கடும் எதிர்ப்பை கண்டு மத்திய பாதுகாப்பு அமைச்சகம் இலங்கை வீரர்களுக்கு பயிற்சி அளிக்கும் முடிவை கைவிட்டது.

சென்னை: இலங்கை தமிழர்களை கொன்று குவித்த இலங்கை ராணுவ வீரர்களுக்கு தமிழ்
மண்ணில் பயிற்சி அளிக்கும் முடிவுக்கு ஆளும் அ.தி.மு.க,. தி.மு.க.,
தே.மு.தி.க., ம.தி.மு.க., மற்றும் தமிழர் ஆதரவு கட்சிகள் காட்டிய
எதிர்ப்புக்கு பலன் கிடைத்தது. கடும் எதிர்ப்பை கண்டு மத்திய பாதுகாப்பு
அமைச்சகம் இலங்கை வீரர்களுக்கு பயிற்சி அளிக்கும் முடிவை கைவிட்டது. வந்த
வீரர்களை இலங்கைக்கு திருப்பி அனுப்பி வைக்க மத்திய அரசு தாம்பரம் விமான
துறைக்கு இன்று தகவல் அனுப்பியது. இந்த தகவலை விமான துறை அதிகாரிகள்
வெளியிட்டுள்ள செய்திக்குறிப்பில் தெரிவித்துள்ளது. இதனையடுத்து
இந்தியாவின் முடிவை கண்ட இலங்கை அரசு அதிர்ந்து போயிருக்கிறது.
இலங்கை
விமானப்படை வீரர்கள் ஒன்பது பேர், தாம்பரம் விமானப்படை நிலையத்தில்
தொழில்நுட்பப் பயிற்சி பெற வந்துள்ளதாக வெளியான தகவல், தமிழகத்தில் பெரும்
அதிர்ச்சியை ஏற்படுத்தியது. "இது தமிழ் இனத்துக்கு எதிரான மத்திய அரசின்
நடவடிக்கை' என கண்டித்துள்ள முதல்வர் ஜெயலலிதா, "வீரர்களை உடனே திருப்பி
அனுப்ப வேண்டுமென' வலியுறுத்தினார். தி.முக., - தே.மு.தி.க., - ம.தி.மு.க.,
உள்ளிட்ட கட்சிகளோடு, தமிழக காங்கிரஸ் கட்சியும், சிங்கள வீரர்களை உடனே
திருப்பி அனுப்ப வேண்டுமென குரல் எழுப்பின.
சென்னையை அடுத்த தாம்பரத்தில் இந்திய விமானப்படை பயிற்சி நிலையம் உள்ளது.
இங்கு, விமானங்களை பராமரித்தல் மற்றும் பழுது பார்ப்பதற்கான பொறியியல்
பயிற்சிகள் அளிக்கப்படுகின்றன. விமானப்படை வீரர்கள் பல்வேறு பிரிவுகளாக,
இங்கு வந்து பயிற்சி பெற்று திரும்புகின்றனர். நமது வீரர்களோடு, மத்திய
அரசின் ஒப்புதலோடு வெளிநாடுகளைச் சேர்ந்த விமானப்படை வீரர்களும், பயிற்சி
பெறுகின்றனர்.
ஒன்பது பேருக்கு பயிற்சி: இந்நிலையில், இலங்கை விமானப்படையைச்
சேர்ந்த ஒன்பது வீரர்கள் பயிற்சி பெறுவதற்காக தாம்பரம் வந்துள்ளதாக தகவல்
வெளியாகியுள்ளது. இலங்கைத் தமிழர் பிரச்னை; தமிழக மீனவர்கள் மீதான
தாக்குதல் காரணமாக, இலங்கை அரசுக்கு எதிராக, தமிழக அரசியல் கட்சிகள்
அனைத்தும் போர்க்குரல் எழுப்பி வரும் நிலையில், இலங்கை வீரர்களுக்கு
தமிழகத்தில் பயிற்சி அளிக்க
அனுமதித்துள்ளது அதிர்ச்சியளித்துள்ளது. இலங்கை விமானப் படையினருக்கு,
தமிழகத்தில் தொழில்நுட்பப் பயிற்சி அளிப்பது, தமிழர்களுக்கு எதிரான செயல்;
வீரர்களை உடனடியாக இலங்கைக்கு திருப்பி அனுப்ப வேண்டும் என,

