கர்நாடக அணைகளுக்கு நீர்வரத்து அதிகரிப்பு: மேட்டூர் நீர்மட்டம் இனி அதிகரிக்கும்

மேட்டூர்: தென்மேற்கு பருவமழை தீவிரம் அடைந்துள்ளதால், கர்நாடகா
அணைகளுக்கு நேற்று வினாடிக்கு, 55 ஆயிரம் கன அடி நீர் வந்தது. கபினி இன்று
நிரம்பும் என்பதால், மேட்டூர் அணைக்கு உபரி நீர் திறக்கப்படும் என,
எதிர்பார்க்கப்படுகிறது.

"கிடுகிடு' உயர்வு: கர்நாடகாவில், காவிரி நீர்பிடிப்பு
பகுதியில், பருவ மழை குறிப்பிட்ட காலத்தில் பெய்யவில்லை. தற்போது, இரு
மாதங்களுக்குப் பிறகு, தென்மேற்கு பருவமழை தீவிரம் அடைந்துள்ளது. இதனால்,
காவிரி, துணை ஆறுகள் குறுக்கே கட்டியுள்ள, கே.ஆர்.எஸ்., கபினி, ஹேமாவதி,
ஹேரங்கி அணைகளுக்கு நீர்வரத்து, "கிடு கிடு'வென அதிகரித்துள்ளது. நேற்று
முன்தினம் வினாடிக்கு, 3,626 கன அடியாக இருந்த, ஹேரங்கி நீர்வரத்து, நேற்று
வினாடிக்கு, 9,074 கன அடியாக அதிகரித்தது. ஹேரங்கி நிரம்பியதால்,
வினாடிக்கு, 9,088 கன அடி உபரி நீர், கே.ஆர்.எஸ்., அணைக்கு திறக்கப்
பட்டது. வினாடிக்கு, 20 ஆயிரத்து, 800 கன அடியாக இருந்த ஹேமாவதி நீர்வரத்து
நேற்று, 24 ஆயிரத்து, 404 கன அடியாக அதிகரித்தது. ஹேமாவதி நிரம்ப
இன்னமும், 14 டி.எம்.சி., நீர் தேவை.

வரத்து அதிகரிப்பு: நேற்று முன்தினம் வினாடிக்கு, 1,859 கன
அடியாக கே.ஆர்.எஸ்., வந்த நீர்வரத்து, நேற்று, 8,358 கன அடியாக
அதிகரித்தது. கே.ஆர்.எஸ்., நிரம்ப இன்னமும், 38 டி.எம்.சி., நீர் தேவை.
கே.ஆர்.எஸ்., நிரம்பினால் மட்டுமே, உபரி நீர் மேட்டூர் அணைக்கு கிடைக்கும்.
வினாடிக்கு, 4,224 கன அடியாக இருந்த கபினி நீர்வரத்து நேற்று, 13
ஆயிரத்து, 79 கன அடியாக அதிகரித்தது. கபினி நிரம்ப இன்னமும், 2 டி.எம்.சி.,
நீர் தேவை. கபினி இன்று நிரம்பும் என்பதால், காவிரியில் உபரி நீர்
திறக்கப்படும். இந்த நீர், நேரடியாக மேட்டூர் அணைக்கு வந்து சேரும்.
மேட்டூர் அணை நீர்வரத்து, இரு நாட்களுக்கு பின் அதிகரிக்கும். நேற்றைய
நிலவரப்படி, கர்நாடகாவில் நான்கு அணைகளுக்கும் வினாடிக்கு, 55 ஆயிரம் கன
அடி நீர் வந்தது. நேற்று ஒரே நாளில், கர்நாடகா அணைகளில் நீர் இருப்பு, 8
டி.எம்.சி., அதிகரித்துள்ளது. ஆனால், நேற்று மாலை நிலவரப்படி, மேட்டூர் அணை
நீர்மட்டம், 73.740 அடியாகவும்; நீர் இருப்பு, 36 டி.எம்.சி.,யாகவும்
இருந்தது. வினாடிக்கு, 263 கன அடி நீர் மட்டுமே வந்தது. ஆனால், வெளியேறும்
நீர் அளவு தற்போது, ஆயிரம் கன அடிக்கு மேல் உள்ளது.

பாக்கி எவ்வளவு? காவிரி நடுவர் மன்ற தீர்ப்புப்படி, ஜூன் 1ம்
தேதி முதல், நேற்று வரை, கர்நாடகா, 66.600 டி.எம்.சி., நீரை, மேட்டூர்
அணைக்கு வழங்க வேண்டும். ஆனால், 3.574 டி.எம்.சி., நீர் மட்டுமே, கர்நாடக
அரசு வழங்கி உள்ளது. இன்னமும், 63 டி.எம்.சி., நீர் வர வேண்டி உள்ளது.
நேற்று ஒரே நாளில், கர்நாடகா அணைகளுக்கு, 8 டி.எம்.சி., நீர் வந்த
நிலையில், கடந்த, 68 நாளில், மேட்டூர் அணைக்கு, 3.574 டி.எம்.சி., நீர்
மட்டுமே வந்துள்ளது, குறிப்பிடத்தக்கது.