வலுவான லோக்பால் கோரி சாகும்வரை உண்ணாவிரதம்:அண்ணா ஹசாரே

by **அருள்** Sun Jul 29, 2012 9:11 am

புது தில்லி, ஜூலை 28: வலுவான லோக்பால் மசோதாவை நிறைவேற்ற வலியுறுத்தி கால
வரையற்ற உண்ணாவிரதப் போராட்டத்தை ஞாயிற்றுக்கிழமை தொடங்க உள்ளேன்; இக்கோரிக்கையை
வலியுறுத்தி இம்முறை சாகும்வரை உண்ணாவிரதம் இருப்பேன் என்று சமூக ஆர்வலர் அண்ணா
ஹசாரே அறிவித்துள்ளார்.
வலுவான லோக்பால் மசோதா, ஊழல் குற்றச்சாட்டுக்கு ஆளான மத்திய அமைச்சர்கள் மீது
நடவடிக்கை ஆகிய கோரிக்கைகளை வலியுறுத்தி ஹசாரேவின் ஆதரவாளரகள், நான்காவது நாளாக
தில்லயில் உள்ள ஜந்தர் மந்தரில் சனிக்கிழமை உண்ணாவிரதப் போராட்டம் நடத்தினர்.
முன்னதாக உடல்நிலையைக் கருத்தில் கொண்டு, இப்போராட்டத்தில் பங்கேற்க வேண்டாம்
என்று ஹசாரேவை அவரது ஆதரவாளர்கள் வலியுறுத்தியிருந்தனர். இந்நிலையில், தங்களது
கோரிக்கைகள் மீது சனிக்கிழமைக்குள் நடவடிக்கை எடுக்க வேண்டும் என்று ஹசாரே காலக்கெடு
விதித்திருந்தார். ஆனால், அது தொடர்பாக மத்திய அரசு எந்தவிதமான நடவடிக்கையும்
எடுக்கவில்லை. இதையடுத்து, சாகும்வரை உண்ணாவிரதப் போராட்டத்தை ஹசாரே அறிவித்துள்ளார்.
இது தொடர்பாக சனிக்கிழமை மதியம் போராட்டத் திடலில் ஹசாரே பேசியது:
""வலுவான லோக்பால் கொண்டு வருவதாகக் கூறி மத்திய அரசு எங்களை பலமுறை
ஏமாற்றிவிட்டது. அதனால், நான் மீண்டும் மீண்டும் உண்ணாவிரதப் போராட்டம் நடத்த
வேண்டிய நிலைக்கு தள்ளப்பட்டுள்ளேன்.
இம்முறை வலுவான லோக்பால் மசோதா நிறைவேறும்வரை உண்ணாவிரதம் இருப்பேன். இறுதி
மூச்சு இருக்கும்வரை போராட்டம் நடத்துவேன்.
நாடாளுமன்றத்தில் நல்லவர்கள் நுழையாவிட்டால், அரசியல் அமைப்பில் மாற்றம்
ஏற்படாது; வலுவான லோக்பால் மசோதாவும் நிறைவேற்றப்படாது.
இப்போது வாக்காளர்களுக்கு ரூ. 15 முதல் 30 ஆயிரம் வரை வேட்பாளர்கள்
தருகின்றனர். சட்டப் பேரவைத் தேர்தலுக்கு ரூ. 15 முதல் 20 கோடியும்; மக்களவைத்
தேர்தலில் ரூ. 50 கோடியும் வேட்பாளர்கள் செலவு செய்கின்றனர். வெற்றிபெற்ற பின், ஊழல்
செய்து சம்பாதிக்கும் பணத்தை எங்கே வைப்பது எனத் தெரியாமல், வெளிநாடுகளுக்கு
அனுப்புகின்றனர். இது குறித்து வாக்காளர்களுக்கு விழிப்புணர்வு ஏற்படுத்த வேண்டிய
நேரம் வந்துவிட்டது.
காங்கிரஸ், பாஜக போன்ற கட்சிகளின் கையில் நாட்டை ஒப்படைத்தால் நமது எதிர்காலம்
பாதுகாப்பாக இருக்காது.
போராட்டத்துக்குக் கூட்டம் வந்தால் மட்டும் பணி நடைபெறாது. கடுமையான உழைப்பு
இருந்தால்தான் கோரிக்கையை நிறைவேற்ற முடியும். பெரிய அரசியல் கட்சிகள் நடத்தும்
தேர்தல் கூட்டங்களில் கூட அதிக கூட்டம் கூடுவதில்லை'' என்றார் ஹசாரே.
கட்சி தொடங்க மாட்டேன்
எங்களை அரசியல் கட்சி தொடங்கி, இப்போதுள்ள கட்சிகளுக்கு மாற்றாக இருக்கும்படி
சிலர் கூறுகின்றனர். நான் அரசியல் கட்சி தொடங்க மாட்டேன்; தேர்தலிலும் போட்டியிட
மாட்டேன்.
இந்த உண்ணாவிரதப் போராட்டத்தில் உயிர் பிழைத்தேன் என்றால், மக்களின் சார்பில்
நிற்கும் நேர்மையான வேட்பாளர்களுக்கு ஆதரவாக நாடு முழுவதும் சுற்றுப்பயணம்
மேற்கொண்டு பிரசாரம் செய்வேன்.
முன்னதாக வேட்பாளராக நிற்க முன்வருபவரின் பின்னணியை எனது குழுவினர் ஆய்வு
செய்வர்.
பின்னர், அவர்களது பெயர்களை இணையதளத்தில் வெளியிட்டு மக்களின் கருத்தைக்
கேட்போம். அதன் அடிப்படையில் நேர்மையான நபர்களைத் தேர்ந்தெடுத்து தேர்தலில்
நிறுத்துவோம்.