மத்திய அரசுக்கு ஆதரவு இல்லை: நவீன் பட்நாயக்

புவனேசுவரம், மார்ச் 7: மத்தியில் காங்கிரஸ் தலைமையிலான ஐக்கிய முற்போக்கு
கூட்டணி அரசுக்கு தமது கட்சி ஆதரவு தராது என்று உறுதிபடத் தெரிவித்தார் ஒரிசா மாநில
முதல்வரும், பிஜு ஜனதா தள கட்சித் தலைவருமான நவீன் பட்நாயக்.
சட்டப் பேரவைக்கான தொகுதிப் பங்கீட்டில் ஏற்பட்ட சிக்கலால் மத்திய அரசில்
இருந்து விலகிக் கொள்வதாக திமுக அறிவித்துவிட்டது. பிரச்னை அடிப்படையில் மத்திய
அரசுக்கு ஆதரவு அளிப்பதாகவும் அக்கட்சி கூறியுள்ளது.
ஆனால் மத்திய அரசுக்கு பிரச்னை அடிப்படையில் திமுக ஆதரவு தருவதாகக் கூறுவதில்
அர்த்தமில்லை. மத்திய அரசுக்கு அக்கட்சி அளித்துவந்த ஆதரவை வாபஸ் பெற்றுவிட்டதாகவே
கருத வேண்டும் என்று அரசியல் பார்வையாளர்கள் கூறுகின்றனர்.
திமுக ஆதரவை வாபஸ் பெற்றுவிட்டதால் மத்திய அரசு கவிழும் அபாயமும் வரலாம்
என்றும் அரசியல் பார்வையாளர்கள் கூறிவரும்நிலையில், அதற்கான வாய்ப்பே இல்லை. ஒருவேளை
அப்படியொரு நிலைமை வந்தால் மக்களவையில் 14 எம்.பி.க்களை வைத்துள்ள பிஜு ஜனதா தளம்
ஓடிவந்து மத்திய அரசைக் காப்பாற்றும் என்ற பரவலான பேச்சு அடிபடுகிறது.
ஞாயிற்றுக்கிழமை பிஜு ஜனதா தள மூத்த எம்.பி. மோகன் மொகபத்ராவை சந்தித்த
செய்தியாளர்கள், திமுக ஆதரவை வாபஸ் பெற்றுவிட்டதால் மத்திய அரசுக்கு ஆதரவு
அளிப்பீர்களா? என்று கேட்டனர். அதற்குப் பதில் அளித்த அவர், ஆதரவு குறித்து
எங்களிடம் இதுவரை யாரும் பேசவில்லை. அப்படி ஒருவேளை பேசினால் நாங்கள் பரிசீலிப்போம்
என்றார்.
மொகபத்ரா இவ்வாறு கூறியதால், மத்திய அரசுக்கு ஆதரவு அளிக்க பிஜு ஜனதா தளம்
தயாராக இருக்கிறது. மத்திய அரசு கவிழும் அபாயம் ஏற்பட்டால் அக்கட்சி ஆதரவுக் கரம்
நீட்டும் என்ற கருத்து மத்திய அரசியல் களத்தில் சூடுபிடித்துள்ளது.
இந்நிலையில் இது உண்மையா? காங்கிரஸ் ஆதரவு கோரினால் பிஜு ஜனதா தளத்தின்
நிலைப்பாடு என்னவாக இருக்கும் என்று கட்சித் தலைவர் நவீன் பட்நாயக்கிடம்
செய்தியாளர்கள் கேட்டதற்கு, மத்தியில் காங்கிரஸ் தலைமையிலான அரசுக்கு ஆதரவு என்ற
பேச்சுக்கே இடமில்லை. அவர்கள் கேட்கிறார்கள் என்பதற்காக உடனே ஆதரவு கொடுத்திட
முடியாது என்று தெளிவுபடுத்தினார்.
பாஜக தலைமையிலான தேசிய ஜனநாயகக் கூட்டணியில் இடம்பெற்றிருந்த பிஜு ஜனதா தளம்,
2009 மக்களவைத் தேர்தலின் போது அக்கூட்டணியில் இருந்து வெளியேறியது. அதன் பிறகு
மத்தியில் எந்த ஒரு கூட்டணியிலும் இடம்பெறுவதில்லை என்ற முடிவை அக்கட்சி எடுத்தது.
"பிஜு ஜனதா தளம் என்பது பிராந்தியக் கட்சி. அது ஒரிசா மக்களின் நலனுக்காக
மட்டும் பாடுபடும். மத்தியில் எந்த ஒரு கூட்டணிக்கும் ஆதரவு அளிக்காது' என்று நவீன்
பட்நாயக் அப்போது உறுதிபடத் தெரிவித்தார்.
அக்கட்சி தமது முடிவுக்கு ஏற்ப அன்று முதல் இன்றுவரை காங்கிரஸ், பாஜக
கட்சிகளிடம் சமமான இடைவெளியைக் கடைப்பிடித்து வருகிறது.