பிரதமர் வேட்பாளராக ஜெயலலிதாவை நிறுத்த நவீன் பட்நாயக் ஆலோசனை

by **logu** Sun May 13, 2012 6:56 am

ஜனாதிபதி தேர்தலில், ஐ.மு., கூட்டணி மற்றும் தே.ஜ., கூட்டணி வேட்பாளர்
தேர்வில் நிலவும் குழப்பம், ஒரு முடிவுக்கு வந்ததும், இறுதியாக அறிவிக்கும்
வேட்பாளருக்கு ஆதரவு கேட்டு வரும் அணிகளுக்கு, தங்கள் கட்சிகளின்
நிலைப்பாட்டை, ஒரு மித்த கருத்தாக அறிவிக்க, முதல்வர் ஜெயலலிதா, ஒடிசா
முதல்வர் நவீன் பட்நாயக் திட்டமிட்டுள்ளனர்.
வரும் லோக்சபா தேர்தலில்,
காங்கிரஸ், பா.ஜ., அல்லாத மாநில கட்சிகளின் ஆதரவுடன், மத்தியில் ஆட்சி
அமைப்பது குறித்து, போயஸ் கார்டன் இல்லத்தில், இரு முதல்வர்களும்
ஆலோசித்துள்ளதாக, அரசியல் வட்டாரங்கள் தெரிவிக்கின்றன.

பார்லிமென்ட்
கூட்டத் தொடர், வரும் 22ம் தேதி முடிவடைந்ததும், ஜனாதிபதி தேர்தல்
விவகாரம், அரசியல் வானில் சூடு பிடிக்கவுள்ளது. ஜனாதிபதி தேர்தல்
மட்டுமல்லாமல், வரும் லோக்சபா தேர்தலிலும், 100 சதவீத வெற்றியை பெறுவதற்கு,
அ.தி.மு.க., வியூகம் அமைத்துள்ளது.

அ.தி.மு.க., கணக்கு:தற்போதைய
பார்லிமென்டில், மொத்தமுள்ள, 542 இடங்களில், காங்கிரசுக்கு 220
எம்.பி.,க்களும், பா.ஜ., வுக்கு 130 எம்.பி.,க்களும் உள்ளனர்.ராஜிவ்
மரணத்திற்கு பின் நடந்த தேர்தலைத் தவிர, மற்ற தேர்தல்களில், காங்கிரஸ்
கட்சி தனி பெரும்பான்மை பெற முடியவில்லை. மற்ற மாநிலக் கட்சிகளின் ஆதரவுடன்
தான், காங்கிரஸ் கட்சி தலைமையில், மத்தியில் ஆட்சி நடத்தி வருகிறது.
அதேபோல, பா.ஜ.,வும் மாநில கட்சிகளின் தயவில் தான், மத்தியில் ஆட்சியை
நடத்தியது.

ஐ.மு., கூட்டணி அரசில், ஸ்பெக்ட்ரம் ஊழல், காமன்வெல்த்
ஊழல், ஆதர்ஸ் அடுக்குமாடி ஊழல் போன்றவை, ஆளுங்கட்சிக்கு பாதகமாக
அமைந்துள்ளன. கர்நாடக மாநில எடியூரப்பா விவகாரம், பங்காரு லட்சுமணனின் லஞ்ச
ஊழல் தண்டனை விவகாரம், தலைவர்களிடம் நிலவும் கோஷ்டிப்பூசல் போன்றவை,
பா.ஜ.,வுக்கு சாதகமாக அமையவில்லை என, மாநிலக் கட்சிகள் கருதுகின்றன.இந்த
இரு தேசியக் கட்சிகளால், லோக்சபா தேர்தலில் பெரும்பான்மை பெற்று ஆட்சி
அமைக்க முடியாது என்றும், அதனால், மூன்றாவது பெரிய கட்சி என்ற அந்தஸ்தை
பெறும் மாநிலக் கட்சி தான், மத்தியில் ஆட்சி அமைக்கும் அதிகாரத்தை பெறும்
எனவும், அ.தி.மு.க., கணக்கு போடுகிறது.