மத்திய அரசை, முதல்வர் ஜெயலலிதா வலியுறுத்தினார். முதல்வர் கண்டனம்:
இது குறித்து அவர் வெளியிட்டுள்ள அறிக்கையில், ""இலங்கை வீரர்களுக்கு
பயிற்சி என்ற செய்தி, தமிழர்களின் நெஞ்சில் வேல் பாய்ச்சுவது போல் உள்ளது.
தமிழர்களுக்கு, தமிழ் இனத்திற்கு எதிரான மத்திய அரசின் இந்த நடவடிக்கை
கண்டனத்துக்குரியது,'' எனத் தெரிவித்துள்ளார். மேலும், ""இலங்கை
முகாம்களில் உள்ள தமிழர்கள், தங்கள் சொந்த இடங்களுக்கு திரும்பி,
சிங்களவர்களுக்கு சமமான உரிமைகளைப் பெறும் வரை, பிற நாடுகளுடன் இணைந்து,
இலங்கை மீது பொருளாதாரத் தடை விதிக்கப்பட வேண்டும் என, தமிழக சட்டசபையில்
தீர்மானம் நிறைவேற்றப்பட்டது. அப்போது, வாய்மூடி மவுனியாக இருந்த மத்திய
அரசு, தற்போது, இலங்கை விமானப்படை வீரர்களுக்கு, தமிழகத்தில் பயிற்சி
அளிக்க அனுமதி அளித்துள்ளது, தமிழர்களை அவமானப்படுத்தும் செயல். இலங்கை
போரில், பன்னாட்டு போர் விதிமுறைகளை மீறி செயல்பட்டவர்கள் மீது, நடவடிக்கை
எடுக்க வேண்டும் என, சர்வதேச அளவில் குரல்கள் ஒலித்துக் கொண்டிருக்கும்
நேரத்தில், இலங்கை வீரர்களுக்கு, தமிழகத்தில் பயிற்சி அளிப்பது
பொருத்தமற்றது,'' என முதல்வர் ஜெயலலிதா
தெரிவித்துள்ளார். கட்சிகள் கண்டனம்:
தி.மு.க., சார்பில் வெளியிடப்பட்ட அறிக்கையில், ""இலங்கையின் விமானப்
படையைச் சேர்ந்த ஒரு சிலருக்கு தாம்பரத்தில் பயிற்சி அளிப்பதாகச்
சொல்லப்படும் செய்தி உண்மையாக இருக்குமானால், அப்படி பயிற்சி அளிப்பது
கண்டிக்கத்தக்கது. பயிற்சிக்கு வந்தவர்களை உடனடியாக மத்திய அரசு
திருப்பியனுப்புவதே சரியாக இருக்கும்,'' எனத் தெரிவிக்கப்பட்டுள்ளது.
இலங்கை ராணுவ வீரர்களுக்கு பயிற்சி கொடுப்பதை கண்டித்துதாம்பரத்தில் நேற்று
சாலை மறியலில் ஈடுபட்ட ம.தி.மு.க.,வினர் கைது செய்யப்பட்டனர். அக்கட்சியின் பொதுச் செயலர்

வைகோ வெளியிட்டுள்ள அறிக்கையில், ""இது மன்னிக்க முடியாத துரோகம்.
தாம்பரத்தில் உள்ள சிங்கள விமானப் படையினரை, உடனடியாக அங்கிருந்து
வெளியேற்ற வேண்டும்,'' எனத் தெரிவித்துள்ளார்.
""மத்திய அரசு கடைபிடிக்கும் இலங்கை தொடர்பான அயல்நாட்டு கொள்கை
சிங்களர்களின் பக்கமே உள்ளது என்பதை பயிற்சி வெளிப்படுத்துவதாக,''
தே.மு.தி.க.,வும், ""இது போன்ற ஒரு நிகழ்வு சில ஆண்டுகளுக்கு முன்
வந்தபோது, தமிழகத்தில் இருக்கிற ராணுவ நிலையங்களில் இவர்களுக்கு பயிற்சி
இருக்கக் கூடாது என்று ஒரு உத்தரவு இருக்கிறது. இப்போது பயிற்சி நடப்பது
உண்மை என்றால், அவர்களை தமிழகத்திலிருந்து திரும்பப் பெற வேண்டும்,'' என்று
தமிழக காங்கிரஸ் கட்சியும் தெரிவித்தது.