வலுவான லோக்பால் இல்லையேல் ஆட்சியிலிருந்து விலகுங்கள்: ஹசாரே எச்சரிக்கை

புது தில்லி, ஜூலை 30: ""வலுவான லோக்பால் சட்டம் கொண்டு வர முடியாவிட்டால்
ஆட்சியிலிருந்து இந்த அரசு விலக வேண்டும்'' என்று மத்திய அரசுக்கு சமூக ஆர்வலர்
அண்ணா ஹசாரே திங்கள்கிழமை எச்சரிக்கை விடுத்தார்.
தில்லி ஜந்தர் மந்தரில் ஹசாரே குழுவைச் சேர்ந்த அரவிந்த் கேஜரிவால், மணீஷ்
சிசோடியா, கோபால் ராய் ஆகியோர் இம்மாதம் 25-ம் தேதி முதல் காலவரையற்ற உண்ணாவிரதத்தை
மேற்கொண்டுள்ளனர்.
ஊழலுக்கு எதிரான வலுவான லோக்பால் சட்டத்தைக் கொண்டு வர வேண்டும்; ஹசாரே குழு
புகார் கூறியுள்ள 15 மத்திய அமைச்சர்கள் மீதான புகார் குறித்து விசாரணைக்கு
உத்தரவிட வேண்டும் என்ற கோரிக்கைகளை வலியுறுத்தி அவர்கள் இந்தப் போராட்டத்தை நடத்தி
வருகின்றனர்.
அவர்களின் கோரிக்கைக்கு மத்திய அரசு பதில் அளிக்கத் தவறியதால், கடந்த
ஞாயிற்றுக்கிழமை முதல் அண்ணா ஹசாரேவும் காலவரையற்ற உண்ணாவிரதத்தைத் தொடங்கியுள்ளார்.
அவருக்கு ஆதரவாக நூற்றுக்கணக்கானோர் உண்ணாவிரதம் இருந்து வருகின்றனர்.
இந்த நிலையில், 2வது நாள் உண்ணாவிரத்தின்போது தில்லியில் பரவலாக மழை பெய்தது.
அதைப் பொருட்படுத்தாமல் 400-க்கும் மேற்பட்ட ஆதரவாளர்கள் கொட்டும் மழையில் ஜந்தர்
மந்தர் பகுதியில் நின்றிருந்தனர்.
ஆட்சியிலிருந்து விலகுங்கள்: காலை 11 மணியளவில் அண்ணா ஹசாரேவும் அவரது
குழுவினரும் உண்ணாவிரத மேடைக்கு வந்தனர். அவர்களுக்கு மருத்துவர்கள் பரிசோதனை
செய்தனர். அப்போது, அண்ணாவின் ரத்த அழுத்தம், சர்க்கரை அளவு இயல்பு நிலையில்
இருப்பதாக மருத்துவர்கள் தெரிவித்தனர்.
இதைத் தொடர்ந்து ஆதரவாளர்களிடையே பேசிய அண்ணா ஹசாரே, ""இந்தியா முழுவதும்
ஊழலுக்கு எதிரான அலை வீசத் தொடங்கியுள்ளது. இதைப் பார்க்கும்போது, வலுவான லோக்பால்
சட்டத்தை மத்திய அரசு கொண்டு வர வேண்டும். இல்லையேல், ஆட்சியில் இருந்து விலக
வேண்டும்'' என்றார்.
டிவிட்டரில் கேஜரிவால்: ஜந்தர் மந்தரில் 6வது நாளாக உண்ணாவிரதம் இருந்து வரும்
அரவிந்த் கேஜரிவாலின் உடல்நிலை பலவீனமாக இருந்ததால் "டிவிட்டர்' சமூக இணையதளம்
வாயிலாக அவர் தனது கருத்தைப் பதிவு செய்து வருகிறார்.
அவரது டிவிட்டரில், ""இந்த வாரம் நாட்டின் வரலாற்றில் முக்கியமானதாகும். இது
வாழ்வா? சாவா? போராட்டம் ஆகும். எதிர்காலம் இந்தியாவுக்கு மட்டுமே சொந்தம்.
அதனால், திரளாக வந்து போராட்டத்துக்கு ஆதரவு தாருங்கள். நாங்கள் அண்ணாவுடன்
இருக்கலாம். இல்லாமலும் போகலாம். ஆனால், வாழும் நாள்களில் நமது தாயகத்தை சில கும்பல்
கொள்ளையடிக்க அனுமதிக்கக் கூடாது'' என்று கூறியுள்ளார்.
கிரண் பேடி: ""அண்ணா குழுவினருக்கும் பாபா ராம்தேவுக்கும் ஏதோ மோதல் ஏற்பட்டு
விட்டதாக ஊடகங்களில் செய்தி வெளியாகி வருகிறது. பாபா ராம்தேவ் "கருப்புப் பணத்தை
மீட்க வேண்டும்' என்று குரல் கொடுக்கிறார். நாங்கள் "ஊழலை ஒழிக்க வேண்டும்' என்று
குரல் கொடுக்கிறோம். அந்த வகையில் அண்ணாவும் சரி ராம்தேவும் சரி ஒரே நோக்கத்துக்காக
இரு வழிகளில் குரல் கொடுத்து வருகின்றனர்.
இந்த விஷயத்தில் அரசுக்கு ஒரே வாய்ப்புதான் இருக்கிறது. "செய்' அல்லது "செத்து
மடி'. வலுவான லோக்பால் சட்டம்தான் எங்கள் கோரிக்கை. அதைக் கொடுக்க முடியாதபோது
ஆட்சியில் ஏன் நீடிக்கிறீர்கள்? என்பது தான் அண்ணாவின் கேள்வி'' என கிரண் பேடி
கூறினார்.
சரத் பவார் வீடு முற்றுகை
"ஊழலுக்கு எதிரான இந்தியா' என்ற அமைப்பைச் சேர்ந்தவர்கள் எனக் கூறிக்கொண்ட
50-க்கும் மேற்பட்டோர் தில்லி ஜன்பத் சாலையில் உள்ள மத்திய விவசாயத் துறை அமைச்சர்
சரத் பவாரின் அரசு பங்களாவை பிற்பகல் 2.30 மணியளவில் முற்றுகையிட்டனர்.
"ஊழல் அமைச்சர் ஒழிக; பதவியை ராஜிநாமா செய்க' என அவர்கள் கோஷம் எழுப்பினர்.
இது குறித்து தகவலறிந்த போலீஸôர் சம்பவ இடத்துக்கு வந்து அவர்களைக் கைது செய்தனர்.
துக்ளக் சாலை காவல் நிலையத்தில் வைக்கப்பட்டிருந்த அவர்கள் மாலையில்
விடுவிக்கப்பட்டனர். இதேபோல், பிரதமர் மன்மோகன் சிங் இல்லம் முன்பு சனிக்கிழமையும்
மத்திய அமைச்சர் சிதம்பரம் இல்லம் முன்பாக ஞாயிற்றுக்கிழமையும் முற்றுகைப் போராட்டம்
நடத்தியவர்கள் அதே நாளிலேயே விடுவிக்கப்பட்டனர்.
அண்ணா குழு மறுப்பு: சரத் பவாரின் வீடு முன்பு போராட்டம் நடத்தியவர்கள் அண்ணா
ஹசாரே குழுவைச் சேர்ந்தவர்கள் அல்லர் என்று ஊழலுக்கு எதிரான இந்தியா அமைப்பின் ஊடக
ஒருங்கிணைப்பாளர் அஸ்வதி முரளிதரன் கூறினார்.