தேர்தலுக்கு பின் புதிய அணி:
தற்போதைய நிலவரப்படி, தமிழகம், ஆந்திரா, கர்நாடகா, உ.பி., பீகார், ஒடிசா,
மகாராஷ்டிரா, பஞ்சாப், மேற்கு வங்கம் போன்ற மாநிலங்களில் தான், அதிக
எம்.பி.,க்கள் தேர்ந்தெடுக்கப்படுவர். லோக்சபா தேர்தலுக்கு பின்,
பெரும்பான்மையான எம்.பி.,க்களை கைப்பற்றும் மாநிலக் கட்சிகள் தான், "புதிய
அணி' அமைத்து, மத்திய அமைச்சரவை உருவாக்கும் நிலை ஏற்படும்.குறைந்தபட்சம்,
30 முதல் 40 எம்.பி.,க்களை கையில் வைத்திருக்கும் கட்சி தான், பிரதமரை
தேர்வு செய்யும் நிலை உருவாகும். காங்கிரஸ் அல்லது பா.ஜ., ஆட்சி அமைக்க
முடியாத பட்சத்தில், மாநிலக் கட்சிகளின் தலைவர்களில் ஒருவரை பிரதமராக்க,
காங்கிரஸ் அல்லது பா.ஜ., முன் வரும்.

அப்போது, பிரதமர் பதவிக்கு,
ஜெயலலிதா, முலாயம் சிங், சரத்பவார், மம்தா, பிரகாஷ்சிங் பாதல், தேவகவுடா,
ஓம்பிரகாஷ் சவுதாலா போன்ற தலைவர்களின் பெயர்கள் அடிபடும்.
ஆனால்,
பிரதமர் வேட்பாளராக ஜெயலலிதாவை நிறுத்த, ஒடிசா முதல்வர் நவீன் பட்நாயக்
மற்றும் பா.ஜ., தலைவர்களில் சிலர், முன்மொழிய தயாராகவுள்ளனர். இந்த
முடிவுக்கு, மாநில கட்சிகளின் தலைவர்களின் ஆதரவு கிடைக்கும் என,
அ.தி.மு.க., கருதுகிறது.

ஆலோசனை:சமீபத்தில்,
சென்னைக்கு விஜயம் செய்த ஒடிசா முதல்வர் நவீன் பட்நாயக்கிற்கு, முதல்வர்
ஜெயலலிதா தலைமையில், சிறப்பான விருந்து அளிக்கப்பட்டது.அந்த விருந்து
சந்திப்பின் போது, ஜனாதிபதி தேர்தலில் இரு முதல்வர்களும் ஒருமித்த முடிவை
எடுப்பது, லோக்சபா தேர்தலில் மாநில கட்சிகளின் ஆதரவுடன் பிரதமர் பதவியை
நிர்ணயிப்பது குறித்து, இருவரும் போயஸ் கார்டன் இல்லத்தில் ஆலோசித்ததாக,
ஆளுங்கட்சி வட்டாரங்கள் தெரிவிக்கின்றன.

இது குறித்து, அ.தி.மு.க., பிரமுகர் கூறியதாவது:தேசிய
ஜனநாயக கூட்டணியில் இடம் பெற்றுள்ள நிதிஷ்குமார், நரேந்திரமோடி, பால்
தாக்கரே போன்ற தலைவர்களுக்கு முக்கியத்துவம் தருவதை போல, தனக்கு
முக்கியத்துவம் தரவில்லை என்ற
அதிருப்தி நவீன் பட்நாயக்கிற்கு
ஏற்பட்டுள்ளது. முதல்வர் ஜெயலலிதாவுடன் ஏற்படுத்தியுள்ள அரசியல் நட்பின்
காரணமாக, தேசிய அளவில் செல்வாக்கு உருவாக்கிக் கொள்ள, அவர்
விரும்புகிறார்.அதனால் தான், தேசிய பயங்கரவாத தடுப்பு மையத்தை ஆய்வு
செய்யும் முதல்வர்கள் தலைமையிலான குழுவுக்கு, ஜெயலலிதாவை தலைவராக நியமிக்க
வேண்டும் என, நவீன் பட்நாயக் குரல் கொடுத்தார். ஜனாதிபதி தேர்தலில்,
அ.தி.மு.க., எடுக்கும் நிலைப்பாட்டைத் தான், நவீன் பட்நாயக்கும்
எடுக்கவுள்ளார்.அடுத்த பிரதமராக, ஜெயலலிதாவை தேர்வு செய்ய வேண்டும் என
முன்மொழியவும், நவீன் பட்நாயக் தயாராகவுள்ளார். அதனால் தான், அவரை
கவுரவப்படுத்தும் வகையில், அமைச்சர்கள், எம்.எல்.ஏ.,க்களை நவீன்
பட்நாயக்கிற்கு அறிமுகப்படுத்தி, சிறப்பான விருந்து
அளிக்கப்பட்டுள்ளது.இவ்வாறு அவர் கூறினார்.