9 கர்நாடக அமைச்சர்கள் ராஜிநாமா: சதானந்த கெளடா அரசுக்கு நெருக்கடி

by **அருள்** Sat Jun 30, 2012 7:59 am

பெங்களூர், ஜூன் 29: கர்நாடக முதல்வர் சதானந்த கெளடாவை நீக்கக் கோரி,
எடியூரப்பா ஆதரவு அமைச்சர்கள் 8 பேர் தங்களது பதவியை வெள்ளிக்கிழமை ராஜிநாமா
செய்தனர். இதனால், சதானந்த கெளடா அரசுக்கு நெருக்கடி ஏற்பட்டுள்ளது.
முதல்வர் பதவியில் இருந்து சதானந்த கெளடாவை நீக்க வேண்டும் என்று கடந்த 4
மாதங்களாக முன்னாள் முதல்வர் எடியூரப்பா அணியினர் கோரி வந்தனர். இதற்கு பா.ஜ.க.
மேலிடம் செவிசாய்க்கவில்லை, மேலும் சட்டப் பேரவை பாஜக உறுப்பினர்கள் கூட்டத்தைக்
கூட்ட வேண்டும் என்ற கோரிக்கையையும் சதானந்த கௌடா ஏற்கவில்லை. இதையடுத்து தங்கள்
பதவியை ராஜிநாமா செய்ய எடியூரப்பா ஆதரவு அமைச்சர்கள் முடிவு செய்தனர்.
எடியூரப்பாவுடன் ஆலோசனை: எடியூரப்பா ஆதரவு அமைச்சர்கள், எம்.எல்.ஏ.க்கள்
வெள்ளிக்கிழமை ஊரக மேம்பாடு மற்றும் பஞ்சாயத்துராஜ் துறை அமைச்சர் ஜெகதீஷ் ஷெட்டர்
வீட்டில் ஆலோசனை நடத்தினர். பின்னர் டாலர்ஸ் காலனியில் உள்ள முன்னாள் முதல்வர்
எடியூரப்பாவின் வீட்டில், அவரை சந்தித்து சதானந்த கெüடாவுக்கு எதிராக எடுக்க
வேண்டிய அரசியல் வியூகங்கள் குறித்து விவாதித்தனர். சதானந்த கெளடாவை முதல்வர்
பதவியிலிருந்து நீக்கும் முடிவை வெள்ளிக்கிழமை இரவு 7 மணிக்குள் எடுக்கத் தவறினால்,
10 அமைச்சர்கள் தங்கள் பதவியை ராஜிநாமா செய்வது என்று முடிவெடுத்தனர்.
எடியூரப்பா ஆதரவு அமைச்சர்கள், ஜெகதீஷ் ஷெட்டர், ஷோபா கரந்தலஜே, பசவராஜ்
பொம்மை, ரேணுகாச்சார்யா, சி.எம்.உதாசி, வி.சோமண்ணா, முருகேஷ் நிரானி, ரேவுநாயக்
பெலமகி, உமேஷ்கத்தி, ராஜு கெüடா ஆகியோர் தங்களது ராஜிநாமா கடிதங்களைத் தயார்
செய்தனர்.
இந்நிலையில் குடகு, மண்டியா மாவட்டங்களில் சுற்றுப் பயணம் மேற்கொண்டிருந்த
முதல்வர் சதானந்த கெüடா, வெள்ளிக்கிழமை மாலை 6 மணிக்கு பெங்களூருக்கு திரும்பினார்.
இதைத் தொடர்ந்து, ஜெகதீஷ் ஷெட்டர் வீட்டில் இருந்து புறப்பட்டு முதல்வரின்
அனுக்கிரகா வீட்டுக்கு ஜெகதீஷ் ஷெட்டர், பசவராஜ் பொம்மை, ரேணுகாச்சார்யா,
சி.எம்.உதாசி, வி.சோமண்ணா, முருகேஷ் நிரானி, ரேவுநாயக் பெலமகி, உமேஷ்கத்தி ஆகிய 8
பேரும் சதானந்த கெüடாவை சந்தித்து தங்களது ராஜிநாமா கடிதங்களைக் கொடுத்தனர்.
முதல்வர்-அமைச்சர்களிடையே பிளவு: பின்னர் செய்தியாளர்களிடம் சி.எம்.உதாசி,
பசவராஜ் பொம்மை ஆகியோர் கூறியது:
கடந்த 4 மாதங்களாக முதல்வருக்கும், அமைச்சர்களுக்கும் இடையே கருத்து வேறுபாடு
நிலவி வருகிறது. இதுபற்றி விவாதிக்க சட்டப் பேரவை பாஜக உறுப்பினர்கள் கூட்டத்துக்கு
ஏற்பாடு செய்யுமாறு முதல்வரைக் கேட்டுக் கொண்டோம். இதற்கு அவர் செவிசாய்க்கவில்லை.
