு.க., தி.மு.க., தே.மு.தி.க., கரை வேட்டிகள் இருந்தன. இது
பற்றி போலீசார் விழிப்புணர்வு குழு தலைவர்கள் செல்வம், ஜவஹர்லால்
ஆகியோருக்கு தகவல் கொடுத்தனர். அவர்கள் வேனை கைப்பற்றி, ஜெயமங்கலம்
போலீசில் ஒப்படைத்தனர். போலீசார் விசாரணை நடத்தி வருகின்றனர்.
ரூ.34 லட்சத்துடன் கார் சிக்கியது: திண்டுக்கல் கலெக்டர்
அலுவலகம் அருகே டி.எஸ்.பி., கணேசன், இன்ஸ்பெக்டர் தெய்வம் தலைமையிலான
போலீசார் நேற்று இரவு 8மணிக்கு வாகன சோதனையில் ஈடுபட்டனர். அப்போது அந்த
வழியாக வந்த மாருதி ஸ்விப்ட் காரை (எண்: டி.என்:57, ஜெ 6574) சோதனை
செய்தனர். காரில் ஆர்.எம்.காலனியை சேர்ந்த தென்னவன்(31), நில புரோக்கர்
சண்முகம்(50) இருந்தனர். அவர்களிடமிருந்த சூட்கேசை திறந்து பார்த்த போது,
அதில் ரூ.34 லட்சம் இருந்தது. பணம் குறித்து போலீசார் விசாரணை நடத்தினர்.
தென்னவன் கூறியதாவது: தனது மாமனார் ராமச்சந்திரன், டிரான்ஸ்போர்ட்
கம்பெனி வைத்துள்ளார். அவர் ஒரு இடம் வாங்கியுள்ளார். இதற்காக திண்டுக்கல்
- திருச்சி பைபாஸ் ரோட்டில் உள்ள யூனிவர்சல் கம்பெனிக்கு பணத்தை கொண்டு
சென்றதாக போலீசாரிடம் தெரிவித்துள்ளார். கூடுதல் எஸ்.பி., சிவக்குமார்
கூறியதாவது: சோதனையின் போது காரில் இருந்து கைபற்றப்பட்ட ரூ.34 லட்சம்
குறித்து விசாரணை நடத்தப்பட்டது. பணத்தை திண்டுக்கல் யூகோ வங்கியில்
எடுத்துள்ளனர். நிலம்வாங்குவதற்காக பணம் கொண்டு சென்றது உறுதி
செய்யப்பட்டுள்ளது. கலெக்டரிடம் அனுமதி பெற்று, இந்த பணம் நாளை அரசு
கருவூலத்தில் ஒப்படைக்கப்படும். தேர்தல் நேரத்தில் ரூ.1 லட்சத்திற்கு மேல்
கொண்டு செல்லதடை இருந்தும் காரில் பல லட்சம் பணத்தை கொண்டு சென்றதால்,
காரும் பறிமுதல் செய்யப்பட்டுள்ளது. விசாரணைக்கே பின்பே கார்
ஒப்படைக்கப்படும் என்றார்.