தமிழ்நாடு சமூக தணிக்கை சங்கம் உருவாக்கப்படும் : தமிழக அரசு

சென்னை, ஆக.7 :
மகாத்மா காந்தி தேசிய ஊரக வேலை உறுதித் திட்டத்தின் கீழ் ஒவ்வொரு
ஊராட்சியிலும் நடைபெறும் பணிகள், ஊராட்சிகள் மூலம் பணியாற்றுபவர்களுக்கு
வழங்கப்படும் ஊதியம் ஆகியவற்றை தணிக்கை செய்யும் நோக்கில், “தமிழ்நாடு
சமூக தணிக்கை சங்கம்” என்ற ஓர் அமைப்பினை உருவாக்க தமிழக முதல்வர்
உத்தரவிட்டுள்ளார். இது குறித்து தமிழக அரசு வெளியிட்டுள்ள
செய்திக் குறிப்பில், தமிழ்நாடு சமூக தணிக்கை சங்கத்தில் பணியாற்றுவதற்காக
இயக்குநர் 1, இணை இயக்குநர் 2, உதவி இயக்குநர் 1, சமூக தணிக்கை நிபுணர் 1,
மாநிலக் குழுக் கண்காணிப்பாளர் 4, உதவி பணியாளர்கள் 4, மாவட்ட அளவில்,
மாவட்ட வள ஆதார அலுவலர் 44, மாவட்ட உதவி பணியாளர் 31, வட்டார வள ஆதார
அலுவலர் 770 என 858 பணியிடங்களை உருவாக்க தமிழக முதலமைச்சர்
உத்தரவிட்டுள்ளார். மேலும், ஊரக வேலை உறுதி திட்டத்தில் பணியாற்றும்
கல்வியறிவு பெற்ற தொழிலாளர்கள், ஒரு ஊராட்சிக்கு 5 நபர் வீதம் 62,620 பேரை
வருடத்தில் 5 நாட்களில் தணிக்கைப் பணியில் ஈடுபடுத்தவும் முதலமைச்சர்
உத்தரவிட்டுள்ளார். தமிழகத்திலுள்ள 12,524 ஊராட்சிகளில்
ஒவ்வொரு ஊராட்சியிலும் பணியாற்றும் ஊராட்சி உதவியாளர் என்ற பணியிடத்தின்
பெயரை ஊராட்சி செயலாளர் என பெயர் மாற்றம் செய்து, அவர்களின் பணியின்
முக்கியத்துவத்தைக் கருத்தில் கொண்டு, அவர்களுக்கு காலமுறை ஊதியம்
2500-5000 மற்றும் தர ஊதியம் 500 ரூபாயுடன் சிறப்பு படியாக மாதம் 500
ரூபாய் வழங்க அரசு உத்தரவிட்டது.தற்போது, கிராம ஊராட்சி செயலாளர்கள்
தங்கள் பணிகளை மேன்மையாக செய்யும் பொருட்டு, பணி நிமித்தமாக அவர்கள்
பணிபுரியும் கிராம ஊராட்சிகளிலிருந்து, சம்பந்தப்பட்ட மாவட்ட ஆட்சித்
தலைவர், உதவி இயக்குநர் (ஊராட்சிகள்), உதவி இயக்குநர் (தணிக்கை) மற்றும்
ஊராட்சி ஒன்றிய அலுவலகங்களுக்கு அடிக்கடி சென்று வர வேண்டியதன்
அவசியத்தைக் கருத்தில் கொண்டும், அதற்காக அவர்களுக்குப் பயணப்படி எதுவும்
வழங்கப்படுவதில்லை என்பதைக் கருத்தில் கொண்டும், ஊராட்சி செயலர்களுக்கு
மாதாந்திர நிரந்தரப் பயணப்படியாக 300 ரூபாய் வழங்க முதலமைச்சர்
உத்தரவிட்டுள்ளார். இதனால் தமிழகத்திலுள்ள 12,524 ஊராட்சி செயலாளர்கள் பயன்
அடைவார்கள். இதேபோன்று தமிழகத்திலுள்ள அனைத்து கிராம
குடியிருப்புகளில் வசிக்கும் மக்களுக்கு தரமான குடிநீர் வழங்கும் வகையில்
மின்மோட்டாரை இயக்கி மேல்நிலைத் தொட்டிகளில் தண்ணீரைச் சேமித்து, பின்னர்
கிராம குடியிருப்புகளுக்கு பகிர்ந்தளிக்கும் மேல்நிலை நீர்த்தேக்கத் தொட்டி
இயக்குபவரின் பணியின் தன்மையை கருத்தில் கொண்டு அவர்கள் பயன் அடையும்
வகையில், முதன் முறையாக அவர்களுக்கு சிறப்புப் படியாக மாதம் ஒன்றுக்கு 200
ரூபாய் வழங்க முதலமைச்சர் உத்தரவிட்டுள்ளார்.