ஸ்பெக்ட்ரம் வழக்கில் ராஜா தாக்கல் செய்த மனு: பதில் அளிக்கும்படி சி.பி.ஐ.,க்கு நோட்டீஸ்

புதுடில்லி : "2ஜி' ஸ்பெக்ட்ரம் வழக்கில், தனக்கு எதிராக குற்றச்சாட்டு
பதிவு செய்யப்பட்டதை எதிர்த்து, தொலைத் தொடர்புத் துறை முன்னாள் அமைச்சர்
ராஜா தாக்கல் செய்த மனுவுக்கு பதில் அளிக்கும்படி, சி.பி.ஐ.,க்கு, டில்லி
ஐகோர்ட் நோட்டீஸ் அனுப்பியுள்ளது.

"2ஜி' வழக்கில் ராஜாவுக்கு எதிராக, ஏமாற்றுதல், மோசடி, குற்றச் சதி ஆகிய
வழக்குகள் பதிவு செய்யப்பட்டன. இந்நிலையில், தனக்கு எதிராக குற்றச்சாட்டு
பதிவு செய்யப்பட்டதை எதிர்த்து, டில்லி ஐகோர்ட்டில், ராஜா தரப்பில் மனு
தாக்கல் செய்யப்பட்டது.

அந்த மனுவில் கூறப்பட்டிருந்ததாவது:கடந்த, 2003-07ம் ஆண்டு
வரையிலான காலத்தில், தொலைத் தொடர்புத் துறையால், 51 உரிமங்கள்
வழங்கப்பட்டன. இந்த உரிமங்களை வழங்குவதற்கு, என்ன விதிமுறைகள்
பின்பற்றப்பட்டதோ, அதே விதிமுறைகளைத் தான், கடந்த 2008ல் உரிமங்கள்
வழங்குவதற்கு, நான் பின்பற்றினேன். ஆனால், என் மீது மட்டும், இதற்காக
குற்றச்சாட்டு பதிவு செய்யப்பட்டுள்ளது. கடந்த 2003-07 ஆண்டுகளில்
வழங்கப்பட்ட உரிமங்கள் குறித்து, குற்றச்சாட்டும் பதிவு செய்யப்படவில்லை.

எனவே, இந்த வழக்கு தொடர்பான விசாரணையில், பாரபட்சம் காட்டப்பட்டுள்ளது.
சி.பி.ஐ., சிறப்பு கோர்ட்டும், இந்த விஷயத்தை புறக்கணித்துள்ளது. தொலைத்
தொடர்பு உரிமங்கள் வழங்குவதில், எனக்கு முன் அமைச்சர்களாக இருந்தவர்கள்
பின்பற்றிய விதிமுறையைத் தான், நானும் பின்பற்றினேன். எனவே, என் மீது மோசடி
வழக்கு பதிவு செய்தால், கடந்த 2003ல் இருந்து, தொலைத் தொடர்புத் துறை
அமைச்சராக இருந்த ஒவ்வொருவரின் மீதும், இதுபோன்ற வழக்கு பதிவு செய்யப்பட
வேண்டும். தொலைத் தொடர்பு உரிமங்கள் வழங்குவது தொடர்பான முடிவு,
சம்பந்தப்பட்ட அமைச்சர் மட்டும் எடுத்த முடிவல்ல. மத்திய அமைச்சரவை எடுத்த
முடிவும் கூட.இவ்வாறு, அந்த மனுவில் ராஜா குறிப்பிட்டிருந்தார்.

இந்நிலையில், இந்த மனு, டில்லி ஐகோர்ட்டில், நீதிபதி ஏ.கே.பதக் முன்,
நேற்று விசாரணைக்கு வந்தபோது, ராஜாவின் மனு குறித்து, வரும் செப்டம்பர் 6ம்
தேதிக்குள் விளக்கம் அளிக்கும்படி, சி.பி.ஐ.,க்கு நோட்டீஸ் அனுப்ப,
நீதிபதி உத்தரவிட்டார்.

"2ஜி' ஸ்பெக்ட்ரம் ஒதுக்கீட்டில் நடந்த முறைகேடு காரணமாக, அரசுக்கு,
1.76 லட்சம் கோடி ரூபாய் இழப்பீடு ஏற்பட்டதாக, மத்திய தணிக்கைத் துறை
வெளியிட்ட அறிக்கையை அடுத்து, இந்த வழக்கை, சி.பி.ஐ., விசாரித்தது. தொலைத்
தொடர்புத் துறை முன்னாள் அமைச்சர் ராஜா உள்ளிட்டோர் கைது செய்யப்பட்டனர்.
ராஜா மற்றும் இந்த வழக்கில் குற்றம் சாட்டப்பட்ட மற்றவர்களுக்கு எதிராக,
டில்லி சி.பி.ஐ., சிறப்பு கோர்ட்டில், குற்றச்சாட்டு பதிவு செய்யப்பட்டது.