சிங்கள வீரர்களுக்கு ராணுவப் பயிற்சி விவகாரம்: கருணாநிதிக்கு ஜெயலலிதா கடும் கண்டனம்

by **ஜனனி** Fri Jul 13, 2012 5:11 pm

சென்னை, ஜூலை 13-

தமிழக முதலமைச்சர் ஜெயலலிதா இன்று வெளியிட்டுள்ள அறிக்கையில் கூறியிருப்பதாவது:-

ஒட்டுமொத்த
தமிழர்களின் கடும் எதிர்ப்பையடுத்தும், எனது கடும் கண்டனத்தையடுத்தும்,
இலங்கை விமானப் படை வீரர்களுக்கு அளிக்கப்படும் தொழில்நுட்பப் பயிற்சியை
சென்னையில் உள்ள தாம்பரம் விமானப்படை நிலையத்திலிருந்து பெங்களூரில் உள்ள
எலகங்கா விமானப்படை நிலையத்திற்கு மாற்றி மத்திய அரசு உத்தரவு
பிறப்பித்துள்ளது என்ற தகவல் வரப் பெற்றவுடன், இலங்கை வீரர்கள் எவருக்கும்
இந்திய மண்ணில் பயிற்சி அளிக்கக் கூடாது என்றும், அவர்களை உடனடியாக
இலங்கைக்கு திருப்பி அனுப்ப வேண்டும் என்றும் நான் மத்திய அரசை
வலியுறுத்தியிருந்தேன்.

ஆனால், 'தமிழினத் தலைவர்' என்று கூறிக்கொள்ளும் திமுக தலைவர்
கருணாநிதியோ, “இலங்கை ராணுவத்திற்கு தமிழகத்திலே பயிற்சி அளிக்காமல், வேறு
மாநிலங்களிலே பயிற்சி அளித்தால்...” என்று செய்தியாளர்கள் கேட்ட
கேள்விக்கு, “அப்படி பயிற்சி அளிக்க முன் வந்தால் அப்போது பார்ப்போம்”
என்று தமிழ் உணர்வே இல்லாமலும், நழுவலாகவும் பேசியிருக்கிறார்.

இதை
நினைக்கும்போது, முல்லைப் பெரியாறு பிரச்சினைக்காக மத்திய அரசை எதிர்த்து
மதுரையில் கண்டனப் பொதுக்கூட்டம் நடைபெறும் என்று அறிவித்து, அதை கேரள
அரசுக்கு எதிரான போராட்டமாக மாற்றி, கடைசியில் அதையும் கைவிட்ட
நிகழ்ச்சிதான் நினைவிற்கு வருகிறது. தன்னுடைய நடவடிக்கைகள் அனைத்தும் கபட
நாடகங்கள் என்பதை மீண்டும் நிரூபித்து இருக்கிறார் கருணாநிதி.
கருணாநிதியின் இந்த நடவடிக்கைகள் “உதட்டில் வெல்லம், உள்ளத்தில் விஷம்”
என்ற பழமொழியைத் தான் நினைவுபடுத்துகின்றன.

தமிழ்
இனத்தின் மீது கருணாநிதிக்கு உண்மையிலேயே அக்கறை இருக்குமானால், மத்திய
அரசை வற்புறுத்தி, பயிற்சிக்காக இந்தியா வந்திருக்கும் இலங்கை விமானப் படை
வீரர்களை உடனடியாக திருப்பி அனுப்ப வலியுறுத்தி இருக்க வேண்டும். ஆனால்
இலங்கைத் தமிழர் நலனுக்காக அவ்வாறு செயல்படாதது அவரைப் பற்றி அறிந்த
எவருக்கும் வியப்பை ஏற்படுத்தாது.

இந்தியப் பேரரசு,
இலங்கை அரசிடம் பணிந்து செல்வது வருந்தத்தக்கது என்பதைத் தெரிவித்துக்
கொள்வதோடு, இலங்கை விமானப் படை வீரர்களை உடனடியாக இலங்கைக்கு திருப்பி
அனுப்ப நடவடிக்கை எடுக்க வேண்டும் என்று மத்திய அரசை மீண்டும்
வற்புறுத்திக் கேட்டுக் கொள்கிறேன்.

இவ்வாறு ஜெயலலிதா தனது அறிக்கையில் குறிப்பிட்டுள்ளார்.