இதனால், பிரச்னை மேலும் தீவிரமடைந்தது. எங்கள் பிரச்னைக்குத் தீர்வு காணப்படாததால்
வேதனையடைந்த நாங்கள் முதல்வரிடம் ராஜிநாமா கடிதங்களைக் கொடுத்துள்ளோம்.
ஷோபா கரந்தலஜேவின் ராஜிநாமா கடிதத்தைக் கொடுத்த போது, அவர் நேரில் கொடுத்தால்
ஏற்பதாக முதல்வர் தெரிவித்தார். ராஜு கெளடா வெளியூரில் இருந்து திரும்பியதும்
ராஜிநாமா கடிதத்தை கொடுக்கத் திட்டமிட்டுள்ளார். எங்கள் பிரச்னைக்குத் தீர்வு காண
கட்சி மேலிடத்தின் கவனத்தை ஈர்க்கவே அமைச்சர் பதவிகளை ராஜிநாமா செய்துள்ளோம்.
இதை மிரட்டல் தந்திரம் என்று கூறினால் அதற்கு நாங்கள் எதுவும் கூற முடியாது.
எங்களது கோரிக்கைக்கு கட்சி மேலிடம் நல்ல தீர்வு காணும் என நம்புகிறோம். ராஜிநாமா
கடிதங்களைத் திரும்பப் பெறும் கேள்வி இப்போது எழாது என்றனர் அவர்கள்.
எடியூரப்பாவுடன் சந்திப்பு: ராஜிநாமா கடிதங்களைக் கொடுத்த ஜெகதீஷ் ஷெட்டர்,
பசவராஜ் பொம்மை, ரேணுகாச்சார்யா உள்ளிட்டோர் எடியூரப்பா வீட்டில் அவரைச் சந்தித்துப்
பேசினர். அடுத்தகட்ட அரசியல் நகர்வுகள் குறித்து எடியூரப்பாவுடன் அவரது ஆதரவாளர்கள்
ஆலோசனை நடத்தினர்.
முதல்வர் ஆலோசனை: அமைச்சர்கள் ராஜிநாமா செய்துள்ள நிலையில், முதல்வர் சதானந்த
கெளடாவை பாஜக தேசிய அமைப்புச் செயலாளர் சதீஷ் சந்தித்து நீண்ட நேரம் ஆலோசனை
நடத்தினார்.
இந்தச் சூழ்நிலையில் மேலிடம் எடுக்க வேண்டிய முடிவுகள் குறித்து இருவரும்
விவாதித்ததாகத் தெரிகிறது. அமைச்சர்களின் ராஜிநாமா கடிதங்களை ஏற்பதா, வேண்டாமா
என்பது குறித்தும் இருவரும் ஆலோசித்தனர்.
முதல்வர் பதவியில் இருந்து சதானந்த கெளடாவை நீக்குவதற்கு கட்சி மேலிடத்தின்
மீது அழுத்தம் கொடுப்பதற்காகவே 8 அமைச்சர்கள் ராஜிநாமா கடிதங்களைக் கொடுத்துள்ளதாக
அரசியல் நோக்கர்கள் கருதுகிறார்கள். ஆட்சியைக் கவிழ்க்காமல் சதானந்த கெüடாவை மட்டும்
முதல்வர் பதவியில் இருந்து நீக்குவதற்கான அரசியல் நகர்வுகளை மட்டும் முன்னெடுக்க
எடியூரப்பா அணியினர் ஆலோசித்து வருவதாகக் கூறப்படுகிறது. இதற்குப் பதிலடி கொடுக்கும்
வகையில், அமைச்சர்களின் ராஜிநாமா கடிதங்களை ஏற்காமல் நிலுவையில் வைக்க சதானந்த கெüடா
தீர்மானித்துள்ளதாகத் தெரிகிறது.
எம்.எல்.ஏ.க்கள் ராஜிநாமா:
எடியூரப்பா ஆதரவு எம்.எல்.ஏ. பி.பி.ஹரீஷ் கூறியது:
8 அமைச்சர்கள் ராஜிநாமா செய்துள்ளனர். பாஜக எம்.எல்.ஏ.க்களை சதானந்த கெüடா
தொடர்ந்து அலட்சியப்படுத்தி வருவதால் இந்த நிலை ஏற்பட்டுள்ளது. அமைச்சர்களின்
ராஜிநாமா முதல்கட்ட நடவடிக்கை. எங்கள் கோரிக்கைக்கு மேலிடம் செவிசாய்க்காவிட்டால்,
எம்.எல்.ஏ.க்களும் ராஜிநாமா செய்வோம். இதற்கு எடியூரப்பாவின் அனுமதி தேவையில்லை.
எடியூரப்பாவுக்கு ஆதரவாக 60-க்கும் மேற்பட்ட எம்.எல்.ஏ.க்கள் உள்ளனர் என்றார்.