மின் பிரச்னைக்கு மூலகாரணம் யார்? முதல்வர் விளக்கம்

சென்னை:தமிழகத்தில் ஏற்பட்டுள்ள மின்சார பிரச்னைக்கு காரணம் என்ன என்பது
குறித்து, முதல்வர் ஜெயலலிதா சட்டசபையில் விளக்கம் அளித்தார்.

அதன் விவரம்:எனது 2001 -2006ம் ஆண்டு ஆட்சியில், மின் தட்டுப்பாடு என்ற
பேச்சுக்கே இடமளிக்காத வகையில், உபரி மின்சாரத்தை வெளி மாநிலங்களுக்கு
அளிக்கும் வகையில், தமிழக மின்சார வாரியத்தின் செயல்பாடு நன்றாக இருந்தது.
தூத்துக்குடி, மேட்டூர், வடசென்னை அனல் மின் நிலையங்கள் அவற்றின் செம்மையான
செயல்பாடுகளுக்காக, 2001 முதல் 2006 வரை, தொடர்ச்சியாக பல விருதுகளைப்
பெற்றன. காற்றாலை மின் உற்பத்தியிலும் தமிழகம் முன்னிலை வகித்தது. இது
மட்டுமின்றி, 2,518 மெகாவாட் அளவுக்கு மின் நிறுவு திறன்
அதிகரிக்கப்பட்டது. மின் வாரியத்தின் நிர்வாகமும் சீராக இருந்தது.ஆனால்,
முந்தைய தி.மு.க., ஆட்சியில் ஆண்டுக்கு, 8 ஆயிரம் கோடி ரூபாய்க்கு மேல்
வருவாய்க்கும், செலவுக்கும் இடையே இடைவெளி ஏற்பட்டது.

இதனால், கடந்த மார்ச் 31ம் தேதி நிலவரப்படி, மின் வாரியத்தின் இழப்பு நிலவரம்:
ரூ/கோடி
தொடர் இழப்பு 50,000
வங்கி, நிதி நிறுவனங்களிடம் பெற்ற கடன் 45,000
தனியார் மின் உற்பத்தியாளர்,
ஒப்பந்ததாரர்களுக்கான நிலுவைத் தொகை 11,000

ரிசர்வ் வங்கி தடை: சுருக்கமாகச் சொன்னால், மின் வாரியம்
அளவுக்கு மீறிய கடன் சுமைக்கு ஆளாகி, வாங்கிய கடனையும், வட்டியையும்
திரும்பச் செலுத்துவதற்கே கடன் வாங்க வேண்டிய நிலையில், கடன் பிடியில்
சிக்கியுள்ளது. இதனால், மதிப்பீட்டு நிறுவனங்கள், மின் வாரியத்தின்
மதிப்பைக் குறைத்து விட்டதால், வெளிச்சந்தையில் இருந்தும் கடன் பெற
வழியில்லை. தமிழக மின் வாரியத்திற்கு கடன் அளிக்கக் கூடாது என்று, ரிசர்வ்
வங்கி உத்தரவிட்டுள்ளது.கடந்த ஆண்டு ஆட்சிப் பொறுப்பேற்ற, என் அரசு எடுத்த
நடவடிக்கையால், பல ஆண்டு இடைவெளிக்குப் பின், அனல் மின் நிலையங்கள்
செம்மையாக செயல்பட்டு வருகின்றன. தமிழ்நாடு மின் உற்பத்தி மற்றும் பகிர்மான
கழகத்தின் மின் இழப்பு விகிதமும் குறைக்கப்பட்டுள்ளது. அகில இந்திய சராசரி
மின் இழப்பு, 27 சதவீதம்; தமிழகத்தின் மின் இழப்பு, 18 சதவீதம் என்ற
அளவில் உள்ளது.

நிதி உதவி :கடந்த ஆண்டுக்கான மானியத் தொகை, 2,058.19 கோடி ரூபாய்
மின் வாரியத்திற்கு வழங்கப்பட்டுள்ளது. பங்கு மூலதனமாக, 4,100 கோடி ரூபாய்
வழங்கப்பட்டுள்ளது. முன் பணமாக, 1,455.16 கோடி ரூபாய் என, மொத்தம்
7,913.45 கோடி ரூபாய் வழங்கப்பட்டுள்ளது. இந்த ஆண்டு பட்ஜெட்டில், மின்
வாரியத்திற்கு மானியமாக, 3,068.78 கோடி ரூபாயும், புதிய மின்
திட்டங்களுக்கு பங்கு மூலதன உதவியாக, 1,500 கோடி ரூபாயும்
ஒதுக்கப்பட்டுள்ளது.மின் சேமிப்பை ஊக்குவிக்க, வினியோக இழப்புகளைக்
குறைக்க, பகிர்மான கட்டமைப்பை வலுப்படுத்த, மின் திருட்டை கட்டுப்படுத்த
சூரிய ஒளி மின் திட்டங்கள், காற்றாலை திட்டங்கள், பயோமாஸ் திட்டங்கள்
ஆகியவற்றை ஊக்குவிக்க, பல நடவடிக்கைகள் எடுக்கப்பட்டு
வருகின்றன.உடன்குடியில், 1,600 மெகாவாட் அனல் மின் திட்டத்தை, 8,000 கோடி
ரூபாய் செலவில் மாநில அரசின் திட்டமாகவே செயல்படுத்த நடவடிக்கை
எடுத்துள்ளோம்.இவ்வாறு ஜெயலலிதா அறிவித்தார்.